1 CORINTIOS 15
15
1Cunanca huauquicuna, cancunaman alli huillaita ñuca huillashcatami yuyachisha nini. Chai huillashcataca chasquircanguichijmi. Chai huillashcapi nishca shinami sinchita caticunguichij. 2Chai ñuca huillashcata crishcataj cashpaca, ña quishpichishcami canguichij. Chai huillashcacunapimi catiranguichij.
3Ima shina chasquishca shinallatajmi, cancunamanca chaitaraj yachachircani: Cristoca, Quillcachishcacunapi nishca shinallataj ñucanchij juchacunamantami huañurca. 4Quillcachishcacunapi nishca shinallatajmi pambashca carca, quimsa punllapica causarircami. 5Causarishpaca Cefasmanrajmi ricurirca, chai q'uipaca chunga ishquicunamanmi ricurirca. 6Chai q'uipaca tandanacushca 500 yalli huauquicunamanmi shuj ricuripi ricurirca. Chaicunamantaca achcacunami causacunraj, maijancunaca ña huañushcacunami. 7Chai q'uipaca Jacoboman, chai q'uipaca tucui apostolcunamanpishmi ricurirca. 8Tucuicunaman ricurishca q'uipaca, shullurishca shina ñucamanmi ricurirca.
9Diospaj tandanacushca crijcunata catirashpa llaquichij cashcamantaca, caishuj apostolcunapaj q'uipallami cani. Apóstol nishcapish mana caipajmi cani. 10Ashtahuanpish Diospaj mana c'uyaipaj c'uyaimantaca ima shinami cani, chaimi cani. Diospaj mana c'uyaipajta c'uyaica, ñucapajca mana yanga cashcachu. Ashtahuanpish ñucaca, tucui caishujcunata yallimi trabajashcani. Chaitaca mana ñucallatajchu, ashtahuanpish Diospaj mana c'uyaipajta c'uyai ñucahuan cashpami chashna rurachishca. 11Ñuca cashpa, caishujcuna cashpapish, chaillatatajmi huillacunchij, chaillatatajmi crircanguichij.
12Cristoca huañushcacunapaj chaupimantami causarirca nishpa huillacujpipish ¿ima nishpataj cancunapurapi maijancunaca huañushcacuna causarinaca mana tiyanchu nincuna? 13Huañushcacuna causarina mana tiyajpica, Cristopish mana causarinmanchu carca. 14Cristo mana causarishca cajpica, ñucanchij huillashcapish yangallami, cancuna crishcapish yangallami canman. 15Diosca Cristotami causachirca nishpa huillashcamantaca, Diosmanta llullashpa huillajcunami canchijman. Paita mana causachishca cajpica, huañushcacunaca manatajmari causarinmanchu. 16Huañushcacuna mana causarina cajpica, Cristopish mana causarinmanchu carca. 17Cristo mana causarishca cajpica, cancuna crishcapish yangallami: Cancunaca juchacunapirajmi canguichijman. 18Shina cajpica Cristopi huañushcacunapish chingarishcacunallatajmi canman. 19Ñucanchijca cai causaipajlla Cristopi shuyacushpaca, tucui gentecuna llaquinachinami canchijman.
20Ashtahuanpish cunanca, huañushcacunapaj chaupimanta Cristoca causarishcami. Paica huañushcacuna causarinata ricuchishpa punta causarijmi. 21Ima shinami shuj runallamanta huañuica cai pachaman yaicurca, chashnallatajmi huañushcacunapaj chaupimanta causarinapish shuj runallamanta tiyan. 22Ima shinami Adanmantaca tucuicuna huañun, chashnallatajmi Cristopi cajcunaca tucuicuna causachishca canga. 23Ashtahuanpish tucuicunami paicuna causarina cashcapica huashan huashan causaringa: Cristomi puntaca causarirca. Chai q'uipaca Cristopaj cajcunami pai shamuipica chashna causaringacuna. 24Cristoca tucui paita p'iñaj mandajcunata, tucui poderyujcunata chingachishpami, pai mandacushcataca Dios Yayaman cunga. Chai q'uipaca tucurimi canga. 25Tucui paita p'iñajcunata paipaj chaqui sarunapi churangacamami, paillataj mandacungalla. 26Tucui p'iñajcunapaj q'uipa chingachishca canapaj p'iñajca, huañuimi.
27Diosca tucui ima tiyajtami paipaj chaqui sarunapi churarca. Tucui ima tiyajta paipaj chaqui sarunapi churarca nishpaca, paipaj chaqui sarunapi churaj Diostapish cazuchicun mana nisha ninchu. 28Tucui ima tiyajta Cristopaj ucupi churashca q'uipaca, tucuita churaj Diospaj ñaupajpica paipaj Churillatajmi cumuringa. Chashnami Diosca tucuipi, tucuicunata mandanga.
