Mak 3
3
Ọshare rẹ Obọ rọye Ghwuru
(Matiu 12.9-14; Luk 6.6-11)
1Ọ da rhoma ro sinagọg, ohwo ọvo rẹ obọ rọye ghwuru hẹ etiyin. 2Ayen kẹ rhẹrẹ, sẹ o sivwo vwẹ ẹdidjala na, rere ayen vwọ mrẹ asan vwo gbeje. 3Ọ da ta kẹ ohwo rẹ obọ rọye ghwuru na, Vrẹn mudia vwẹ uherevie. 4Ọ da ta kẹ ayen, o fori re ru emu esiri vwẹ ẹdidjala, gbenẹ ọ ro mioma? Re vwo sivwi rhọ gbenẹ re vwo hwe? Ẹkẹvuọvo ayen de fotovwi. 5Ọke rọ vwọ vwẹ ophu ni ayen yariẹ ivun de miovwo fiki rẹ udu ọgangan rayen, ọ da ta kẹ ọshare na, Riẹn obọ wẹn. Ọ da riẹn obọ rọye obọ rọye de shehọ kerẹ ọ ro chekọ na.
6Siẹvuọvo na otu ri Farisi vẹ Herodian da ghwa yanran ra gba ẹguare obo rẹ ayen ru vwo hwe.
Urogho vwẹ Oma rẹ Abadi
7Jesu kugbe idibo rọye de si oma reyọ nẹ etiyin kpo obo abadi otu buebu ri nẹ Galili rhe de nene: i ri ji nẹ Judia rhe; 8nẹ Jerusalẹm rhe nẹ Idumia rhe, ji nẹ esamuo ri Jọdan, vẹ oma ri Taya vẹ Saidọn urogho rode ri vwo nyo emu ro ruru i de bro rhe. 9Ọ da ta kẹ idibo rọye nẹ, e jẹn omokọ otete vwọ kẹ ọye vwi fiki rẹ otu buebu na, ayen de rhe keke. 10Kidie o sivwi ihwo buebu ọtiọye na otu ri vwo emiavwe ejobi ki keke re ayen mrẹ asan vwẹ obọ te. 11Ọke rẹ irhi ri jẹfuọn vwọ mrẹ ayen de she vwọ hẹ obaro rọye kperi ta nẹ, wọwẹ hẹ ọmọ rẹ Ọghẹnẹ na. 12O da phẹphẹ ayen unu nẹ ayen tue ọye phia-a.
Jesu Sanọ Ihwivẹ na
(Matiu 10.1-4; Luk 6.12-16)
13O de yeri kpo enu rẹ ugbenu o de se otu rọ guọnọre; ayen de bro ra. 14Ọ da vwẹ ihwivẹ mu, rere ayen vẹ ọye dia, rere o vwo ji ayen re ghwoghwo ota na, 15rere ayen vwo vwo ogangan vwọ djẹ idẹbono phia; 16ihwivẹ na kẹ ẹna Saimọn ro seri Pita; 17Kugbe Jems ọmọ ri Zẹbidi, vẹ Jọn oniọvo ri Jems ọ de se ayen Boanajis otọ rọye, Emọ rẹ agbraran; 18kugbe Andru, kugbe Filip, kugbe Batalomiu, kugbe Matiu, kugbe Tọmọs, kugbe Jems ọmọ rẹ Aifiọs, kugbe Tadiọs, kugbe Saimọn ohwo ri Kenan, 19kugbe Judas Iskariọt, rọ shẹrẹ na. Ọ de kpo uwevwi;
Jesu vẹ Bẹlzibọb
(Matiu 12.22-32; Luk 11.14-23; 12.10)
20Otu buebu na da rhoma bro rhe ọtiọye na ayen gbe mrẹ asan da re emu-u. 21Ọke rẹ igbeyan rọye vwo nyo, ayen da yanran re shabọ phihọ; kidie ayen tare nẹ, ọ gbe riẹn oma rọye-e. 22Isiẹbe ri nẹ Jerusalẹm rhe da ta nẹ, o vwo Bẹlzibọb, kugbe ogagan rẹ ọmọ rẹ ovie rẹ idẹbono ọ vwọ djẹ idẹbono phia na. 23o de se ayen bro rhe, ọ da ta kẹ ayen vwẹ itẹ, Mavọ idẹbono sa vwo djẹ idẹbono phia? 24Ọ da dianẹ Uvie da ghare omaobọ rọye, uvie yena se mudia-a. 25Uwevwi da ghare omaobọ rọye uwevwi yena se mudia-a. 26Idẹbono de vrẹn họnrẹ omaobọ rọye ọ da ghare yẹ o vwo oba. 27Ohwo sa ro uwevwi rẹ ọgba ro de miovwo uwevwi rọye-e jokpa nẹ ọ ka gba ọgba na tavwe; kẹsiẹye o ki miovwo uwevwi rọye. 28Uyota Me ta kẹ ovwan, A vwẹ imwemwu ejobi ghovwo emọ rẹ ihwo kugbe ota rẹ ophọphọvwe rẹ ayen tare ejobi. 29Ẹkẹvuọvo kohwo kohwo rọ ta ota rẹ ophọphọvwe kpahe Erhi Ọfuanfon vwo evwoghovwo bẹdẹ-ẹ, ẹkẹvuọvo ayen reabe rẹ imwemwu ri bẹdẹ; 30Kidie ayen tare, O vwo erhi ro jẹfuọn.
