Utom Mme Abọsịd 21
21
Pọọl Akaa Yeruselem
1Ke ñnyịn imaikidaaña ikpọñ ammọ, imaikpọñ esʌk inyʌñ iwat nnen-nnen ika Kọs. Imaikaa Rodes edem usen, inyʌñ ito do ika Patara. 2Imaikịt nsʌñikañ nte aboiyo aka Fonisia, ndin ñnyịn imaidʌk do inyʌñ isio uwad. 3Ke ñnyịn imaikida ikịt Saiprọs, imaiwọññọ idʌk usuuk amọ, iwat iboiyo ika Siria. Ñnyịn imaibeghe ke Tai, sia ke udo ke akena nsʌñikañ ñnyịn akesịññe mbiomo. 4Ñnyịn imaiyem mme mbed do ikịt, imainyʌñ iba ye ammọ usen itiaba. Ato ke se Sịbidịd akeyaara, ammọ emaedọkkọ Pọọl ete yak anye akuukaa Yeruselem. 5Ado ke ini ñnyịn amaakekem adikpọñ, ñnyịn imainyọñọ inyʌñ ika iso ke usʌñ isañ ñnyịn. Afịd mme mbed, ñkọrọ ibaan ammọ ye nditọ ammọ emaidat ñnyịn isañ ewuọ ke abio, ndin ñnyịn imaitọọñọ edọñ do ke esʌk ibọñ akam. 6Ke imaikikọọm afịd awo unyọñ, ñnyịn imaikidʌk nsʌñikañ ndin ammọ emaetịmme enyọñ ufọk.
7Ñnyịn imaikaiso ke isañ ñnyịn ito Tai idikibeghe ke Tolemais, a-ñnyịn ikikọọmọ mme nditọeka ke Krais inyʌñ itie ye ammọ usen keed. 8Ke imaikinyọñ edem usen, ñnyịn imaikisịm Siseria inyʌñ iba ke ufọk Filib akwọrọ eti etob, keed ke atu awo itiaba ado. 9Anye amaanie nditọ ibaan inaañ i-imiikidọiyọ ebe, e-ekesitañña prọfesi.
10Ke ñnyịn imaikiba do uwak usen, prọfed keed a-akekereke Akabọs amaato Yudia adi. 11Ke anye amaakesaña adi itie ñnyịn, amaaben ñkpaha isịn Pọọl abọp ubọk ye ukod amọ anyʌñ abo ate, “Adisana Sịbidịd abo ate, ‘Ntom ke mme Yuu ke Yeruselem ediibọp andinie ñkpaha ami, eyaenyʌñ eyaak anye enọ mme Gentile.’ ”
12Ke ñnyịn imaikikop ñkpọ ami, ñnyịn ye mbon udo imaikpeiye Pọọl ite yak anye akuukaa Yeruselem. 13Ndin Pọọl amaabọọrọ ate, “Nsinam nọ ndufo etua enyʌñ enam esịd anduọ? Ami mmebeeñe idem, idooho nọ embọọp ke idʌk kpọd, ado adikpa ke Yeruselem ke ntak anyịñ Abọọñ Yisọs.” 14Ke ini ñnyịn imiikikanna ikpʌhọ anye esịd, ñnyịn imaisịññe idem ikpọñ, inyʌñ ibo, “Yak uduak Abọọñ adat itie.”
15Ke ado amaakeboiyo, ñnyịn imaitʌm idem, inyʌñ idọọk ika Yeruselem. 16Usʌk ke atu mme ntiense e-eketooho Siseria emaesaña ye ñnyịn tọọñọ ke Siseria enyʌñ iben ñnyịn ekaa ufọk Mmasọn, itie a-akenaaha ñnyịn iba. Anye akedo awo Saiprọs ye keed ke atu mme ataa akpa ntiense.
Pọọl Akewuọ Yeruselem
17Ke ñnyịn imaikidiwuọ Yeruselem, mme nditọeka ke Krais emaedaara adidi ñnyịn. 18Edem usen Pọọl ye ñnyịn imaikaa ikise Yems, ndin afịd mme adaiwuod ufọkabasi emaeba. 19Pọọl amaakọọm ammọ, anyʌñ atañ ayọhọ-ayọhọ se Abasi akenam ke atu mme Gentile ato ke utom amọ.