29Huañushcacuna causarina manataj tiyajpica, huañushcacunapaj randi bautizarijcunaca ¿imatataj rurangacuna? Huañushcacunapaj randica ¿imapajtaj bautizarincunamanri? 30¿Ima nishpataj ñucanchijca, pipish maipipish huañuchina manchailla canchij? 31Huauquicuna, punllantami pipish huañuchinalla puricuni. Cancuna ñucanchijta Mandaj Jesucristota crij cajpi cushicushpami chashna caitaca nicuni. 32Éfeso pueblopi p'iña animalcunahuan jatun tucungapajlla macanacushca cashpaca ¿ima allitataj japishari? Huañushcacuna mana causarina cajpica: “Micushunchij, ubyashunchij, cayaca huañushunmi” nimanmari.
33Ama umarichijchu. “Mana alli parlocunaca, alli causaitami llaquichin”. 34Alli yuyaihuan chapaichij, ama juchallichijchu. Cancunamanta maijancunaca Diosta mana rijsinguichijchu. Cancuna pingarichunmi chashnaca nini.
35Ashtahuanpish maijanca: “Huañushcacunaca ¿ima shinashi causaringa? ¿Ima cuerpohuanshi jataringa?” nishpa tapungachari. 36Upa, can tarpushcaca manaraj huañushpaca mana causaiman tigranchu. 37Imata tarpushpapish, ña huiñashcataca mana tarpunguichu. Muyullatami trigota cashpa, ima shujtajta cashpapish tarpungui. 38Diosca pai munashca yuratami huiñachin. Ima muyuta cashpapish, chaitatajmi yurayachin.
39Tucui aichacunaca mana chai shinallatajchu. Gentecunapaj aichaca shuj shinami, animalcunapaj aichaca shujtajmi, chalhuacunapaj aichapish ch'icanmi, alasyujcunapaj aichapish ch'icanmi. 40Jahua pachapaj cuerpocunapish, cai pachapaj cuerpocunapish tiyanmi. Ashtahuanpish jahua pachapaj cuerpocunaca shujtaj shina sumajmi, cai pachapaj cuerpocunapish shujtaj shina sumajmi. 41Intica shuj shinami achijyachin, lunapish shujtaj shinami achijyachin, luzerocunapish shujtaj shinami achijyachin. Shuj luzeroca, caishuj luzeromanta ch'icanmi achijyachin.
42Huañushcacuna causarinapish chashnallatajmi. Ismujllata tarpujpica, mana ismujmi causaringa. 43Millananata tarpujpica, sumajmari causaringa. Irquiyashcata tarpujpica, imatapish rurai tucujmari causaringa. 44Huañujlla cuerpota tarpujpica, Diospajlla cuerpomi causaringa. Huañujlla cuerpopish tiyanmi, Diospajlla cuerpopish tiyanmi.
45Cashnapishmi quillcashca tiyacun: “Punta rurashca Adán runaca, causaj almayujmari” ninmi. Q'uipa Adanca, causaita cuj Espiritumari. 46Ashtahuanpish Diosmanta cajca mana puntachu, aichayujmi puntaca, chai q'uipami Diosmanta cajca. 47Punta runaca allpamantami carca, allpallatajmi. Q'uipa runaca jahua pachamantami, paica Mandaj Jesusmi. 48Allpamanta caj shinallatajmi allpapaj cajcunapish, jahua pachamanta caj shinallatajmi jahua pachapaj cajcunapish. 49Ima shinami allpamanta cajman rijchaj shamurcanchij, chashnallatajmi jahua pachamanta cajman rijchaj ricurishun.
50Ashtahuanpish caitami nisha nini, huauquicuna: Aichapish, yahuarpish Dios mandanapica, ima japinata mana charingachu. Imapish ismujca, mana ismujpica ima japinata mana charingachu. 51Cancunamanca pi mana yachashcatami huillasha nini: Mana tucuicuna huañushunchu, ashtahuanpish tucuicunami shujtajyachishca cashun. 52Tucuri trompeta uyarijpica, ñahui quimllai shinallapimi shujtajyachishca cashun. Trompetapi tocajpica huañushcacunaca, mana ismuj cuerpohuanmi causachishca cangacuna. Ñucanchijpish shujtajyachishcami cashun. 53Cai ismuj aichaca mana ismujta churarinatajmi, cai huañujlla aichaca mana huañujta churarinatajmi. 54Cai ismuj aichaca mana ismujta churarijpi, shinallataj cai huañujlla aichaca mana huañujta churarijpimi, cashna quillcashca tiyacuj shimica pajtanga: “Mishajmi huañuitaca tucuchishca. 55Huañui, ¿maipitaj cambaj tujsishpa huañuchinaca? Pambana jutcu ¿maipitaj can cushicunaca?” 56Huañuchijpaj tujsinaca juchami, juchaca Mandashcahuan tucushpami llaquichin. 57Ashtahuanpish ñucanchijta Mandaj Jesucristomanta mishanata cushcamantami, Taita Diostaca pagui nina canchij.
58Chashna cajpica ñuca c'uyashca huauquicuna, Mandaj Jesuspajta ruranapi huiñashpa, sinchiyashpa, pi mana cuyuchipaj catiraichij. Cancuna Mandaj Jesuspi shujlla tucushpa paipajta trabajashca mana yanga cashcataca yachanguichijmi.
Currently Selected:
1 CORINTIOS 15: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.