1 CORINTIOS 16
16
Jucha illajcunaman cunapaj ofrendami
1Jucha illajcunaman ofrendata cachangapajca, Galaciapi tandanacushca crijcunata ñuca mandashca shinallataj cancunapish ruraichij. 2Ñuca chayajpi ofrendata ama tandana tucuchunca, cada quiquin ima shina japishca shinallataj, cada semana callari punllapi ch'icanchishpa huaquichichij. 3Ñuca chayashpami, cancuna maijanllata agllashca cajpica, quillcata rurashpa cancuna cushcataca, Jerusalenpi saquigrichun paicunata cachasha. 4Ñucapish rinataj cajpica, paicunahuan rishallami.
Pabloca maillaman rinata yuyarishcami
5Macedoniata pasashpaca, cancunata ricunaman shamushami. (Macedoniatatajmi pasana cani). 6Shamushpaca, cancunahuanmi saquiripaj yuyachini. Maiman rina cashcamanca, cancuna ayudashpa cachachunmi, tamya quillacuna pasangacama chaipi saquiripaj cani. 7Cunanca ricushpalla mana pasasha ninichu. Mandaj Jesús munajpica, asha punllacunallatapish cancunahuanmi casha nini. 8Efesopimi Pentecostescama saquirisha. 9Achcacuna ñucata p'iñajpipish, shuj jatun pungumi ñucapajca pascarishca, chaica allimari.
10Timoteo chayajpica, cancunahuan cashpa ama manchaihuan cachun ricupanguichij. Paipish Mandaj Jesuspajta ñuca shinallataj rurajmi. 11Chaimanta paitaca, pajta pipish yanganchinguichijman. Ashtahuanpish ñucapajman shamuchun, ayudashpa sumajta cachanguichij. Shujtaj huauquicunandijmi shuyacuni.
12Huauquicunahuan cancunapajman richunmi, huauqui Apolostaca achcata rogarcani. Ashtahuanpish cunanca manataj rina munaita charircachu. Q'uipata rina cajpica ringallami.
Tucuchinapaj allilla canguichij nishcami
13Chaparaichij, crishcapi sinchi caichij. C'ari c'ari sinchicuna caichij. 14Tucui imata rurashpapish, c'uyaihuan ruraichij.
15Huauquicuna, Acaya llajtapi Estefanaspaj familiacuna punta crijcuna cashcata, paicunaca jucha illajcunapajta ruranapaj curishca cashcatapish ña yachanguichijmi. 16Paicuna shina rurajcunata, shinallataj tucui ayudajcunata, trabajajcunatapish cazupanguichij nipanimi.
17Ñucaca Estéfanas, Fortunato, Acaico huauquicuna shamushcamantami yallitaj cushicuni. Paicunami cancuna carupi cashpa mana rurai tucushcataca ruracuncuna. 18Paicunami ñuca espirituta, cancunapaj espiritutapish cushichircacuna. Chashnacunamanca, paicuna japina cashcataca cupanguichij.
19Asiapi tandanacushca crijcunami cancunataca alli cashca cachun nincuna. Aquilapish, Priscilapish, paicunapaj huasipi tandanacushca crijcunapish cancunataca, Mandaj Jesuspaj shutipimi achca alli cashca cachun nincuna. 20Cancunataca tucui huauquicunami alli cashca cachun nincuna. Caishuj chaishuj jucha illaj muchahuan alli cashca cachun ninacuichij. 21Pablomi cai alli cashca cachun nishcataca, ñuca maquihuantaj quillcani.
22Mandaj Jesucristota maijanpish mana c'uyajca, llaquichinapaj cachun. ¡Mandaj Jesusca shamugrinmi!
23Mandaj Jesucristopaj mana c'uyaipajta c'uyaj canaca cancunahuan cachun. 24Cristo Jesuspi ñuca c'uyaica cancunahuan cachun. Chashna cachun.
Currently Selected:
1 CORINTIOS 16: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.