Oni ri Jesu vẹ Iniọvo Rọye
(Matiu 12.46-50; Luk 8.19-21)
31Kọye oni rọye kugbe iniọvo rọye da rhe; rẹ ayen vwo mudia otafe, ayen de ji ikọn re se. 32Otu buebu tidia yariẹ phihọ; ayen da ta kẹ, Oni wẹn kugbe iniọvo wẹn mudia vwẹ obo otafe re guọnọ owẹ. 33Ọ da kpahe kẹ ayen nẹ, Ono hẹ oni mẹ kugbe iniọvo mẹ? 34Ro vwo ni ayen ri tidia yariẹ phihọ, ọ da ta, Oni mẹ kugbe iniọvo mẹ ena! 35Kohwo kohwo ro ru ọhọre rẹ Ọghẹnẹ ọye oniọvo mẹ rẹ ọshare kugbe ọ rẹ aye, kugbe oni mẹ.
Currently Selected:
Mak 3: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
Mak 3
3
Ọshare rẹ Obọ rọye Ghwuru
(Matiu 12.9-14; Luk 6.6-11)
1Ọ da rhoma ro sinagọg, ohwo ọvo rẹ obọ rọye ghwuru hẹ etiyin. 2Ayen kẹ rhẹrẹ, sẹ o sivwo vwẹ ẹdidjala na, rere ayen vwọ mrẹ asan vwo gbeje. 3Ọ da ta kẹ ohwo rẹ obọ rọye ghwuru na, Vrẹn mudia vwẹ uherevie. 4Ọ da ta kẹ ayen, o fori re ru emu esiri vwẹ ẹdidjala, gbenẹ ọ ro mioma? Re vwo sivwi rhọ gbenẹ re vwo hwe? Ẹkẹvuọvo ayen de fotovwi. 5Ọke rọ vwọ vwẹ ophu ni ayen yariẹ ivun de miovwo fiki rẹ udu ọgangan rayen, ọ da ta kẹ ọshare na, Riẹn obọ wẹn. Ọ da riẹn obọ rọye obọ rọye de shehọ kerẹ ọ ro chekọ na.
6Siẹvuọvo na otu ri Farisi vẹ Herodian da ghwa yanran ra gba ẹguare obo rẹ ayen ru vwo hwe.
Urogho vwẹ Oma rẹ Abadi
7Jesu kugbe idibo rọye de si oma reyọ nẹ etiyin kpo obo abadi otu buebu ri nẹ Galili rhe de nene: i ri ji nẹ Judia rhe; 8nẹ Jerusalẹm rhe nẹ Idumia rhe, ji nẹ esamuo ri Jọdan, vẹ oma ri Taya vẹ Saidọn urogho rode ri vwo nyo emu ro ruru i de bro rhe. 9Ọ da ta kẹ idibo rọye nẹ, e jẹn omokọ otete vwọ kẹ ọye vwi fiki rẹ otu buebu na, ayen de rhe keke. 10Kidie o sivwi ihwo buebu ọtiọye na otu ri vwo emiavwe ejobi ki keke re ayen mrẹ asan vwẹ obọ te. 11Ọke rẹ irhi ri jẹfuọn vwọ mrẹ ayen de she vwọ hẹ obaro rọye kperi ta nẹ, wọwẹ hẹ ọmọ rẹ Ọghẹnẹ na. 12O da phẹphẹ ayen unu nẹ ayen tue ọye phia-a.
