2 CORINTIOS 1
1
Allillachu canguichij nishcami
1Dios munashcamanta Jesucristopaj apóstol Pablomi cani. Huauqui Timoteondijmi, Corintopi caj Diospaj tandanacushca crijcunaman quillcanchij. Acaya llajtapi caj jucha illajcunamaca tucuicunamanmi quillcanchij. 2Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.
Llaquicunahuan Pablo cashcami
3Ñucanchijta Mandaj Jesucristopaj Dios Yayataca, alli nishca cachun. Paica llaquij Yayami, tucuipi cushichij Diosmi. 4Paimi tucui ñucanchij llaquicunapipish cushichin. Shujtajcuna ima llaquipi cajpipish, Dios ñucanchijta cushichishca shinallataj cushichichunmi, ñucanchijtaca chashna cushichin. 5Cristo yallitaj llaquicunata apashca shinallatajmi, ñucanchijpish apacunchij. Pai Cristollamantatajmi ñucanchij yallitaj cushicunapish shamun. 6Ashtahuanpish, cancuna cushichishca, quishpichishca cachunmi llaquichishcacuna canchij. Shinallataj cancuna cushichishca, quishpichishca cachunmi Diosca ñucanchijtaca cushichin. Chaimi cancunapish ñucanchij shinallataj llaquihuan cashpaca apai tucunguichij. 7Ñucanchij shinallataj cancunamanta llaquicunahuan cajpica, ñucanchijta shinallataj cushichishca cana yuyailla cana cashcataca allimi yachanchij.
8Huauquicuna, Asiapi ñucanchijta jahuanpi jahuanpi llaquicuna japishcataca, yachachunmi munani. Chaipica yallitaj mana apaipaj llaquicunahuanmi carcanchij. Chaimantami ña mana causanchijchu yuyarcanchij. 9Ashtahuanpish huañunatajmi nishca canatami ñucanchijpica yuyarcanchij. Ñucanchijllapitaj ama yuyaita churashpa, ashtahuanpish huañushcacunata causachij Diospi yuyaita churachunmi chashna tucurca. 10Chai Diosmi quishpichirca, cunanpish quishpichicunmi, chashnallataj huañunami nishca llaquimantapish quishpichicungallami. 11Cunanpish ñucanchijmanta Diosta mañapanguichij ninchijmi. Achcacuna mañashcamanta, Dios ñucanchijman rurai tucunata cushcamantaca, achcacunallatajmi Diostaca pagui ningacuna.
Pablo imamanta Corintoman mana rishcami
12Ñucanchijca cai pachapi Dios cushca mapa illaj, mana nij tucushcalla causaita cancunahuan causashcamantami cushicunchij: Chaica mana runacunapaj yachaimantachu, ashtahuanpish Diospaj mana c'uyaipajta c'uyaihuanmi chashna causarcanchij. Chaitaca ñucanchij ucu yuyaipimi huillacun. 13Cancuna mana rezai tucuipaj, mana entendi tucuipajtaca mana quillcanchijchu. Ashtahuanpish tucuita entendishca cachunmi munani. 14Mandaj Jesús shamui punllapi, ñucanchijca cancunapi, cancunaca ñucanchijpi cushicuna cashcataca, ñami ashata yachacurcanchij.
15Chai yuyailla cashpami, cai cutinpica ricushpapish tigracushpapish ishqui cutin cushichingapaj cancunapajmanraj shamusha nicurcani. 16Chaimantaca Macedoniamanmi pasasha yuyacuni. Macedoniamanta cutin cancunapajman ñuca tigramujpimi, Judeaman rinapaj cancuna ayudashcahuan rinata yuyacuni. 17Ñuca caita yuyarishpaca ¿jahua jahua yuyarishpachu rurarcani? Mana cashpaca, chashna ruranata yuyarishpaca ¿aichallamantachu ñucapi “aripish, manapish tiyachun” nishpa yuyarcani?. 18Ashtahuanpish Diosca pajtachijmi, chaimanta ñucanchijpish “chashnachu canga, manachu chashna canga” nishpaca mana huillashcanchijchu. 19Ñucapish, Silvanopish, Timoteopish Diospaj Churi Jesucristomanta cancunapurapi huillashpaca, “chashnachu canga, manachu chashna canga” nishpaca mana huillarcanchijchu. Ashtahuanpish paipica tucui chaicunaca “chashnatajmi”. 20Chaimantami Diosca tucui pai cusha nishcacunataca, Jesucristopi pajtachin. Chashna cajpimi ñucanchijca, Diosta jatunyachishpaca, Jesucristomanta “Chashna cachun” ninchij. 21Diosmi ñucanchijtapish, cancunatapish, Jesucristopi shujllata rurarca. Diosca paipaj Espirituta churashpami, 22paipajta rurashpa sellarca. Japina cashcata ricuchij cachunmi, ñucanchij shungupi paipaj Espirituta churarca.
23Cancunata llaquishpa Corintoman manaraj shamushcataca, ñuca shunguta rijsij Diosllataj yachanmi. Yangamanta cashna niricushpaca, ñucami imapish tucusha. 24Cashna chashna crishpami catina canguichij nishpaca, mana mandanchijchu ashtahuan cushicuchun nishpallami, chashnaca ninchij. Cancunaca crishcamantami sinchicuna canguichij.
Currently Selected:
2 CORINTIOS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.