Yerimaiya 44
44
Nsobo ke Ntak Ubobodñkpọ
1Ikọ ami amaadisịm Yerimaiya abaña afịd mme Yuu e-ekedʌññọ ke Usuuk Iyib, ke Mikdol, Tapanes ye Memfis, ye ke ñkañ Adoro Iyib: 2“Se Abọọñ Andikponñkan, Abasi Isrel, atañ ado ami: Ndufo emaekịt ekamba nsobo a-ami ñkebenne ndot Yeruselem ye afịd mme abio Yuda. Mfịn ami ammọ ena ukpọk enyʌñ eba ke ñwuudo 3ato ke ibak a-ammọ ekenamma. Ammọ emaedịppe iyadesịd mmi ke adifọp insensi nnọọ ñnyʌñ ñkpono mme abasi mfen a-ammọ me ndufo me mme eteete ammọ imiikidiọọñọke. 4Ke ini ke ini ami mmaadọñ isʌñutom mmi mme prọfed, e-ekebooho ammọ, ‘Ikiinam mbubiam ñkpọ a-ami nsuaha!’ 5Ado ammọ ikikoppo inyʌññọ inọ ñkpañutọñ; ammọ ikikpọññọ ibak, inyʌññọ itre ufọp insensi nnọọ mme abasi mfen. 6Ke ntoro, ami mmaaduọk ammọ ufiob iyadesịd mmi; anye amaata akanna mme abio Yuda ye mme efaak ke Yeruselem anyʌñ anam ammọ edo mme ñwuudo abio a-ammọ edooho mfịn ami.
7“Idahami se Abọọñ Abasi Andikponñkan, Abasi Isrel atañ ado ami: Nsoo inam nọ ndufo eben utọ ekamba nsobo ami enọ idem ndufo ke adiwoot afịd ideen ye ibaan, ye ntəkayịn ye nsek nditọ mfep ke Yuda, inyʌññọ inịm nsʌhọ inọ idem ndufo? 8Nsoo inam nọ ndufo edịppe iyadesịd mmi ato se ubọk ndufo enam, ke ufọp insensi nnọ mme abasi mfen ke Iyib, a-ndufo ekedʌññọ ke esịd? Ndufo eyaesobo idem ndufo enyʌñ enam idem ndufo ñkpọ isuuñọ ye ñkpọ ndọk ke iso afịd mme idịd ke unadod. 9Nte ndufo emefre ibak se mme eteete ndufo ye ndidem ye mbọọñibaan ndufo ke Yuda ekenam ye mme ibak se ndufo ye mme ibaan ndufo ekenam ke isọñ Yuda ye ke mme efaak ke Yeruselem? 10Tutu usen mfịn ami ammọ isuuhọke idem inyʌññọ iwọt ukpono, a-ammọ ekeeneke mbed ye ewʌhọ a-ami ñkinịmme ndufo ye mme eteete ndufo ke iso.
11“Ke ntoro se Abọọñ Andikponñkan, Abasi Isrel, atañ ado ami: Ami mmebeeñe idem adiben afanekọñ inọọ ndufo ñnyʌñ nsobo afịd Yuda. 12Ami ñyaaben nsʌhọ Yuda e-ekebeeñeke idem adika ñkedʌñ ke Iyib nsio. Afịd ammọ eyaetak ke Iyib; ammọ eyaeduọ ke akañkañ, imiidooho ekpa ke akañ. Tọọñọ ke ntək-ntək tutu asịm ekamba, ammọ eyaekpa ke akañkañ, imiidooho ekpa ke akañ. Ammọ eyaedo isuuñọ ye ñkpọ ndịk, isuuñọ ye ñkpọ ndọk. 13Ami ñyaamia mbon e-edʌññọ ke Iyib ufen ye akañkañ, akañ ye udọñọ nsobo, naña ñkemia Yeruselem ufen. 14Ibaaha ñyọhọnsʌhọ Yuda ndomokeed e-ekaaha ekedʌñ ke Iyib se idiibọkkọ me se idiidu uwem itịmme inyọñ isọñ Yuda, a-ammọ eduakka adinyʌñ ntịmme ñnyọñ ñkedʌñ; ibaaha mbon se idiitịmme inyọñ, ibọhọke ibad-ibad mbon efeeñeke ekpọñ Iyib.”
