Akpa Ñwed Timoti 3
3
Naña mme Adaaha Ufọkabasi Ekpedu Uwem
1Ikọ ami ado akpanikọ ke awo akeedodo ayemme ido etubom ufọkabasi ayem eti ñkpọ. 2Etubom ufọkabasi inaaha ado awo etañña idiọọk ikọ edian, ana ado ebe anwaan keed, anie mfarakeidem, akpono idem amọ, anie ukpono, ado awo a-atʌmmọ akama isenawo, anyʌñ ado eti andikpeeb. 3Inaaha ado awo inaam ukọd, idooho awo abom, ana a-asuuhọke idem, idooho awo awakka itọhọ utọk, inyʌññọ ido awo amaaha akʌk. 4Ana ado awo a-atʌmmọ akama ufọk amọ, anyʌñ akịt ke nditọ amọ e-ekop item enọ anye. Ndin ana anye anam ami ke edu a-awọttọ ayọhọ ukpono. 5(Adieke awo imiikanna ikama ufọk amọ, anye adiinam die ikan ikama ufọkabasi?) 6Anye inaaha ado ufa awo ke mbuọdidem, mbaak adikokko idem, ndin ato ke ado anye aduọ adʌk ukem ubiomikpe setan. 7Ñko, ana anye ado awo a-anieghe eti anyịñ ke atu mbon i-imiidiọọñọke Abasi, mbaak anye adibọ asuenne, adinyʌñ aduọ ke afia andidiọọk.
8Kpa ke ukem usʌñ ado, mme dikịn ñko ana edo mbon e-edotto ukpono, inaaha enie edeme ikọ iba, idooho mbon e-enwọññọ ukọd akpọsọñ, me mbon udọrọ itọñ akʌk. 9Ana ammọ emʌm ntotəño akpanikọ mbuọdidem ekama ye inwañ-inwañ eti esịd. 10Ana ebem iso eduuñọ ammọ diin ese, ndin adieke ammọ enanake ndo, a-ado se emek ammọ nte mme adaidaha.
11Ñko, ana ibaan edo mbon e-edotto ukpono, idooho mbon ñkeñ inua; ana ammọ ekama idem ke ufad, enyʌñ enam akpanikọ ke afịd ñkpọ.
12Adaidaha inaaha ama awonwaan mfen ke esiin, ndin ana anekke nditọ amọ ye afịd ufọk amọ akama. 13Mbon e-enamma utom nọ afọn ebọ asaña-asaña itooro ye ekamba uko ke mbuọdidem ammọ ke Krais Yisọs.
Ntak a-Pọọl Anọọhọ mme Ewʌhọ
14Akpesʌkado ami mmeduak adisọp nduse fiin, akena ami nsʌk ñwet mme ewʌhọ ami unọ fiin nọ ato do, 15adieke ami ñkpeeneke adidi, afo ayaadiọọñọ naña akpenaa mme awo edu uwem ke ufọkabasi, a-adooho ufọk aduuwem Abasi anyʌñ ado adaaha ye itiad idakisọñ akpanikọ. 16Mfaaña ndomokeed ibaaha, sia ndedịbe ñkpọ e-eti edu ukpono Abasi atooho awuọ akpon eti-eti.
Anye amaayaara idem amọ ke ikpọkidem,
etoppo anye ikpe ke Sịbidịd,
mme enyere emaekịt anye.
Emaekwọrọ anye ke atu mme idịd,
emaenịm anye ke akpanikọ ke ederimbod,
ndin emaeben anye edọọk ke ubọọñ.
Currently Selected:
Akpa Ñwed Timoti 3: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
