Akpa Ñwed Kọrint 1
1
1Ami Pọọl, e-ekekoodo nọ adido abọsịd Krais Yisọs ato ke uduak Abasi ye ayịneka ñnyịn ke Krais Sostenes, 2inọọ ñwed ami esọk ufọkabasi ke Kọrint, ye mbon e-enamma esana ke Krais Yisọs, e-enyʌññọ ekoot nọ edido mme ndisana mbon amọ ye afịd awo ke afịd itie e-ekoodo anyịñ Abọọñ ñnyịn Yisọs Krais, Abọọñ ammọ ye ake ñnyịn. 3Mfọn ye emem a-atooho Abasi Ete ñnyịn ye Abọọñ Yisọs Krais akpekap ado udeeme ndufo.
Ekọọm
4Ami mmekọọm Abasi afịd ini inọ ndufo ato ke mfọn a-Abasi inọọhọ ndufo ato ke Krais Yisọs. 5Sia ato ke anye ndufo e-emọinyọ ke afịd usʌñ ke afịd aditañ ikọ ye ke afịd ifiọk, 6Abasi anyʌñ asọọñọ ntiense ñnyịn ke abaña Krais ke idem ndufo. 7Ke ntoro, ndufo inanake enọ Adisana Sịbidịd ndomokeed ke ini ndufo esʌkkọ ebet adiyaara Abọọñ ñnyịn Yisọs Krais. 8Anye ayaanyʌñ isọọñọ ndufo idem tutu asịm utịd nọ ato do ndufo ediinana ndo ke usen Abọọñ ñnyịn Yisọs Krais. 9Abasi a-akikoodo ndufo asịn ke ewuana ye Ayịn amọ Yisọs Krais Abọọñ ñnyịn ado anam akpanikọ.
Ubakka Nda ke Ufọọd mme Adaiwuod ke Ufọkabasi
10Ami mmedat anyịñ Abọọñ ñnyịn Yisọs Krais ikpe ndufo ubọk, nditọeka#1:10 Ke usem Greek adelfọi awuọñọke nditọeka awodeen ye awonwaan anyʌñ ada anọ mbon e-enịmme Krais ke akpanikọ, edoho ideen ye ibaan ke atu ubon Abasi; se ñko ke Rom 17:11 ye 26; ke Rom 2:1; Rom 3:1, Rom 4:6; Rom 6:8; Rom 7:24, 29; Rom 10:1; Rom 11:33; Rom 12:1; Rom 14:6, 20, 26, 39; Rom 15:1. 6, 50, 58; Rom 16:15, 20 ke Krais, nte yak afịd ndufo enyịmme ye emọ-emọ ke se ndufo etañ ye se enam, mbaak ubakka adiba ke atu ndufo, ado nọ ato do ndufo ediana keed ke esịd ye ke akikere. 11Nditọeka ke Krais, usʌk awo ke ufọk Klọ, endọkkọ miin ke utọk aba ke ufọọd ndufo. 12Se ami ntañ mbaña ado ke awo keed abo, “Ami ñkeene Pọọl; awo mfen ate, Ami ñkeene Apọlọs; awo mfen ate, Ami ñkeene Kefas; ñnwen ate, Ami ñkeene Krais.”
13Ado nte ebabakka Krais? Ado nte ekekọñ Pọọl ke krọs inọọ ndufo? Ado nte ekiduọk ndufo mmọọñ esịn ke anyịñ Pọọl? 14Ami mmekọọm Abasi ke ñkiduọkkọ awo ndufo ndomokeed mmọọñ ke imiibọhọke Krispus ye Kayọs, 15mbaak awo ndomokeed adibo ke ekiduọk ndufo mmọọñ ke anyịñ mmi. 16(Ii, ami mmaanyʌñ nduọk mbon ufọk Stefanas mmọọñ, ndin ke aboiyoke ado, ntoiyoke me mmaaduọk awo mfen mmọọñ.) 17Sia Krais ikindọññọ miin ibo ndiduọk mmọọñ ado akendọñ abo ndikwọrọ eti etob, itooho ke akpọsọñ aniọñ ye ndọọn, mbaak krọs Krais adinana adudu amọ.
Krais e-Ekekọññọ ke Krọs Ado Aniọñ ye Adudu Abasi
18Etob krọs ibaaha ufọn inọ mbon nsobo, ado ado adudu Abasi inọ ñnyịn mbon e-emaekenyaaña. 19Sia e-ewet ete:
“Ami ñyaasobo aniọñ mbon aniọñ;
ñyaatịmede mbufiọk mbon mbufiọk.”
20Mmọ awo aniọñ? Mmọ akpeeb mbed? Mmọ ataifiọk ayio mfịn? Nte Abasi inamma nọ aniọñ ederimbod ami akappa ado ndisịme? 21Sia adooho ke ifiọk Abasi, ederimbod ke ifiọk ammọ ikidiọọñọke anye, Abasi amaakop inemesịd ato ke ndisịme e-ekekwọrọke enyaaña mbon se inịm ke akpanikọ. 22Mme Yuu eyem idiọọñọ, mbon Greek eyem aniọñ, 23ado ñnyịn ikwọrọ Krais e-ekekọññọ ke krọs, a-adooho ñkpọ ubiọọñọ anọ mme Yuu, anyʌñ ado ndisịme anọ mme Gentile, 24ado mbon a-Abasi akoodo, mme Yuu ye mme Greek, Krais ado adudu Abasi ye aniọñ Abasi. 25Sia Abasi ke ndisịme amọ a-adiọọñọ ñkpọ akan awo aniọñ; mmemidem Abasi anyʌñ asọñ adudu akan adudu awo.
26Nditọeka ke Krais, ikere ibaña se ndufo ekedo mbemiso ekikoot ndufo. Uwak ndufo ikidooho mbon akpọsọñ aniọñ ke udomo ñkpọ awo; uwak ndufo ikidooho mme awuọiso awo; uwak ndufo ñko ikitooho ufọk ubọọñ imana. 27Ado Abasi amaamek mme ndisịme ñkpọ ederimbod nọ ato do asịn mbon aniọñ ke abuud; Abasi amek mmem-mmem ñkpọ ederimbod nọ ato do abuud amʌm awo uko. 28Abasi amaamek mme ñkpọ e-ebaaha ke usʌhọde itie ke ederimbod ye mme ñkpọ e-esịnne ke ndek, ye mme ñkpọ se imiibaaha, nọ ebiat mme ñkpọ se iba, 29mbaak awo ndomokeed adiduaak inua ke iso Abasi. 30Ke ntak amọ ke ndufo eba ke Krais Yisọs, a-amaakekappa ado aniọñ a-atooho Abasi inọ ñnyịn, a-adooho, adinenido, adisana ido ye ufak ñnyịn. 31Ke ntoro, nte naña ewet: “Yak awo a-aduaha inua aduaak ke Abọọñ.”
Currently Selected:
Akpa Ñwed Kọrint 1: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
