Udiana Ñwed Kọrint 1
1
1Ami Pọọl a-ndooho mbed Krais Yisọs ke uduak Abasi, ye Timoti ayịneka ñnyịn awodeen ke Krais, iwet ñwed ami inọọ ufọkabasi a-abaaha ke Kọrint ye afịd ndisana ikọd Abasi ke afịd Akaiya. 2Yak mfọn ye emem Abasi Ete ñnyịn ye Abọọñ Yisọs Krais aba ye ndufo.
Itooro Anie Abasi Afịd Idọñesịd
3Ekọọm anie Abasi, Ete Abọọñ ñnyịn Yisọs Krais, Ete mbọm ye Ete afịd idọñesịd, 4i-idọññọ ñnyịn esịd ke afịd mfịna ñnyịn, nọ ato do ñnyịn ikan idọñ mbon e-ebaaha ke mfịna ato idọñesịd a-ñnyịn ke idem ñnyịn ibọọhọ ito Abasi. 5Sia, kpa naña ñnyịn iwuana ayọhọ-ayọhọ ke ufen Krais, kpa ntoro, ato ke Krais, ke idọñesịd ñnyịn ayọhọ aduọi. 6Adieke ñnyịn ikịtte ukuud, ado nọ ndufo enie idọñesịd ye adinyaaña a-anamma ndufo enie ukeme adibiom ukem-ukem ndutʌhọ a-ñnyịn ke idem ñnyịn ikịtte. 7Ñnyịn imiinyʌñ inie idodanyen a-asọññọ ada, sia ñnyịn imiidiọọñọ ke kpa naña ndufo ewuana ke ukuud ñnyịn, kpa ntoro ke ndufo ewuana ke idọñesịd ñnyịn.
8Mme nditọeka#1:8 Ke usem Greek adelfọi a-adaaha anọ nditọeka ideen me ibaananyʌñ asʌk ada anọ ideen ye ibaan e-enịmme Krais ke akpanikọ, nte atu ubon Abasi; se ñko ke 2 Kọrint 8:1; 2 Kọrint 13:11 ke Krais, ñnyịn iyemme ndufo enana ifiọk ebaña mfịna a-ñnyịn ikikịtte ke Esia. Ñnyịn ikiba ke idak akpọsọñ mbiomo akan naña ñnyịn ikpikikan iyọọ tutu asịm idaha a-ñnyịn iduọhọ idodanyen ibaña uwem. 9Ke akpanikọ, ñnyịn imaikere ke iyaikpañña. Ado ami aketịppe mbaak ñnyịn idiibuọt idem ke idem ñnyịn ado ibuọt idem ke Abasi a-anamma akpañkpa aset. 10Anye amainyaaña ñnyịn asio ke ekamba unọmọ, ayaanyʌñ amaana inyaaña ñnyịn. Ke anye, ke ñnyịn inie idodanyen ite ke anye ayaakaiso inyaaña ñnyịn, 11naña ndufo inwam ñnyịn ke mme akam ndufo. Ndin uwak awo eyaenọ ekọọm ke iwuod ñnyịn ke mfọn a-anye afọnnọ ye ñnyịn ato ñkpeubọk uwak awo.
Pọọl Akpəho Akikere
12Sia nduaak inua a-ñnyịn iduaha ado ami: Akikere esịd ñnyịn a-atie ntiense ke eduuwem ñnyịn ke ederimbod, akpan-akpan ke ewuana ñnyịn ye ndufo, a-adooho nnen-nnen ye ke akpanikọ abasi. Ñnyịn inyʌñ inam ntom, itooho ke ifiọk ederimbod, ado ato ke mfọn Abasi. 13Sia ñnyịn iwette ñkpọ se ndufo imiidiikanna idiọọñọ se awuọñọ. Ami mmenie idodanyen ke 14naña ndufo idiọọñọ ñnyịn ubaak-ubaak, eyaidiọọñọ ñnyịn ayọhọ-ayọhọ, nọ ato do ndufo ekan eduaak inua ibaña ñnyịn kpa naña ñnyịn idiiduaak inua ibaña ndufo ke usen Abọọñ Yisọs.
15Sia ami mmaakenie mbuọdidem mbaña ñkpọ ami, ñkeduak adibemiso ndise ndufo nọ ndufo ebọ mfọn akañ iba. 16Ami ñkeduak adidi ndise ndufo ke ini ñkaaha Masidonia ñnyʌñ mmaana ndikịt ndufo ke unyọñọ Masidonia, nọ ndufo edinnọ miin ñka Yudia. 17Ke ini a-ami ñkenamma akikere ami, me ñkenam anye mfefeere-mfefeere? Me ñkenam akikere ami ke ido ederimbod nọ ato do ke uyio keed ami mbo, “ii, ii,” ye “Iyoo, Iyoo?”
18Ado nte Abasi adooho anam akpanikọ, ikọ a-ñnyịn ikwọrọke inọọ ndufo idooho “Ii” ye “Iyoo.” 19Sia Ayịn Abasi, Yisọs Krais, a-ami ye Sailas#1:19 Ke usem Greek Silfanusasʌk ado Sailas ye Timoti ikikwọrọke ke atu ndufo, ikidooho “Ii” ye “Iyoo,” ado ke anye asʌk ado “Ii” afịd-afịd ini. 20Mme enwọñọ Abasi ekpewak naña ewawak ammọ edoñño “Ii” ke Krais. Ke ntoro, anyʌñ ato ke anye ñnyịn ibọọrọ “Amen” inọ Abasi ubọọñ. 21Ndin ado Abasi akenam ñnyịn ye ndufo isọọñọ ida ke Krais. Anye amaiyet ñnyịn adan, 22inịm ñnyịn idiọọñọ a-awọttọ ke anye inie ñnyịn, anyʌñ ayaak Sịbidịd amọ asịn ke esịd ñnyịn nte ñkpọ ubiọñ anọ se idiidi.
23Ami mmekoot Abasi mbo adido ntiense mmi, ñnyʌñ ntañ ke uwem mmi nte ke ami ñketre aditịmme ndi Kọrint mbaak ndinọọ ndufo mfịna. 24Idooho nte ñnyịn ikaakara mbuọdidem ndufo, ado ñnyịn inam utom ye ndufo nọ enie idadesịd, sia ke mbuọdidem ke ndufo eda ke ñkpad iba.
Currently Selected:
Udiana Ñwed Kọrint 1: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
