Esikeel 8
8
Mbubiam ke Tembịd
1Ke ayọhọ isua itiokeed, ke ayọhọ afiọñ itiokeed ke ayọhọ usen ition, ke ini ami ñketieghe ke ufọk mmi ndin mme ñkpisọñ ke Yuda enyʌñ etie ke iso mmi, ubọk Abọọñ Andikara amandoro miin ke idem. 2Ami mmaase, ñnyʌñ ñkịt ñkpọ keed nte mbid awo. Tọọñọ ke itie se ikiba nte isịn amọ sọiyọ anye akeba nte ikañ, ndin tọọñọ do dọọk mbid amọ amaayamma nte ukwak e-efọppọ ke ikañ. 3Anye amaasio ñkpọ a-akebaaha nte ubọk anyan anyʌñ ammʌm miin ke ided iwuod mmi. Sịbidịd amambenne miin adaaha ufuum ke ufọọd isọñ ye anyọñ, ndin ke mme ñkukịd Abasi anye amamben miin akaa Yeruselem, ke ntondʌk inuaatob adoro esịd-esịd akwere, ke itie u-ubobodñkpọ a-anamma nọ Abasi afịbe ufịb akedaaha. 4Ndin do ke iso mmi ke ubọọñ Abasi Isrel akeda, naña ami ñkekịt ke ñkukịd ke unaisọñ ado.
5Akem anye amaambo miin ate, “Ayịn awo, se ke ukañ adoro.” Ndin ami mmaase, ndin ke ntondʌk ukañ adoro inuaatob akpokoro uwa ami mmaakịt ubobodñkpọ a-anamma nọ Abasi afịbe ufịb.
6Ndin anye amaambo miin ate, “Ayịn awo, nte afo amekịt se ammọ enam, mme ataa mbubiam ñkpọ a-nditọ Isrel enamma mi, mme ñkpọ se idimbịn miin isio ke adisana itie mmi? Ado afo ayaakịt mme mbubiam ñkpọ se idọdiọọk ikan ado.”
7Ndin anye amaamben miin adi inuaatob akwere. Ami mmaase, ñnyʌñ ñkịt adudu ke ndibene. 8Anye amaambo miin ate, “Ayịn awo, dọk ndibene ado idahami.” Ndin ami mmaadọk ndibene ñnyʌñ ñkịt usʌñ keed do.
9Ndin anye amaambo miin ate, “Dʌk kaa kekịt mme ibak ye mbubiam ñkpọ se ammọ enañña mi.” 10Ndin ami mmaadʌk ñnyʌñ ñkese, ndin ami mmaakịt naña ekap afịd utọ ñkpọ se inyọnyọọn ye mme ndedeghe unam ye afịd ubobodñkpọ Isrel ke afịd ndibene ado. 11Ñkpisọñ Isrel ata mme duob (70) emaeda ammọ ke iso, ndin Yaasania ayịn Safan amaanyʌñ ada ke atu ammọ. Ammọ keedekeed emaekama sensa ke ubọk, ndin anem ufịk insensi amaadọọk ke anyọñ nte nsʌñikañ.
12Anye amaambo miin ate, “Ayịn awo, afo amekịt se mme ñkpisọñ Isrel enam ke akịm, awo keedekeed ke ñwommo ubobodñkpọ amọ? Ammọ ebo ete, ‘Abọọñ ikịtte ñnyịn; Abọọñ adakka akpọñ isọñ ami.’ ” 13Anye amaamaana abo, “Afo ayaakịt ammọ naña enam mme mbubiam ñkpọ se idọdiọọk ikan ado.”
14Ndin anye amaamben miin akaa ntondʌk inuaatob ukañ adoro ufọk Abọọñ, ndin ami mmañkịt ibaan naña etie do, esʌk efʌhọ ebaña abasi Tamuus. 15Anye ambo miin ate, “Ayịn awo, nte afo amekịt ami? Afo ayaakịt mme mbubiam ñkpọ se idọdiọọk ikan ami.”
16Ndin anye amaamben miin adʌk ataa esịd-esịd akwere ufọk Abọọñ, ndin do ke ntondʌk tembịd, ke ufọọd esa ye akpokoro uwa, ñkpọ nte ideen edịb mme ition emaeda. Ammọ emaekpaedem ewọt tembịd Abọọñ enyʌñ esak iso ese ukañ usakkautịn, etuak iwuod enọ ayio ke ukañ usakkautịn.
17Anye amaambo miin ate, “Ayịn awo, nte afo amekịt ami? Me ado etək ñkpọ ufọk Yuda adinam mme mbubiam ñkpọ a-ammọ enamma mi? Me ana ammọ eyọhọ isọñ ami ye afai enyʌñ ekaiso eñyat miin esịd? Se ammọ naña eben ñkọk edian ke iwuo ammọ! 18Ke ntoro ami ñyaanam ammọ ñkpọ ke iyadesịd; ami ndiiseeghe ammọ ke mbọm, ndiinyʌññọ ñyaak ammọ. Akpekọm ammọ ebọñ ñkpo ke utọñ mmi, ami ndiikpañña utọñ nnọ ammọ.”
Currently Selected:
Esikeel 8: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
