Yerimaiya 43
43
1Ke ini Yerimaiya amaakedọkkọ mme awo afịd ikọ Abọọñ Abasi ammọ, afịd ñkpọ se Abọọñ akedọñ anye abo adọkkọ ammọ, 2Asaria ayịn Hosaiya ye Yohanan ayịn Kare ye afịd ideen ñkịdidem emaebo Yerimaiya ete, “Afo asʌhọ nsu! Abọọñ Abasi ñnyịn ikudọññọ fiin nọ abo, ‘Inaaha ndufo eka ekedʌñ ke Iyib.’ 3Ado Baruk ayịn Neria udọọñ fiin abo iyaak ñnyịn anọ mbon Babilọn, nọ ammọ iwot ñnyịn imiidooho ammọ iben ñnyịn enyọñ Babilọn nte ifʌn.”
4Ndin Yohanan ayịn Kare ye afịd mme adaaha ekọñ ye afịd awo emaesịn edinịm ewʌhọ Abọọñ adiba ke isọñ Yuda. 5Utukeado, Yohanan ayịn Kare ye afịd mme adaaha ekọñ emaekoono afịd ñyọhọnsʌhọ ufọk Yuda emaeketịmme enyọñọ eto afịd mme idịd se ekesuan yak edidʌñ ke isọñ Yuda. 6Ammọ emaenyʌñ ekoono afịd mbon se Nebusaradan adaiso ekọñ adidem akekpọñ anọ Kedalia ayịn Ahikam, ayịn Safan, ideen, ibaan, ntəkayịn ye nditọ ibaan adidem. Ñko ammọ emaenyʌñ eben prọfed Yerimaiya ye Baruk ayịn Neria. 7Ndin ammọ emaetịt utọñ ke se Abọọñ aketañ enyʌñ edʌk Iyib ekaa ataa esịd-esịd idʌn tutu ekewuọ Tapanes.
8Ke Tapanes ikọ Abọọñ amaadisịm Yerimaiya ate: 9“Ke idaha mme Yuu esʌkkọ ese, ben mme ikpọ itiad nyʌñ buuk ammọ ke aduañ ke ñkpufañ ntək itiad ke ntondʌk inuausʌñ ufọkubọọñ Fero ke Tapanes. 10Ndin dọkkọ ammọ, ‘Ami ado se Abọọñ Andikponñkan, Abasi Isrel atañ: Ami ñyaadọñ ekoot ayịnutom mmi Nebukadnesa adidem Babilọn, ndin ami ñyaadaaha ebekpo ubọọñ amọ ke anyọñ itiad a-ami ñkebuuhọ mi; anye ayaatat ufʌkayio ubọọñ amọ afʌk ammọ. 11Anye ayaadinwana ye Iyib, aben ñkpa asọk mbon e-enịmme enọ ekpa, ñkpakọb anọ mbon e-enịmme enọ ñkpakọb, anyʌñ aben akañkañ asọk mbon e-enịmme enọ akañkañ. 12Anye ayaasịn ikañ ke mme tembịd mme abasi mbon Iyib; anye ayaafọp mme tembịd ammọ, anyʌñ asịn mme abasi ammọ ukad. Kpa naña akpemeedọñ anam ewịra amọ asana ke adidiañña mme ndañ nsio, kpa ntoro ke anye adiinam Iyib asana mbemiso anye anyọñ. 13Ke itie tembịd utịn#43:13 Akeme ido Heliopolis ke Iyib, anye ayaawuut ndisana abai anyʌñ afọp mme tembịd mme abasi Iyib abono ke isọñ.’ ”
Currently Selected:
Yerimaiya 43: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
