Utom Mme Abọsịd 22
22
1“Nditọete ideen ye mme ete, ikpañ utọñ ndin nọ ñkañ idem mmi.”
2Ke ammọ emaekekop naña anye atañ ikọ anọ ammọ ke usem Aramaik ammọ emaenekke enọ ñkpañutọñ.
Do ke Pọọl akebo ate: 3Ami ndo awo Yuu, ñkemana ke Tasọs ke Silisia, ado ñkedikpon ke abio ami. Ami ñkebọ ataa ayọhọ ukpeeb nto Kamaliel ke mbed mme eteete ñnyịn. Mmaamʌm ñnyʌñ nsịn idem ke abaña ñkpọ Abasi ukem nte afịd ndufo enamma mfịn ami. 4Ami mmaakọbọ mme andikeene usʌñ Krais ami tutu akesịm ñkpa. Mmaamuum ideen ye ibaan ñnyʌñ ntop ammọ ndọñ ke ufọk ñkpakọb, 5kpa nte ekamba aku ye afịd ñkpoon mbon Esob e-edoññoke Yuu ekemeke editie ntiense mbaña. Ami mmaabọ ñwed nto ammọ ñko nọ ñkoono nsọk mme nsaña ammọ ke Damaskọs; ndin ñkeka do adiben mbon se ikiba do ñnyọñ ndi Yeruselem nte mbon ñkpakọb nọ edinọ ammọ ufen.
6“Ke ñkpọ nte ufọọd uweemeayio, ke ñkanika duob mme iba, ke mmaakedikpere Damaskọs, ekamba unwana ikañ a-aketooho hefịn amaayamma inikeed inikeed añkanna miin akʌk. 7Ami mmaaduọ ke isọñ, ñnyʌñ ñkop naña uyio ambo miin ate, ‘Sọọl, Sọọl, nsoo ido ntak a-afo añkọbọke miin?’
8“Ami mmaabọọrọ, ‘Afo ado anie, Abọọñ?’
“Anye amaabọọrọ ate, ‘Ami ndo Yisọs, awo Nasared a-afo akọbọke.’ 9Mbon e-ekesañake ye ami emaekịt unwana ikañ, ado ammọ ikidiọọñọke uyio andikitañ ikọ ye ami.
10“Ami mmaabịp mbo, ‘Abọọñ, nsoo ke ami ndiinam?’
“Ndin Abọọñ amaambo, ‘Dakka da, ñnyʌñ kaa Damaskọs. Ke udo eyaekudọkkọ afịd se e-emaekenịm ebo yak afo anam.’ 11Ndin sia ami mmiikikanna ñkịt ñkpọ ato ke unwana ikañ ado, mme nsaña mmi emaemmʌm miin ubọk, tutu ami ñkewuọ Damaskọs.
12“Awo keed a-akekereke Ananayas amaadinse miin. Anye amaasiteeñe Abasi ayọhọ-ayọhọ nte mbed atemmeke, ñko afịd mme Yuu e-ekedʌññọ do emaekpono anye eti-eti, enyʌñ etañ nti ikọ ebaña anye. 13Anye amaadida añkpere miin, anyʌñ abo, ‘Ayịneka mmi Sọọl, mọọnọ ñkpọ!’ Ndin ami mmaamọọnọ anye kpa ke idaha ado.
14“Akema anye amaabo: ‘Abasi mme eteete ñnyịn amaumek fiin nọ afo adiọọñọ uduak amọ anyʌñ akịt Andido Andinen, anyʌñ akop mme ikọ ato inua amọ. 15Afo ayaado ntiense amọ anọ afịd awo ke abaña se afo akịt ye se akop. 16Ndin idahami nsoo ke afo ada abet? Dakka da, bọ uduọkmmọọñ nyʌñ yet mme idiọọkñkpọ mfo fep ke adikoot anyịñ amọ.’
17“Ke ini ami mmaaketịmme ñnyọñ Yeruselem, nsʌk mbọñ akam ke tembịd, ami mmaakịt ñkukịd, 18ñnyʌñ ñkịt naña Abọọñ atañ ikọ annọ miin. Anye amaambo miin ate, ‘Sọp idem kpọñ Yeruselem ini keed sia mme awo mi idiinyịmmeke ikọ ntiense mfo ambañake miin.’
19“Ami mmaabọọrọ nte, ‘Abọọñ, ibon ami e-ediọọñọ ke ami ñkesisaña ke sinakọk ke sinakọk adisịn ke ufọk ñkpakọb ñnyʌñ mmia mbon u-unịmme fiin ke akpanikọ. 20Ñko ke ini ekeduọkkọ iyiib Stifịn, e-ekewotto ke ntak akedooho ntiense ke mbuọdidem amọ ke afo, ami ñkeda do nnọ unyịmme, ñnyʌñ ñkpeme mme afọñidem mbon e-ekewotto anye.’
21“Ndin Abọọñ amaambo miin ate, ‘Kaa, ami ñyaunọ fiin aka anyan usʌñ abịne mme Gentile.’ ”
Pọọl Amanaisọñ Ayịn Rom
22Atu awo emaenọ Pọọl ñkpañutọñ tutu anye atañ ikọ amọ ama. Ndin ammọ emaebenne uyio esio ñkpo, ete: “Yak eben awo ami esio ke iso isọñ! Anye idotto adidu uwem!”
23Ke ammọ ekesʌkkọ ebọñ ñkpọ, enyʌñ etoomo mme afọñ ammọ esio ntọñ ke anyọñ, 24adaiso ekọñ amaanọ uyio ate eben Pọọl ekesịn ke badịk ekọñ. Anye amaanọ uyio ate emia Pọọl enyʌñ eduuñọ anye nọ anye atañ ntak a-mme awo ekebọññọ ñkpo ebaña anye ntom. 25Naña enyannake anye enịm adimia ke ikpa, Pọọl amaabịp sentudiọn a-akedaaha do abo, “Nte mbed a-ayak nọ ndufo emia amanaisọñ awo Rom ke ini awo imiibiommo anye ikpe diin?”
26Sentudiọn akekop ami, anye amaabịne adaiso ekọñ aketañ anọ anye abo: “Nsoo ke afo adiinam? Awo ami ado amanaisọñ awo Rom.”
27Adaiso ekọñ amaabịne Pọọl anyʌñ akebịp abo, “Tañ nnọ ise, nte afo ado amanaisọñ awo Rom?”
Anye amaabọọrọ ate, “Ii, se ndo adodo.”
28Ndin adaiso ekọñ amaabo ate, “Akena ami ñkpe uwak akʌk nọ enam nọ ami ndo amanaisọñ.”
Pọọl amaabọọrọ abo, “Ado ami ndo amanaisọñ tọọñọ ke emana.”
29Mbon e-ekenaaha nte ebịp anye mbuume emaesịññe idem ekpọñ anye ataa idahado. Adaiso ekọñ ke idem amọ amaadịkke, ke anye amaakedidiọọñọ ke anye akesịn Pọọl amanaisọñ awo Rom ke ñkpọnọ ukwak.
Pọọl ke Iso Sanhidrin
30Adaiso ekọñ amaayem adiduuñọ ndiọọñọ ataa akpan ntak a-mme Yuu ekedotto Pọọl ikọ. Ndin, ke edem usen, anye amaasaana Pọọl ayaak, anyʌñ anọ uyio abo yak mme ñkpoon aku ye mbon esob Sanhidrin edʌk mbono. Ndin anye amaaben Pọọl adi anyʌñ anam anye ada ke iso ammọ.
Currently Selected:
Utom Mme Abọsịd 22: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
