Udiana Ñwed Kọrint 12

Ñkukịd ye Ukuud Pọọl

1Ana ami ñka iso nduaak inua. Akpesʌkado udod ndomokeed imiibaaha, ami ñyaakaa iso ke ñkukịd ye mme adiyaara e-etooho Abọọñ. 2Ami mmediọọñọ awo keed a-abaaha ke Krais, e-ekebenne edọọk ayọhọ hefịn ita ke isua duob mme inaañ a-akeboiyoke. Me akedo ke ikpọkidem me amaakpọñ ikpọkidem, ami ndiọọñọke, Abasi adiọọñọ. 3Ndin ami mmediọọñọ ke awo ami, me ke ikpọkidem, me emaesio ke ikpọkidem, ado Abasi adiọọñọ, 4emaeben anye edʌk paradais. Anye amaakop uwak ñkpọ se inua imiikikanna itañ, mme ñkpọ se ediikiyakka awo atañ. 5Ami ñyaanam inua mbaña awo ntoro, ado ndiinamma inua mbaña idem mmi, ado ñyaanam inua mbaña mmemidem mmi. 6Akpekọm ami ñkpemek adiduaak inua, ami ñkpidooho ndisịme, ke ntak a-adooho se ñkpetañ ado akpanikọ. Ado nnamma, mbaak awo adikere ñkpọ a-akponno akan se ami ndo ye se ami nnam ñnyʌñ ntañ. 7Sia se eyaara ennọọ miin a-akpon eti-eti. Ke ntoro, mbaak ami ndiwọt idem mbọhọ, emaeñwuuk miin ñkukịm ke abʌkidem, a-adooho isʌñutom Setan adinnọ miin ufen. 8Ami mmaakpeiye Abasi akañ ita nte aben ñkpọ ami añkpọñ miin. 9Ado anye amaandọkkọ miin ate, “Mfọn mmi ukem fiin udeeme, sia enam adudu mmi afọn ama ke mmemidem.” Ke ntoro, ami ñyaaduaak inua ke idadesịd ñkan naña ñkenanam mbaña mmemidem mmi, nọ ato do adudu Krais andodo miin ke idem. 10Ke ntak Krais, ami mmedaara ke mmemidem, ke asuenne, ke nsọñọñkpọ, ke ukọbọ, ye ke mfịna. Sia ke ini ami ñkoppo mmemidem, idahado ke nnekke ñkop nsọñidem.

Pọọl Akere Abaña Mbon Kọrint

11Ami mmekappa ndo ndisịme; ado ndufo ekennək esịn ke ndisịme. Akpena ndufo ekentooro miin, sia ami nsịppesịp ñkan mme “ñkpoon ñkan abọsịd,” akpesʌkado a-ami mmendooho ñkpọ ndomokeed. 12Ami mmaasọọñọ nda ke adiwọt ndufo anwa-anwa mme idiọọñọ eti abọsịd, ñkọrọ ye mme idiọọñọ, mme ñkpọ ñkpaidem ye mme utịppeñkpọ. 13Ndufo ekesaña die eba ke usuuk itie ekan mme ufọkabasi mfen ke mmidooho ke ami ñkidooho mbiomo inọ ndufo? Idakka do innọ miin ke ndudue ami.

14Idahami, ami mmebeeñe idem adidi ndise ndufo ayọhọ akañ ita, ndin ami ndiidooho mbiomo inọ ndufo; sia se ami ñyem idooho inie ndufo, ado iyem ndufo idem. Sia ntəkayịn ikpinaaha enịm nnịmnnọidem enọ ete ye eka ammọ, ado mme ete ye eka ekpenaa enịm nnịmnnọidem enọ nditọ. 15Ndin ami ñyaabiat ke inemesịd, afịd se nnie ye idem mmi ñko inọ ndufo. Adieke ami imaaha ndufo ayọhọ-ayọhọ, nte ima a-ndufo enieghe ennọ miin akpena asịp akan ima mmi? 16Akọm naña aba ntoro, ami ñkidooho mbiomo inọ ndufo. Ado sia ami ndooho awo ñkara, ami mmaimʌm ndufo ke ñkara ndufo. 17Anie nte ami ñkifiik ndufo mbọ ñkpọ nto awo ndomokeed se ñkedọñ utom inọọ ndufo? 18Ami mmaakpeiye Taitọs nte adi ukañ ndufo ñnyʌñ ndọñ ayịneka keed ke Krais nte asaña ye anye. Taitọs ikifiighe ndufo, nte amaifiik? Nte ñnyịn ikisañake ke Sịbidịd keed ye ke usʌñ keed?

19Ndufo ekere ke afịd se inwana itañ ami ado ñnyịn adinyaaña idem ñnyịn ke iso ndufo? Ñnyịn itie ke iso Abasi itañ mme ikọ ami nte mbon e-ebaaha ke Krais; ndin afịd se inam, mme ndima ufan, ado adisọọñọ ndufo idem. 20Sia ami mmenie ndịk nte ke mmaadi, akeme inam ami ikịtte ndufo naña ñkpeyem ndufo eba, ndufo ñko idiñkịtte miin naña ekpeyem ami mba. Ami mmenie ndịk mbaña utọk, ye ufịb, ye ifiobesịd, ye ubakka, ye ubiad anyịñ ye idiọọk ibaaña, ye ñkokkoidem ye ndutịme, ke ufọọd ndufo. 21Ami mmenie eyịghe ke mmaatịmme ndi Abasi mmi ayansuuhọ miin ke iso ndufo, ndin ami ñyaafʌhọ mbaña uwak awo e-ekedakka enañña ndiọiñkpọ ke ini a-akeboiyoke, ado ikappake esịd itua ñkpọfiọk, ikpọñ ndubiam ido, ye use, ye efịbe, inyʌññọ isịññe idem ikpọñ unana mfadidem ke uwem ammọ.

Currently Selected:

Udiana Ñwed Kọrint 12: ICB

Highlight

Copy

Compare