Mak 16
16
Evrẹnushi Ri Jesu
(Matiu 28.1-10; Luk 24.1-12; Jọn 20.1-10)
1Ọke rẹ ẹdidjala vwọ wan nu, Meri ri Magdala, vẹ Meri oni ri Jems kugbe Saiomi, da dẹ erọvwọ ri gbo ọnrhe ororo, rere ayen ra vwẹ ayen ghworo. 2Irhiọke rhirhi vwẹ ẹdẹ rẹsosuọ rẹ ẹdidjala na ayen da yanran kpo obo ushi na rẹ ọnre vwọ varhe nu. 3Ayen ke ta kẹ ohwohwo, Kono ri che ghorie oragha na nẹ unu rẹ ushi na kẹ avwanre? 4Rẹ ayen vwo ni enu ayen da mrẹ oragha na re e ghorie no nure. kidie ọ rhoro gangan. 5Rẹ ayen vwọ ro evun rẹ ushi na, ayen da mrẹ emeghene ọvo ro tidia vwẹ obọrhe, o ku ewun ọfuanfọn phihọ; o de gbe ayen unu. 6Ọ da ta kẹ ayen, E jo gbe ovwan unu-u Jesu ri Nazarẹt, ra kanre mu agbagba na ovwan guọnọ. O vrẹnre ọ hẹ etinẹ-ẹ. ni asan re muro phihọ! 7Ẹkẹvuọvo wa yanran, ra ta kẹ idibo rọye kugbe Pita nẹ, Ọ karo kẹ ovwan kpo obi Galili re. oboyi ovwan da cha mrẹ, kirobo rọ ta kẹ ovwan jovwo. 8Ayen da yan phia ayen da djẹ nẹ
asan ushi na; kidie uguegue ve igbevwunu mu ayen, ayen ta ota kẹ ohwo ọvuọvo-o; kidie oshọ mu ayen.
Jesu vwẹ Oma phia kẹ Meri ri Magdala
(Matiu 28.9-10; Jọn 20.11-18)
9Asakiephana ri Jesu vwo vrẹn vwẹ urhiọke rhirhi vwẹ ẹdẹ rẹsosuọ rẹ ẹdidjala na; ọ da ka vwẹ oma phia ke Meri ri Magdala rọ djẹ idẹbono ighwrẹ nu na. 10Ọ da yanran ra ta kẹ ayen otu re vẹ ọye gba dia vẹrhe, rẹ ayen vwo muomahọ je viẹ. 11Ẹkẹvuọvo ọke rẹ ayen vwo nyo nẹ ọ jẹ hẹ akpọ nẹ ọye mrẹrẹ, ayen seregbuyota-a.
Jesu vwẹ Oma phia kẹ Idibo Ivẹ
(Luk 24.13-35)
12Re ọna vwo wan nu. Ọ da vwẹ oma phia vwẹ oghẹre ọfa kẹ ivẹ vwẹ usun rẹ ayen rẹ ayen vwọ yan, kpo obo orho na. 13Ayen de rhivwi ra ta kẹ otu ri chekọ. dede na ayen ji segbuyota-a.
Jesu vwẹ Ogangan kẹ Uhwọvo na
(Matiu 28.16-20; Luk 24.36-49; Jọn 20.19-23; Iruo rẹ Iyinkọn na 1.6-8)
14Ukuko rọye ọ da vwẹ oma phia kẹ uhwọvo na rẹ ayen vwo tidia vwẹ udoemu; ọ da ghwọ ku ayen fiki ri jesegbuyota rayen kugbe udu ọgangan rayen, kidie ayen se otu re mrẹrẹ ro vwo vrẹn nu na gbuyota-a. 15Ọ da ta kẹ ayen, Ovwan yanran ro akpọ na ejobi, re ghwoghwo iyẹnrẹ esiri na ke ema na ejobi. 16Ohwo ro seregbuyota ọ da reyọ ame ọ cha rhọ; ẹkẹvuọvo ọ ro seregbuyota-a cha reabe. 17Eka nana ki nene otu ri segbuyota. ayen vwẹ odẹ mẹ djẹ idẹbono phia; ẹrenvwe ekpokpọ e cha vwọ ta ota; 18ayen mu eredekọ, ayen da da obi kobi dede, i che se ru ayen emu ọvo-o; ayen ghwẹ abọ kpahe otu re hovwan, oma rẹ ayen ki kpo.
Eyere kpenu na
(Luk 24.50-53; Iruo rẹ Iyinkọn na 1.9-11)
19Eriyin rẹ Ọrovwori Jesu, vwọ ta ota kẹ ayen nu, a da reyọ kpenu kpo odjuvwu, o de tidia vwẹ obọrhe rẹ Ọghẹnẹ. 20Ayen da yanran, re ghwoghwo ota na vwẹ asan ejobi, Ọrovwohwo de nene ayen ru iruo, ọ da vwẹ eka nene ota na re o vwo ruo gan. Isẹ.
Currently Selected:
Mak 16: UBV77
Highlight
Copy
Compare
Share
Want to have your highlights saved across all your devices? Sign up or sign in
Bible in Urhobo © United Bible Societies, 1977.
