Akpa Ñwed Kọrint 16
16
Etịbe A-anieghe Ikọd Abasi
1Ndin ke abaña etịbe a-anieghe ikọd Abasi, inam se ñkebo mme ikọd Abasi ke mme ufọkabasi Kalesia enam. 2Ke akpa usen ke afịd udua, awo keedekeed akpena adiañña asaña-asaña akʌk anịm akeene se anye anie, abọọk anịm, nọ ado ami mmaadi, etịbe idiibaaha aba. 3Ndin, ami mmaadisịm, ñyaanọ mme awo se ndufo emek ñnyʌñ nnọ ammọ ñwed adiben ammọ ñwọt ye enọ ndufo nọ eben eka Yeruselem. 4Adieke anaaha nte ami ñkeene ñka, ammọ eyaeñkeene miin.
Mme Akpọ-akpọ Ebeeñe Mmi
5Ami mmaaboiyo nto Masidonia ndi, ami ñyaadise ndufo, sia ndiisaña mboiyo ke Masidonia. 6Akeme ido ami ñyaaba etək ye ndufo, akeme ido ñyaaba do afịd ini ekarika, nọ ndufo esịn unwam ennọ ke isañ mmi, ke itie akeedodo a-ami ñyemme adika. 7Ami ñyemme adidi usọp-usọp ñnyʌñ mboiyo; mmeyem adikpiba ñkpeene ye ndufo, ke Abasi anyịmmeke. 8Ado ami ñyaaba ke Efisọs tutu akem ini Pentikọs, 9sia ekamba usʌñ adinam eti utom a-abeere annọ, uwak awo ñko mmọdo e-ebeeñeke idem edimbiọñọ miin.
10Timoti akpedi, ikịt ibo ke anye inieghe ntak adikop ndịk ke ini anye abaaha ye ndufo, sia anye anam utom Abasi, kpa naña ami nnam. 11Ke awo ndomokeed asọọn anye. Isio anye unyọñ ke emem nọ anye atịmme ambịne miin. Nsʌk mbet anye ye mme nditọeka ke Krais mbon ako.
12Ndin ke abaña ayịneka ñnyịn Apọlọs, mmaanekke mbo yak anye ye nditọeka ke Krais edibịne ndufo. Anye ikinyịmmeke adika idahami, ado ayaakaa ufañ amaamaana aba.
13Iba ke ñkpemeidem, isọọñọ ida ke mbuọdidem, ido mbon uko; isọñ idem. 14Inam afịd ñkpọ ke ima.
15Ndufo emediọọñọ ke ufọk Stefanas ekedo mme akpa mbon e-ekekappake esịd ke Akaya, ndin ammọ emaewa idem asaña-asaña ke adinwam mme ikọd Abasi. Mmikpeiye ndufo nditọeka ke Krais nte 16esuuk iwuod enọ utọ ibon ami ye afịd awo se idian ubọk inam utom inyʌñ iwa idem. 17Mmaakop inemesịd ke ini Stefanas, Fọtunatus ye Akaikus ekedisịmme, sia ammọ emaeben se ikinana ñnyịn eto ndufo edi. 18Ammọ emaedemme sịbidịd mmi ye ake ndufo ñko. Utọ ibon ami edot ukpono.
Akpatre Ekọọm
19Mme ufọkabasi ke ikpeghe Esia enọ ekọọm isọk ndufo.
Akwila ye Prisila#16:19 Ke usem Greek Priskaasʌk ado Prisila e-enekke ikọọm ndufo ke Abọọñ, ukem ñko ye ufọkabasi a-asisooboke ke ufọk ammọ.
20Afịd nditọeka ideen ye ibaan ke Krais ke ukañ umi e-enọ ekọọm isọk ndufo.
Ikọọm emọ-emọ ye adisana ntʌminua.
21Ami Pọọl, ñwet ekọọm ami ke ubọk mmi.
22Adieke awo ndomokeed imiimaaha Abọọñ, yak esuuñọ utọ awo ado! Di, Abọọñ!
23Mfọn Abọọñ Yisọs Krais akpekam aba ye ndufo.
24Yak ima mmi aba ye afịd ndufo ke Krais Yisọs, Amen#16:24 Usʌk mme ikpañwed isịnne Amen.
Currently Selected:
Akpa Ñwed Kọrint 16: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
