Udiana Ñwed Tesalonia 2
2
Awo Immiinịmme Mbed
1Ke abaña adidi Abọọñ ñnyịn Yisọs Krais ye ñnyịn adiboho keed ye anye, ñnyịn ikpe ndufo ubọk, nditọeka ke Krais ite, 2ikiisọp iyak ñkpọ itịmede ndufo esịd me adinam ndufo ndịk ato mme usʌk brọfesi, etob me ñwedetob e-ebooho ke ito ñnyịn, a-abooho ke usen Abọọñ adisịm ama. 3Ikiiyak awo ndomokeed ibiaña ndufo ke baaba usʌñ ndomokeed, sia usen ado idiidiighe, ibọhọke ndutịme aba ndin enyʌñ eyaara awo abiad mbed, awo e-enịmme enọ nsobo. 4Anye ayaabiọọñọ anyʌñ abenne idem amọ akọñ akan afịd se ekoot Abasi me se ekpono, nọ anye aben idem amọ adot ke tembịd Abasi, anyʌñ asian idem amọ anwa-anwa nte Abasi.
5Nte ndufo itoiyoke ke mmaasitañ mme ñkpọ ami inọ ndufo idaha ñkebaaha ye ndufo? 6Ndin idahami ndufo emediọọñọ se imʌm anye ikama, nọ ato do mme ñkpọ ami eyaara ke akem ini. 7Sia ndedịbe adudu ubiad mbed mmọdo ababa idahami, ado andimʌm anye ñkama ayaakaiso anam ntoro tutu eben anye efep. 8Ndin eyaeyaara abiadmbed, a-Abọọñ Yisọs adiidooro iduọọk ito ke ibifịk a-awuọhọ anye ke inua, ndin anyʌñ abiat anye ato ke uyamma adidi amọ. 9Adidi abiad mbed ayaasaña akekem ye utom Setan. Anye ayaakama mme nsio-nsio adudu abiaña e-esañake ye mme idiọọñọ ye mme ñkpọ ñkpaidem, 10ye afịd usʌñ abiaña i-ibak akamake ayaañ mbon e-ediitak. Ammọ etak sia ammọ emaesịn adima akpanikọ ñnyʌñ mbọọ adinyaaña. 11Ke ntak ami ke Abasi anọ ammọ ekamba abiaña nọ ato do ammọ enịm nsu ami ke akpanikọ, 12ndin nọ ato do ebiom afịd mbon i-imiinịmme akpanikọ ikpe ado ekop idadesịd ke adinam ibak.
Sọọñọ Da
13Ado akpena afịd-afịd ini ñnyịn ikọọm Abasi ke ntak ndufo, mme nditọeka ke Krais A-Abasi amaaha, sia tọọñọ ke aditọọñọ Abasi amaimek ndufo adibọ adinyaaña nto ke utom adinam asana ake Sịbidịd ye ke adinịm ke akpanikọ. 14Anye akikoot ndufo anọ ñkpọ ami ato eti etob ñnyịn, nọ ato do ndufo ekan ewuana ke ubọọñ Abọọñ ñnyịn Yisọs Krais.
15Ke ntoro, nditọeka ke Krais, isọọñọ ida inyʌñ imʌm ukpeebñkpọ a-ñnyịn iyakka inọọ ndufo ikama, a-atooho ke ikọ inua me anyʌññọ ato ke ñwedetob.
16Yak Abọọñ ñnyịn Yisọs Krais ke idem amọ ye Abasi Ete ñnyịn, a-akimaaha ñnyịn, ndin ke mfọn amọ inọ ñnyịn nsi-nsi nsọọñọidem ye eti idodanyen, 17isọọñọ ndufo esịd anyʌñ inọ ndufo adudu ke afịd nti adinam ye ikọ.
Currently Selected:
Udiana Ñwed Tesalonia 2: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
