Ñwed Mbon Efisọs 6

Nditọ ye mme Unie Ammọ

1Nditọ, ikop item inọ mme ete ye mme eka ndufo ke Abọọñ, sia a-anen adinam ntoro. 2“Kpono ete ye eka mfo,” ado akpa mbed a-asañake ye enwọñọ, 3“nọ afọn ye afo, nọ afo anyʌñ adu anyan uwem ke isọñ.”

4Mme ete, ikiinam nditọ ndufo eyat esịd, ado ikama ammọ ke ukpeeb ye item ke Abọọñ.

5Mme ifʌn, ikop item inyʌñ ibaak mme eteufọk ndufo ke ederimbod ke esịd akpanikọ, kpa naña ekpekop item enọọ Krais. 6Isuuk iwuod inọ ammọ, idooho ke adibọ itooro utom anyen awo ikpọọñ ke iso ammọ, ado nte ekpedooho ifʌn Krais, enam uduak Abasi ke awọñesịd ndufo. 7Inam ke afịd esịd, nte enam enọ Abọọñ idooho awo, 8sia ndufo emediọọñọ ke Abọọñ ayaanọ afịd awo utịb ke afịd nti ñkpọ a-ammọ enamma, adooho anye ado afʌn me amanaisọñ.

9Ndin mme eteufọk, ikama mme ifʌn ndufo ke ukem usʌñ ado. Ikiisịn ammọ ndịk ke idem, sia ndufo emediọọñọ ke anye a-adooho Ete anọ ammọ ye ndufo aba ke hefịn, ndin adusad ibaaha ke anye.

Mme Ñkpọekọñ Abasi

10Ke akpatre, isọọñọ ida ke Abọọñ ye ke akpọsọñ adudu amọ. 11Isịne afịd ñkpọekọñ Abasi nọ ekan eda ke idaha adinwana afịd ñkara andidiọọk. 12Sia anwan ñnyịn idooho ye abʌk ye iyiib, ado ye mme andikara, ye mme adudu, ye mme adudu ekịm ederimbod ami, ye mme ndiọi adudu a-sịbidịd ke mme ikpeghe ebekpo anyọñ. 13Ke ntoro, iben afịd ñkpọekọñ Abasi isịne ke idem, nọ ato do mme idiọọk usen amaadi, ndufo ediikan isọọñọ ida ke iwuuk ndufo, ndin ndufo imainam afịd ñkpọ ima, isọọñọ ida. 14Isọọñọ ida ndin, ikịne ñkpaha akpanikọ ke isịn, ye ukwak ikpanesịd adinenido ke itie amọ, 15ndin inam ukod ndufo aba ke mbeeñeidem a-atooho eti mbʌk emem. 16Ke edianna afịd ami, iben ñkpọekọñ mbuọdidem ikama, a-ndufo ekanna adidat nniime akpọsọñ idañ ikañ andidiọọk. 17Ibenne itam adinyaaña iyara, ye akañkañ Sịbidịd, a-adooho ikọ Abasi.

18Inyʌñ idat mme nsio-nsio ukod akam ye mme ebeeñe ibọñ akam ke Sịbidịd afịd ini. Ye akikere ami ke esịd, itịñ anyen inyʌñ ibọñ akam afịd ini inọ afịd mme ndisana ikọd Abasi. 19Ibọñ akam innọ miin ñko, ite ini akeedodo a-ami ñkʌppọke inua, yak ennọ miin ikọ nọ ntañ uko-uko, nọ nnam ediọọñọ mme ndedịbe ñkpọ eti etob 20a-ami ndooho isʌñutom nnọ ke ñkpakọb. Ibọñ akam nọ ami ñkan ñkwọrọ anye uko-uko naña akpenaa nte nnam.

Akpatre Ekọọm

21Tikikọs, adima ayịneka awodeen ye ataa eti anam akpanikọ isʌñutom ke Abọọñ, ayaidọkkọ ndufo afịd ñkpọ, nọ ndufo ñko ediọọñọ naña aba ye ami ye se ami nnam. 22Ami ndọñ anye inọ ndufo ke ntak ami, nọ ndufo ediọọñọ naña aba ye ñnyịn, nọ anye anyʌñ isọọñọ ndufo idem.

23Yak emem aba ye nditọeka#6:23 Ke usem Greek adelfọi a-adaaha anọ nditọeka ideen ye ibaananyʌñ asʌk ada anọ ideen ye ibaan e-enịmme Krais ke akpanikọ, ke atu ubon Abasi. ke Krais, ye ima a-asañake ye mbuọdidem ato Abasi Ete ye Abọọñ Yisọs Krais.

24Yak mfọn aba ye afịd awo e-emaaha Abọọñ ñnyịn Yisọs Krais ye nsi-nsi ima.

Currently Selected:

Ñwed Mbon Efisọs 6: ICB

Highlight

Copy

Compare