20Ke ammọ emaekekop ami, ammọ emaetooro Abasi. Ndin ammọ emaebo Pọọl: “Ayịneka, akpakʌb uwak tọsịn mme Yuu e-enịm ke akpanikọ, ndin afịd ammọ enie ekamba udọñ ke abaña mbed. 21Ado emaetañ enọ ammọ ete ke afo akpeep afịd mme Yuu e-edʌññọ ke atu mme Gentile ate ewọññọ ekpọñ mbed Moses, ekuufọọrọ nditọ ammọ edʌd, ekuunyʌñ edu uwem ekeene eduuwem ñnyịn. 22Nsoo ke ñnyịn idiinam? Ammọ, ke akpanikọ, eyaekop ke afo amedi. 23Ndin, nam se ñnyịn udọkkọ fiin. Mme ideen inaañ mmọdo ye ñnyịn e-ekenamma akaaña. 24Ben ideen ami, wuana ye ammọ ke usọrọ adinam idem asana nyʌñ kpe akʌk a-anaaha nte ammọ ekpe nọ ato do ammọ ekan enam nọ efat ided iwuod ammọ. Ndin afịd awo eyaediọọñọ ke akpanikọ ndomokeed isịneke ke mme ikọ e-etañña udian fiin, ado ke afo ke idem mfo asʌk adu uwem ke nsuukiwuod anọ mbed. 25Amaado mme Gentile e-enịmme ke akpanikọ, ñnyịn imiwet se ñnyịn ikibiire inọ esọk ammọ ite yak ammọ ediañña idem ekpọñ ndidia e-ewaaha enọ ndem, ekpọñ adita iyiib, ekpọñ unam e-efiakkakefiakka itọñ ewot, enyʌñ ekpọñ use ye efịbe.”
26Edem usen, Pọọl amaanam idem amọ asana ye mme ideen ado. Ndin anye amaakaa tembịd adinọ ntọd mbaña usen ye ini se adinam unam idem ammọ asana adiitre, nọ enam uwa enọ ammọ keedekeed.
Emʌm Pọọl
27Ke akeyakka etək ini usen itiaba ado adikweeñe, usʌk mme Yuu e-eketooho ikpeghe Esia emaekịt Pọọl ke tembịd. Ammọ emaenam afịd atu awo esịn ntịme ndin emaemʌm Pọọl, 28enyʌñ esio ñkpo ete, “Mbon Isrel ñnyịn, inwam ñnyịn! Awo ami ado andikpeeb mme awo ke afịd itie se imiidooho ke ufọn mbon ñnyịn ye mbed ñnyịn, ye itie ami. Ndin ke akanna ado, anye a-aben mbon Greek adʌk tembịd anyʌñ asappa adisana itie ami.” 29(Ammọ emaedadak ekịt Trofimus a-aketooho Efisọs ye Pọọl ke abio, ndin ekekere ke Pọọl akeben anye adʌk adi tembịd.)
30Ntịme amaadʌk afịd abio, ndin mme awo emaefeeñe eto nsio-nsio itie edi. Emaemʌm Pọọl, edʌt anye esio ke tembịd; ini keed ini keed emaebeet mme inuaatob. 31Ke ini ammọ ekenwanake adiwot anye, etob amaakewuọ adaiso ekọñ Rom ate ke abio Yeruselem akeba ke ataa ekamba ntịme. 32Idaha-idaha ado, adaiso ekọñ amaakoono mme ikpọawo ekọñ ye mbon ekọñ efeeñe edọñọ atu awo. Ke mme asịn ntịme ami emaekekịt adaiso ekọñ ye mbon ekọñ amọ, ammọ emaetre aditịm Pọọl.
33Adaiso ekọñ amaasaña adi, anyʌñ amʌm Pọọl anọ uyio ate ebọp anye ke ñkpọnọ iba. Ndin anye amaabịp me Pọọl ado anie, ñko me nsoo ke anye akenam. 34Usʌk ke atu awo emaebọọñ ñkpọ ke usʌñ keed, usʌk ke usʌñ mfen, ndin sia adaiso ekọñ imiikikanna ibọ akpanikọ ato ke ntak akpọsọñ uyom, anye amaanọ uyio ate eben Pọọl ekesịn ke badịk ekọñ. 35Ke Pọọl amaakesịm udodukod, afai ke atu awo amaakpon tutu akena mbon ekọñ ededịppe anye. 36Atu awo se ikikeene emaekaa iso ebọọñ, “Iben anye isio!”
Pọọl Atañ Ikọ Anọ Atu Awo
37Ndin ke ini mbon ekọñ ekeyemme ediben Pọọl ndʌk ñkaa badịk ekọñ, anye amaabịp adaiso ekọñ ate, “Akpaayak nọ ntañ ikọ unọ?”
Anye amaabọọrọ abo, “Awuọ afo amenọ usem Krik isem? 38Idooho afo ado awo Iyib a-aketọọñọke nsọñiwuod ye ukara anyʌñ akoono mbon afai tọsịn inaañ aka anaan ini keed ko?”
39Pọọl amaabọọrọ ate, “Ami ndo Yuu. Nto Tasọs ke Silisia, amanaisọñ ataa ñwuọnda idʌñ. Mbọk yak ami ntañ ikọ nnọ atu awo.”
40Ke Pọọl amaakebọ adudu ato adaiso ekọñ, anye amaada ke udodukod anam idiọọñọ ke ubọk anọ atu awo. Ke afịd awo emaekedop uyio, anye amaatañ anọ ammọ ke usem Aramaik:
Currently Selected:
Utom Mme Abọsịd 21: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
