Udiana Ñwed Kọrint 11

Pọọl ye mme Nsu-nsu Abọsịd

1Mmenie idodanyen ke ndufo eyaeyọ ye ami ke etək ndisịme mmi. Mbọk inwana inam ntoro. 2Ami mmenie ufịb Abasi ibaña ndufo, sia ñkidat ndufo nnọ ebe keed, a-adooho Krais, nọ ami iyaak ndufo nnọ anye nte adisana abọikpa. 3Ado ami mmenie ndịk sia naña udʌkikọd akebiaña Iif ke ñkara, kpa ntoro ke esịd ndufo akeme adiwuọ ñkpọñ akpanikọ ye eti ido ke Krais. 4Sia adooho awo akpedi adikwọrọ Yisọs a-akpəhoke ye Yisọs a-ñnyịn ikikwọrọke; ñko ndufo ikpinyʌñ ibọọ sịbidịd a-akpəhoke ye Sịbidịd a-ndufo ekebọọhọ, me enyʌññọ ebọọ eti etob a-akpəhoke ye anye a-ndufo ekebọọhọ eto inua ñnyịn, ndufo ibiada ini adinyịmme nnọọ ammọ.

5Ado ami ñkereke mbo ke ami nsịp ñkan mbon e-ebatta nte mme “akaakan ke atu mme abọsịd.” 6Akpesʌkado ami mmembọọhọ ukpeeb nte awo ndọọn ikọ ado mmenie ifiọk. Ñnyịn iminam ami anekke inwaña ndufo ke afịd usʌñ. 7Me akedo idiọọkñkpọ ami adikisuuk idem mmi nọ ato do idịppe ndufo ke adikwọrọ eti etob Abasi inọọ ndufo ke mfọn? 8Mmaafiik mme ufọkabasi mfen mbọ unwam nto ammọ nọ ndat nnam ñkpọ inọ ndufo. 9Ke ini ami ñkebaaha ye ndufo ñnyʌñ ñyem unwam, ami ñkidooho mbiomo nnọ baaba awo ndomokeed, sia nditọeka ke Krais e-eketooho Masidonia edi emaennọ miin se ñkeyem. Ami mmedʌt idem mmi nsio adido mbiomo inọọ ndufo ke baaba usʌñ ndomokeed, ndiinyʌñ ñkakaiso nnam ntoro. 10Adaña nte akpanikọ Krais ambaaha miin ke idem, awo ndomokeed ke afịd Akaya idiitreke ñkpọinua mmi. 11Ntak-a? Ado nte ami imaaha ndufo? Abasi adiọọñọ ke mmima ndufo!

12Ndin ami ñyaasʌk ñkaiso nnam se ami nnam nọ ato do mbiat uduak mbon e-eyemme ufañ adido ukem ye ñnyịn ke ñkpọ a-ammọ enamma inua ebaña. 13Sia utọ ibon ado edo mme abọsịd nsu, mme anam utom abiaña, e-ebenne ñkpọ efʌhọ enam nte ido mme abọsịd Krais. 14Idooho ñkpọ ñkpaidem, sia Setan ke idem amọ afọfʌhọ ñkpọ nọ atie nte ado enyere unwana. 15Idooho ñkpọ ñkpaidem ndin, adieke mme asañautom Setan ebiotto mme asañautom adinenido. Ado utịd ammọ ayaakem ye ubọkutom ammọ.

Pọọl Aduaak Inua Abaña Ufen Amọ

16Mmemaana ntañ: Yak awo ndomokeed akundat miin nte ndisịme. Ado ikpindat nte ndisịme, iñyọ miin nte ndisịme, nọ ami ñkan nduaak inua etək. 17Ke nduaak inua mmi, ntañña naña Abọọñ akpetañ, ado ntañ nte ndisịme. 18Sia uwak awo eduaak inua naña ederimbod enam, ami ñko ñyaakeene nnam ntoro. 19Ndufo emekop inemesịd adiyọ ye mme ndisịme, sia ndufo emediọọñọ ñkpọ eti-eti. 20Ke akpanikọ, ndufo emeyọ awo akeedodo i-isịnne ndufo ke ufʌn, ye anye a-adiaha inie ndufo, ye anye a-atañña idem, ye awo awọttọ idem, me awo isiaaha ndufo ufia. 21Mmekop abuud adinyịmme ke ñnyịn imaimem ibọhọ ke mme ñkpọ ado!

Se awo akeedodo mfen akpenie uko adiduaak inua mbaña, yak ntañ nte ndisịme, ami mmenie uko adiduaak inua mbaña ñkpọ ado ñko. 22Me ammọ edo mbon Hibru? Ntoro ke ami ndo. Me edo mbon Isrel? Kpa ntoro ke ami ndo. Me ammọ edo ubon Ebraham? Ntoro ke ami ndo. 23Me ammọ edo mme isʌñutom Krais? (Ami ntañ nte awo i-iwuod aboiyoke), ami mmekan ammọ. Mmenam akpọsọñ utom ñkan ammọ, mba ke ufọk ñkpakọb uwak-uwak ini ñkan ammọ, emmia ataa akpọsọñ-akpọsọñ ekan ammọ, ensio enọ ñkpa ndin-ndin. 24Ami mmaabọ ubọk ikpa edịb mme duob mme usʌkkeed nto mme Yuu akañ ition. 25Ekedat eto ukwak entịm miin akañ ita, entọ ke itiad akañ keed, ubom mmi asịp akañ ita, mmaanaa ke akpainyañ ibom akonayio keed ye uweemeayio keed. 26Uwak-uwak ini ke mme isañ mi, mmekịt mfịna ke mme inyañ, mmekịt afanekọñ ke atu mbon inọ, mmekịt afanekọñ ke ubọk emọ-emọ mbon Yuu, mmekịt afanekọñ ke ubọk mme Gentile, mmekịt afanekọñ ke ekamba abio, mmekịt afanekọñ ke esịd idʌñ, mmekịt afanekọñ ke akpainyañ, mmekịt afanekọñ ke ubọk nsu-nsu ibon i-imiinịmme ke akpanikọ. 27Ami mmenam akpọsọñ utom ñnyʌñ ñwa idem, ntaba idab uwak ini; mmetie abiọọñ uwak-uwak ini ami, ñkop nsaditọñ ñnyʌñ nnana se ndia; mmenana afọñ se nsịne, atueb anyʌñ ammʌm. 28Ke esioho afịd ami efep, ami mba ke akpọsọñ akikere ye ifiikesịd afịd usen mbaña afịd mme ufọkabasi. 29Anie ke idem amem, ndin idem atre adimmem miin? Anie ke enịm ñkpọiduọ enọ nọ adʌk idiọọkñkpọ, ndin esịd mmi atre ibara nte ikañ?

30Adieke anaaha nte ami nduaak inua, ndiiduaak ke mme ñkpọ ewọttọ mmemidem mmi. 31Abasi ye Ete Abọọñ ñnyịn Yisọs, a-anaaha etooro ke nsi-nsi, a-adiọọñọ ke ami nsʌhọke nsu. 32Ke Damaskọs a-kọfnọ ke idak ukara Adidem Aretas amaanịm mbon ukpeme ke abio ate emmʌm miin. 33Ado emaensịn miin ke akpasa, ensio ke ubenafịm esuuk ke mben ndibene tutu nsịm isọñ, ntoro ke ñkefiọnnọ mbọkkọ anye.

Currently Selected:

Udiana Ñwed Kọrint 11: ICB

Highlight

Copy

Compare