Akpa Ñwed Timoti 2
2
Nnọitem ke Abaña Ukpono Abasi
1Ke akpa ifed, ami mmekpeiye, yak enam ebeeñe, ye akam, ñkpeubọk ye ekọọm enọ afịd awo, 2enam enọ mme mbọọñ ye afịd mbon e-ebaaha ke ukara, nọ ato do ñnyịn inie emem ye ifuuro, inyʌñ idu adisana uwem nte nditọ Abasi. 3Ami afọn, anyʌñ ado se inem Abasi Andinyaaña ñnyịn esịd, 4a-ayemme afịd awo enie adinyaaña, enyʌñ enie ifiọk akpanikọ. 5Sia Abasi keed kpọd aba ye atie ubiọñ ke ufọọd Abasi ye awo, kpa Krais Yisọs, 6a-akeyakka idem amọ anọ nte ñkpọ ufak ke iwuod afịd awo. Ndin e-etie ntiense ebaña ami ke akemini. 7Ke ntak ami ke ekemmek miin asuanetob ye abọsịd; ntañ akpanikọ, nsʌhọke nsu. Ñko ami ndo andikpeeb nnọ mme Gentile ke akpanikọ ye mbuọdidem.
8Ke ntoro ami mmeyem ideen ebọñ akam ke afịd itie, ebenne ndisana ubọk ke anyọñ, idooho ke iyadesịd ye eniin. 9Ukem ado ñko, mmeyem ibaan esịne afọñ a-adotto ukpono anyʌñ anie uku, idooho ke adidọk ided me adisịne mme ñkpọ mbana idem me kold ye nsọñudua itiad mbanaidem, me ke adisịne nsọñudua afọñ, 10ado ke nti utom, a-adotto ye ibaan e-enyịmmeke ke mmimọ ikpono Abasi.
11Ñko, yak awonwaan akpeep ñkpọ ke ndobuyio ye nsuukidem. 12Ami ñyemme awonwaan ado andikpeeb, ñnyʌññọ ñyem awonwaan akara awodeen; ana awonwaan adodop uyio. 13Sia eketo ebot Adam ndin edibot Iif. 14Idooho Adam ke ekebiaña, ado awonwaan ke setan akebiaña, anyʌñ anam anye ado anam idiọọkñkpọ. 15Ado eyaenyaaña ibaan ke ntak uman ayịn, adieke ammọ ekaaha iso eba ke mbuọdidem, ima, adisana uwem ye mfadidem.
Currently Selected:
Akpa Ñwed Timoti 2: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