15Akem afịd ideen e-ekediọọñọke ke ibaan ammọ ekesʌk efọp insensi enọ mme abasi mfen, dian ye afịd ibaan e-ekebaaha do, ataa ekamba atu awo, ye afịd mme awo e-ekedʌññọ ke Usuuk ye Adoro Iyib, emaebo Yerimaiya ete, 16“Ñnyịn idiikoppo etob a-afo atañña inọọ ñnyịn ke anyịñ Abọọñ! 17Ke akpanikọ ñnyịn iyainam afịd se ñnyịn iduak adinam: Ñnyịn iyaifọp insensi inọ Abọọñanwaan Hefịn inyʌñ iduọk uwa ukọd inọ anye, kpa naña ñnyịn ye mme eteete ñnyịn, ndidem ñnyịn ye mme adaaha ñnyịn ikinam ke mme abio Yuda ye ke mme efaak ke Yeruselem. Ke mme ini ado ñnyịn imainie uwak ndidia, ñko itie ñnyịn amaafọn, ndin ñnyịn ikibọọhọ ufen. 18Ado tọọñọ ñnyịn ikitre adifọp insensi nnọọ Abọọñanwaan Hefịn inyʌñ itre adinam uwa ukọd nnọọ anye, ñnyịn inieghe ñkpọ ndomokeed, ñko isʌk ikpañña ke akañkañ ye akañ.”
19Mme ibaan emaedian do ete, “Idaha a-ñnyịn ikifọppọ insensi inọọ Abọọñanwaan Hefịn inyʌñ iduọk ukọd inọọ anye, ado nte mme ebe ñnyịn ikidiọọñọke ke ñnyịn ikisʌk isinam uyo e-emịññe usioidem Abọọñanwaan Hefịn inyʌñ iduọk uwa ukọd inọ anye?”
20Akem Yerimaiya amaabo afịd mbon awo, ideen ye ibaan, e-ekebọọrọke anye ntom ate, 21“Ado nte Abọọñ ikitoiyoke inyʌññọ idat isịn ke akikere mme insensi a-ndufo ye mme eteete ndufo ekefọppọ ke mme abio Yuda ye ke mme efaak ke Yeruselem, ukem ye ndidem ndufo ye mme adaaha ndufo ye afịd mme awo ke isọñ abio? 22Ke ini Abọọñ imiikikanna aba ime mme ibak adinam ndufo ye mbubiam ñkpọ a-ndufo ekenamma, isọñ ndufo amaakappa ñkpọ isuuñọ anyʌñ anaa ukpọk, mme awo ibaaha ke esịd, kpa naña aba mfịn ami. 23Sia ndufo emaefọp insensi enyʌñ enam idiọọkñkpọ ye Abọọñ, inyʌññọ ikop uyio amọ, inyʌññọ ikeene mbed amọ me mme ewʌhọ amọ me mme ubonoñkpọ amọ, nsobo ami adi ibịne ndufo, naña ndufo ekịt idahami.”
24Akem Yerimaiya amaabo afịd mbon awo, dian ye mme ibaan ate, “Ikop ikọ Abọọñ afịd ndufo mbon Yuda e-edʌññọ ke Iyib. 25Se Abọọñ Andikponñkan, Abasi Isrel, atañ ado ami: Ndufo ye mme ibaan ndufo emenam se ndufo ekebo ke eyaenam idaha ekenwọñọke ebo, ‘Ñnyịn iyainam mme enwọñọ a-ñnyịn ikinamma adifọp insensi ñnyʌñ nduọk uwa ukọd nnọọ Abọọñanwaan Hefịn.’
“Ikaa iso ndin, inam se ndufo ekenwọñọ! Inịm mme enwọñọ ndufo! 26Ado ikop ikọ Abọọñ, afịd ndufo mme Yuu se idʌñ ke Iyib: ‘Ami Abọọñ mmenwọñọ ke akwa anyịñ mmi,’ mbo ke, ‘ibaaha awo ndomokeed a-atooho Yuda a-adʌññọ ke itie akeedodo ke Iyib se idiitommo anyịñ mmi aba me anwọñọ ate, “Ke akpanikọ naña Abọọñ Andikara adu uwem.” 27Sia ami nsʌk ñkpeme ammọ nnịm nnọ unọmọ, idooho ke eti; mme Yuu e-ebaaha ke Iyib eyaetak ke akañkañ ye akañ tutu esobo afịd ammọ. 28Mbon se idiibọkkọ akañkañ itịmme ito Iyib inyọñ isọñ Yuda ediido ibad-ibad. Ndin afịd mme nsʌhọ ufọk Yuda ekediidʌññọ ke Iyib eyaediọọñọ me ikọ anie adiida, ake mmi me ake ammọ.
29“ ‘Se idiido idiọọñọ inọ ndufo ke ami ñyaimia ndufo ufen ke itie ami ado ami,’ Abọọñ atañ, ‘nọ ndufo ediọọñọ ebo ke uduak mmi adisobo ndufo mmọdo aba ke akpanikọ.’ 30Se Abọọñ atañ ado ami: ‘Ami ñyaayaak Fero Hofra adidem Iyib nsịn ke ubọk mme asua amọ e-eyemme adiwot anye, ukem naña ñkeyaak Sedekaiya adidem Yuda nsịn ke ubọk Nebukadnesa adidem Babilọn, a-asua akeyemme adiwot anye.’ ”
Currently Selected:
Yerimaiya 44: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
