Ñwed Mbon Efisọs 5

Adidu Uwem Ñkeene Uwọdñkpọ Krais

1Ke ntoro, ikeene uwọdñkpọ Abasi, sia edoññoke nditọ a-anye anekkeke ama, 2inyʌñ inie ima, kpa naña Krais akima ñnyịn, a-akenyʌññọ ayaak uwem amọ anọ Abasi ke ntak ñnyịn nte anemufịk enọ ye uwa.

3Ado inaaha ñkpọ ndomokeed a-abañake use aba ke atu ndufo, me ndedeghe uwem ndomokeed, me idiọọkitọñ, sia mme ñkpọ ami ifọnnọ ke atu ndisana ikọd Abasi. 4Ñko atịme-atịme uwem inaaha aba, ye ndisịme ikọ me ñyọọ i-imiidotto, ado yak enọ ekọọm ikpọọñ. 5Sia ana ndufo enekke ediọọñọ ami: Ibaaha anam use me asịn efịbe, ndedeghe awo me awo idiọọkitọñ, (utọ awo ntoro ado akpono ndem), a-anieghe udeeme ndomokeed ke abioubọọñ Krais#5:5 Akeme isʌk ndo abioubọọñ aka Mesaiya ye ake Abasi, ye ake Abasi. 6Yak awo ndomokeed akuuyaañ fiin ke uyaha ikọ sia ato ke ntak ñkpọ ntoro iyadesịd Abasi adoro mbon ntreutọñ. 7Ke ntoro, ikiidʌk nsaña ye ammọ.

8Sia ini keed ko ndufo ekedo ekịm, ado idahami, ndufo edo unwana ke Abọọñ. Idu uwem nte nditọ unwana 9(sia mfịd unwana asịne ke afịd mfọnido, adinenido ye akpanikọ) 10inyʌñ idiọọñọ ñkpọ se inem Abọọñ esịd. 11Ikiinie ewuana ndomokeed ye mme utom ekịm imiibaaha ufọn, utu ke ado iyaara ammọ. 12Sia ado ataa ñkpọ abuud idem aditatañ se mbon ntreutọñ esinam ke ndịbe. 13Ado e-ekịt afịd ñkpọ se unwana ayaara, ndin afịd ñkpọ se unwana atuuk akappa ado unwana. 14Ntak ebooho ntom ado ami:

“Demme, afo adaiya idab,

set ke ñkpa,

ndin Krais ayaayamma unọ fiin.”

15Ndin inekke ikpeme naña ndufo edu uwem, ke ado nte mme anana aniọñ, ado nte mbon aniọñ, 16itʌm idat ufañ e-enieghe inam eti ñkpọ, sia mme usen ifọnnọ. 17Ke ntoro, ikiidoñño ndisịme, ado yak uduak Abọọñ inwaña ndufo. 18Ikiikpa mmịn, a-asañake ye adisappa idem. Utu ke ado, iyọhọ ye Sịbidịd. 19Ikama mme saam, mme ikwọ, ye mme ikwọ etooho Sịbidịd ineme nneme ye emọ-emọ. Ikwọ inyʌñ ibre ikwọ a-atooho esịd ndufo inọ Abọọñ. 20Afịd-afịd ini, inọ Abasi andido Ete ekọọm ke abaña afịd ñkpọ ke anyịñ Abọọñ ñnyịn Yisọs Krais.

Item A-anieghe Ubon Abasi

21Isuuho iwuod inọ emọ-emọ ke ntak Krais.

22Ibaan ndọ isuuho idem inọ mme ebe ndufo, nte esuuhọ enọ Abọọñ. 23Sia ebe ado iwuod anọ anwaan nte Krais adooho iwuod anọ ufọkabasi, a-adooho idem amọ, a-anye anyʌññọ ado Andinyaaña. 24Ndin, naña ufọkabasi asuuhọ iwuod anọ Krais, akpena ibaan esuuk iwuod enọ mme ebe ammọ ke afịd ñkpọ.

25Mme ebe, ima ibaan ndufo, kpa naña Krais akema ufọkabasi anyʌñ asaana idem amọ ayaak anọ anye, 26nọ anam anye ado adisana, asịññe anye mbad ke adiyet ke mmọọñ ato ke ikọ, 27nọ anyʌñ aben anye ayaak anọ idem amọ nte ufọkabasi a-ayammake ke ubọọñ, inieghe mbad me ñkịd, ibiomoke ndo ndomokeed, ndin ado adisana, anyʌñ anana ndo. 28Ke ukem usʌñ ami, ana mme ebe ema ibaan ammọ. Awo a-amaaha anwaan amọ ama idem amọ. 29Ke adinekke nse, kpaanam awo ndomokeed isuaha idem amọ, ado anọ anye ndidia anyʌñ akama anye afọn, kpa naña Krais ama ufọkabasi. 30Sia ñnyịn ido mme ndido idem amọ. 31“Ke ntak ami, awodeen ayaakpọñ ete ye eka amọ akediana ye anwaan amọ, ndin ammọ awo iba eyaekappa edo abʌk keed.” 32Ami ado ataa ntọtʌñọ ñkpọ a-ayaññake awo ifiọk, ado ami ntañ mbaña Krais ye ufọkabasi. 33Kpayeado, awo keedekeed ana ama anwaan amọ naña anye ama idem amọ, ndin ana anwaan akpono ebe amọ.

Currently Selected:

Ñwed Mbon Efisọs 5: ICB

Highlight

Copy

Compare