1 CORINTIOS 12
12
Diospajta ruraj cachun rurai tucunacunata cushcami
1Huauquicuna, Diospajta rurachun cushca rurai tucunamantaca mana yachajcuna shina cachunca mana munanichu. 2Diosta manaraj rijsijcuna cashpa, ima shina cashcataca yachanguichijmi. Cancunaca rurashcalla, upa dioscunapajman apajpimi chingarishca carcanguichij. 3Chaimantami caitaca yachaj chayachini. Pipish Diospaj Espiritumanta rimashpaca: “¡Jesustaca imapish tucunman!” mana ningachu. Chashnallataj jucha illaj Espiritullamantami pipish: “¡Jesusca Mandajmi!” ni tucun.
4Diospajta rurachun cushca rurai tucunaca ch'ican ch'icanmi tiyan, ashtahuanpish chai rurai tucunata cuj Espirituca shujllami. 5Diospajta ruranacunaca ch'ican ch'icanmi tiyan, ashtahuanpish Mandaj Jesusca shujllami. 6Ruraicunaca ch'ican ch'icanmi tiyan, ashtahuanpish tucuita tucuicunapi rurachij Diosca shujllami. 7Ashtahuanpish Espíritu rurachishcacuna ricurichunmi, tucuicunapaj allipaj cada quiquinman cushca. 8Diosca paipaj Espirituhuanmi shujmanca alli yachaihuan rimachun, caishujmanpish chai Espiritullahuantaj alli yuyaihuan rimachun cushca. 9Shujtajmanca chai Espiritullahuantajmi crinata, caishujmanca chai Espiritullahuantajmi alliyachi tucunata cushca. 10Shujtajmanca milagrocunata rurajta, caishujmanca profeciata, chaishujmanca ima espíritu rimachicushcata agllajta, caishujmanca ch'ican ch'ican rimaicunata rimajta, caishujmanca chai rimaicuna imata nisha nishcata huillaj cachunpishmi cushca. 11Ashtahuanpish tucui cai ruraicunataca, shujlla Espiritullatajmi rurachicun. Cada quiquinmanmi, pai munashca shinallataj chaupin.
12Cuerpoca shujlla cashpapish, achca miembrocunatami charin. Cuerpopaj miembrocunaca achcacuna cashpapish, tucuicunami chai cuerpopajlla, chashnallatajmi Cristopaj cuerpopish. 13Shuj cuerpolla canapajmi tucuicuna shuj Espiritullapi bautizashca carcanchij. Judiocuna cajpi, griegocuna cajpi, amopajta ruraj cajpi, amopajta mana ruraj cajpipish, tucuicunamanmi chai Espiritullamantataj ubyachirca.
14Cuerpoca mana shuj miembrollatachu charin, ashtahuanpish achca miembrocunami. 15Chaquica: “Mana maqui cashcamantaca, mana cuerpopajchu cani” ningachari. Chashna nishpapish ¿manachu cuerpopajllataj? 16Rinrinpish: “Mana ñahui cashcamantaca, mana cuerpopajchu cani” ningachari. Chashna nishpapish ¿manachu cuerpopajllataj? 17Tucui cuerpo ñahui cajpica ¿rinrinca maipishi canman? Tucui cuerpo rinrin cajpica ¿singaca maipishi canman? 18Ashtahuanpish cunanca Diosmi cada miembrota cuerpopica, pai ima shina churasha nishcapi churashca. 19Tucuicuna shuj miembrolla cajpica ¿maipishi cuerpoca canman? 20Ashtahuanpish cuerpo shujlla cajpipish, miembrocunaca achcacunami.
21Chaimanta ñahuica maquitaca: “Cantaca mana minishtinichu” mana ni tucunchu. Umapish chaquicunataca: “Cancunataca mana minishtinichu” mana ni tucunchu. 22Shina cashpapish cuerpopaj miembrocunaca, imapaj mana caj shinacunami ashtahuan minishtirin. 23Cuerpopi manapish alli nipaj miembrocunapirajmi, ashtahuan alli churarinchij. Ñucanchijpi caj manapish allichirinacunatarajmi, ashtahuan allichirinchij. 24Ñucanchijpaj allipaj cajcunaca, ashtahuan allichishca canataca mana minishtinchu. Ashtahuanpish ñucanchij mana alli nishcacunataca, Diosmi ashtahuan alli nishpa churashca. 25Cuerpopica ch'icanyarinacui ama tiyachun, tucui miembrocuna caishujmanta chaishujmanta yuyarinacuchunmi chashna allichishca. 26Chaimantami shuj miembro llaqui tucujpica, tucuicuna paihuan llaquirin. Chashnallatajmi shuj miembrota alli nijpica, tucuicuna paihuan cushicun.
27Cancunaca Cristopaj cuerpomi canguichij. Cada quiquin chai cuerpopaj miembrocunami canguichij. 28Diosca, tandanacushca crijcunapica puntaca apostolcunata, chai q'uipaca profetacunata, ishquipaj q'uipaca yachachijcunata, chaipaj q'uipaca milagrocunata rurajcunata, chaipaj q'uipaca alliyachijcunata, ayudajcunata, mingashcata alli apajcunata, shujtaj rimaita rimai tucujcunatapishmi churarca. 29¿Tucuicunachu apostolcuna? ¿Tucuicunachu profetacuna? ¿Tucuicunachu yachachijcuna? ¿Tucuicunachu milagrocunata rurancuna? 30¿Tucuicunachu alliyachi tucuchun cushcata charincuna? ¿Tucuicunachu rimaicunata rimancuna? ¿Tucuicunachu chai rimaicuna imata nisha nishcata huillancuna? 31Chashna cajpipish Dios cushca rurai tucunataca, ashtahuan allita munaichij. Cunan ñucaca, cancunamanca ashtahuan alli ñantami ricuchigrini.
Currently Selected:
1 CORINTIOS 12: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.