Jesu Sanọ Ihwivẹ na
(Matiu 10.1-4; Luk 6.12-16)
13O de yeri kpo enu rẹ ugbenu o de se otu rọ guọnọre; ayen de bro ra. 14Ọ da vwẹ ihwivẹ mu, rere ayen vẹ ọye dia, rere o vwo ji ayen re ghwoghwo ota na, 15rere ayen vwo vwo ogangan vwọ djẹ idẹbono phia; 16ihwivẹ na kẹ ẹna Saimọn ro seri Pita; 17Kugbe Jems ọmọ ri Zẹbidi, vẹ Jọn oniọvo ri Jems ọ de se ayen Boanajis otọ rọye, Emọ rẹ agbraran; 18kugbe Andru, kugbe Filip, kugbe Batalomiu, kugbe Matiu, kugbe Tọmọs, kugbe Jems ọmọ rẹ Aifiọs, kugbe Tadiọs, kugbe Saimọn ohwo ri Kenan, 19kugbe Judas Iskariọt, rọ shẹrẹ na. Ọ de kpo uwevwi;
Jesu vẹ Bẹlzibọb
(Matiu 12.22-32; Luk 11.14-23; 12.10)
20Otu buebu na da rhoma bro rhe ọtiọye na ayen gbe mrẹ asan da re emu-u. 21Ọke rẹ igbeyan rọye vwo nyo, ayen da yanran re shabọ phihọ; kidie ayen tare nẹ, ọ gbe riẹn oma rọye-e. 22Isiẹbe ri nẹ Jerusalẹm rhe da ta nẹ, o vwo Bẹlzibọb, kugbe ogagan rẹ ọmọ rẹ ovie rẹ idẹbono ọ vwọ djẹ idẹbono phia na. 23o de se ayen bro rhe, ọ da ta kẹ ayen vwẹ itẹ, Mavọ idẹbono sa vwo djẹ idẹbono phia? 24Ọ da dianẹ Uvie da ghare omaobọ rọye, uvie yena se mudia-a. 25Uwevwi da ghare omaobọ rọye uwevwi yena se mudia-a. 26Idẹbono de vrẹn họnrẹ omaobọ rọye ọ da ghare yẹ o vwo oba. 27Ohwo sa ro uwevwi rẹ ọgba ro de miovwo uwevwi rọye-e jokpa nẹ ọ ka gba ọgba na tavwe; kẹsiẹye o ki miovwo uwevwi rọye. 28Uyota Me ta kẹ ovwan, A vwẹ imwemwu ejobi ghovwo emọ rẹ ihwo kugbe ota rẹ ophọphọvwe rẹ ayen tare ejobi. 29Ẹkẹvuọvo kohwo kohwo rọ ta ota rẹ ophọphọvwe kpahe Erhi Ọfuanfon vwo evwoghovwo bẹdẹ-ẹ, ẹkẹvuọvo ayen reabe rẹ imwemwu ri bẹdẹ; 30Kidie ayen tare, O vwo erhi ro jẹfuọn.
Oni ri Jesu vẹ Iniọvo Rọye
(Matiu 12.46-50; Luk 8.19-21)
31Kọye oni rọye kugbe iniọvo rọye da rhe; rẹ ayen vwo mudia otafe, ayen de ji ikọn re se. 32Otu buebu tidia yariẹ phihọ; ayen da ta kẹ, Oni wẹn kugbe iniọvo wẹn mudia vwẹ obo otafe re guọnọ owẹ. 33Ọ da kpahe kẹ ayen nẹ, Ono hẹ oni mẹ kugbe iniọvo mẹ? 34Ro vwo ni ayen ri tidia yariẹ phihọ, ọ da ta, Oni mẹ kugbe iniọvo mẹ ena! 35Kohwo kohwo ro ru ọhọre rẹ Ọghẹnẹ ọye oniọvo mẹ rẹ ọshare kugbe ọ rẹ aye, kugbe oni mẹ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.