2 CORINTIOS 2
2
1Chaimanta ama llaquirinacungapaj nishpami, cutin cancunapajman mana shamunata yuyarircani. 2Cancunahuan ñuca llaquirinacujpica, ¿pitaj ñucataca cushichingari? Ñucahuan llaquirinacushcacunallatajmari ñucataca cushichingacuna. 3Chaimanta ña quillcashca shinallatajmi quillcarcani. Cushicuna cashcacunallahuantaj llaquirinacui ama tiyachun nishpami, mana shamurcani. Ñuca cushijlla cajpica, tucui cancunapish cushijlla cana cashcataca allimi yacharcani. 4Shungupi achca llaquihuan cashpami, achca huiqui ñahui cancunamanca quillcarcani. Mana llaquichingapajchu, ashtahuanpish ñuca cancunata jatunta c'uyashcata yachachunmi chashna quillcarcani.
Mana allita rurajta Pablo perdonashcami
5Maijanpish ñucata llaquichishpaca, mana ñucallatachu llaquichishca, ashtahuanpish shuj yuyaipica (cancunata ama yalli llaquichingapajmi cashnalla nini) tucui cancunatapishmi llaquichishca. 6Chai mana allita rurajtaca, taucacuna sinchita rimacushcaca, ña chailla cachun. 7Ashtahuanpish yallitaj llaquihuan ama tucuricuchun paitaca perdonashpa cushichinami canguichij. 8Chaimantami cancuna cutin paita c'uyashcata ricuchipaichij nini. 9Ñuca tucui ima nishcata cazuj cashcata, mana cazuj cashcatapish ricungapajmi sarunca chashna quillcarcani. 10Maijanta cancuna perdonajpica, ñucapish perdonarcanimi. Imata perdonana tiyashca cajpica, cancunapaj allipajmi Cristo ricucujpi ña perdonarcani. 11Satanasca, ñucanchijmanta imata ama cushicuchunmi perdonarcani. Paica ima shinapish millaita ruranata yachaj cashcataca yachanchijmi.
Troaspimi Pabloca llaquilla cashca
12Troas pueblopi Cristomanta alli huillaita huillangapaj chayajpica, Mandaj Jesusmi punguta pascarca. 13Shina cajpipish ñuca huauqui Titota mana japishpaca, ñuca espiritupica llaquillami carcani. Chaimantami chaipi cajcunata, cayacama nishpaca Macedoniaman rircanilla.
Cristohuan mishajcunami canchij
14Paipaj mishquiman ashnajlla yachaitaca tucuipi huillachunmi, ñucanchijtaca tucui imapipish mishachishpa pushacunlla. Chaimantami Diostaca pagui nicunchij. 15Quishpichishcacunapurapipish, chingarinaman ricujcunapurapipish Cristomantami Diospajca mishquiman ashnajlla canchij. 16Chingarinaman ricujcunataca chai ashnaica huañuiman chayachijmi, ashtahuanpish quishpichishcacunataca causaiman chayachijmi. Chashna cajpica ¿pitaj chai shinaca rurai tucungari? 17Ñucanchijca, mana shujtaj achcacuna shina imata japingaraiculla chagrushpa Diospaj Shimita huillajcunachu canchij. Ashtahuanpish Dios cachashca cashpami mana nij tucushpalla Cristohuanca Diospaj ñaupajpi huillacunchij.
Currently Selected:
2 CORINTIOS 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.