1 CORINTIOS 13
13
C'uyaica tucuimanta yallimi
1Gentecunapaj rimaicunapi, angelcunapaj rimaicunapi ñuca rimashpapish, c'uyaita mana charishpaca, fierro chilin nishca shina, platillo t'alaj nishca shinallami uyarini. 2Dios huillachijpi huillaj canata charishpapish, pi mana yachashcacunata tucuita entendij cashpapish, tucuita yachaj cashpapish, urcucunata shujtajman churangapaj tucui shunguhuan crij cashpapish, c'uyaita mana charishpaca, imapish mana canichu. 3Huajchacuna micuchun ñuca imalla charishcacunata tucuita chaupishpapish, ñuca cuerpota rupachichun cushpapish, c'uyaita mana charishpaca, imapish mana canichu.
4C'uyaita charijca llaquita apajmi, alli shunguyujmi, c'uyaita charijca mana shujtajpajta munanchu, c'uyaita charijca mana jatun tucunchu, mana yanga atirinchu.
5Maipish cachun mana imata ruranchu, mana paipajlla mashcanchu, mana yallitaj p'iñarijchu, llaquichijpipish mana yuyaipi charicunllachu.
6Cashcata mana rurajpica mana cushicunchu, chaipaj randica imapish mana llulla cajpimi cushicun.
7Tucui llaquita apanllami, tucuita crinllami, tucuita shuyanllami, tucuita ahuantanllami.
8C'uyaica manataj tucuringachu. Ashtahuanpish Dios huillachijpi huillaj canaca tucuringami, shujtaj rimaita rimanapish mana tiyangachu, imata yachanapish tucuringami. 9Cunanca ashallatami yachanchij, Dios ima nishcatapish ashallatami huillanchij. 10Ashtahuanpish allitaj cana punlla chayajpica, chai asha ashallata yachanaca tucuringami. 11Ñucaca huahuaraj cashpaca, huahua shinami rimarcani, huahua shinami yuyarcani, huahua shinami entendij carcani. Ashtahuanpish jatunyashpaca, huahua shina canataca saquircanimi. 12Cunanca, amsalla espejopi shinallami chingajllata ricucunchij. Ashtahuanpish q'uipataca, ñahui ñahuimari ricushun. Cunanca ashallatami yachani. Dios ima shinami ñucata rijsin, shinallatajmi q'uipataca alli rijsisha. 13Cunanca crinapish, shunguta churashca canapish, c'uyaipish mana tucuringachu. Cai quimsamanta ashtahuan yallica c'uyaimari.
Currently Selected:
1 CORINTIOS 13: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.