Mak 15
15
A vwi Jesu mudia vwẹ Obaro ri Pailet
(Matiu 27.15-26; Luk 23.13-25; Jọn 18.28-38)
1Rẹ urhiọke ghwe vwo te ilori rẹ irherẹn kugbe ekpako vẹ isiẹbe kugbe ediaguare na da ghwa jẹ iroro kugbe, ayen da gba Jesu, ayen de suo yanran vwo rhe Pailet. 2Pailet da nọ, Wẹ ghine ovie ri Ju na? Ọ da kpahe kẹ, Wẹ re ta ọtiọye. 3Ilori rẹ irherẹn de mu emu buebu barọ. 4Pailet da rhoma nọ, Wọ mrẹ obo wọ kpahe-e? gbe nighe emu buebu rẹ ayen mu bare owẹ. 5Ẹkẹvuọvo Jesu je kpahe emuọvo-o, vwẹ ọtiọye na o de gbe Pailet unu.
Ebrorhiẹ rẹ Ughwu hwe Jesu
(Matiu 27.15-26; Luk 23.13-25; Jọn 18.39–19.16)
6Asakiephana vwẹ asan orẹ na o siobọ nẹ ohwo ọvo vwẹ uwodi na kẹ ayen jovwo rẹ ayen nọ ekpẹn rọye. 7Vwẹ usun rẹ ihwo ri gbe ozighi re mu phihọ uwodi na, ozighẹ ọvo herọ rọ so ota, re se Barabas. 8Otu buebu na de tue rhe ayen da ta kẹ Pailet nẹ o ru obo ro ruẹ jovwo na kẹ ayen. 9Pailet da kpahe kẹ ayen, Ovwan guọnọre ni mi siobọ nẹ ovie ri Ju na kẹ ovwan? 10Kidie ọ riẹnre nẹ fiki rẹ omaẹriọ ọye ilori rẹ irherẹn na vwo muo rhe. 11Ẹkẹvuọvo ilori rẹ irherẹn na da ha otu na phihọ, re o siobọ nẹ Barahas kẹ ayen. 12Pailet da rhoma kpahe ta kẹ ayen, Komavọ mi ru ọ rẹ ovwan se Ovie ri Ju na? 13Ayen da rhoma kperi, Kanrọ mu agbagba. 14Pailet da ta kẹ ayen, Didi emu omiomiovwi o ruru? Ayen da yan kperi gangan, Kanrọ mu agbagba. 15Ri Pailet, vwọ guọnọ nẹ ọye ru obo ri je ihwo na kẹ ayen; o de siobọ nẹ Barabas kẹ ayen, rọ vwọ fa Jesu nu, ọ da vwọ kẹ ayen ra kanre mu agbagba.
Isodje na vwi Jesu Jehwẹ
(Matiu 27.27-31; Jọn 19.2-3)
16Isodje na de suo yanran kpo ọguan, (re se Pritoriọm); ayen de se isodje na ejobi koko. 17Ayen de ku ewun ọvwavware phihọ oma, ayen de me erhu rẹ inwe vwo tughẹ; 18ayen ki yere, Do, Ovie ri Ju! 19ayen da vwẹ ọghọrọgbọdọ teyọ uyovwi, ayen de dje enya kuo ayen de diguẹ vwẹ obaro rọye ayen da ga. 20Rẹ ayen vwọ vwọ jẹ ehwẹ nu, ayen de si ewun ọvwavware na no ma, ayen de ku ewun rọye phihọ oma. Ayen de suo yanran ra kanre mu agbagba.
Ẹkanrọ Mu Agbagba na
(Matiu 27.32-44; Luk 23.26-43; Jọn 19.17-27)
21Ayen da gba ohwo ọvo rọ wan vrẹn, Saimọn ohwo ri Sairini, ọsẹ rẹ Alẹkzanda vẹ Rufọs, ro nẹ obo orho cha, re o nene ghwa agbagba royẹ. 22Ayen da vwọ rhe asan re se Gọlgọta otọ rọye, Asan rẹ ekpehre uyovwi. 23Ayen da vwẹ wain ra vwẹ adjija gua kẹ nẹ ọ da; ẹkẹvuọvo ọ darọ-ọ. 24Ayen da kanrọ mu agbagba, ayen da ghare ewun rọye vwe ohri rẹ ayen, ayen da vwe ayen duvwu itẹ, re ayen vwọ riẹn uche ro te ohwo ọvuọvo. 25o vwo te unọke rerha, ayen da kanrọ mu agbagba. 26Ayen de si obo re vwo muo phihọ enu rọye nẹ, OVIE RI JU. 27Ayen da kanre igbulegbu ivẹ mu agbagba kugbe; ọvo hẹ obọrhe rọye, ọrivẹ hẹ obọhwẹre rọye.
28Ebẹ ọfuanfon re siri da gba nẹ, e kere kugbe iruimwemwu.
29Otu re wan vrẹn da vwọ jẹ ehwẹ, kpogho uyovwi rayen, nẹ Eghwo! wẹ rọ guọghọ uwevwi rẹ ẹga na ọ me bọn ẹdẹ erha na, 30gbe sivwi oma wẹn, rere wo wotọ nẹ agbagba na rhe. 31Eriyin na rhe ilori rẹ irherẹn kugbe isiẹbe na je vwọ jẹ ehwẹ vwẹ ohri rẹ ayen ta nẹ, Osivwi ihwo efa; yo se sivwi oma rọye-e. 32Gbe jẹn Kristi na, Ovie rẹ Izrẹl na, wotọ nẹ agbagba na rhe, rere avwanre mrẹ vwo segbuyota. Otu ra kanre mu agbagba kugbe na je vwọ jẹ ehwẹ.
Ughwu ri Jesu
(Matiu 27.45-56; Luk 23.44-49; Jọn 19.28-30)
33Re unọke esan rhi vwo te, ebri de rhi mu vwẹ otọ na ejobi rhiri ri te unọke irhiri. 34Rẹ unọke irhiri vwo te. Jesu de kperi urhuru gangan, Eloi, Eloi lama sabaktani? ra fan otọ rọye nẹ, Ọghẹnẹ mẹ, Ọghẹnẹ mẹ, Die jabọ wọ vwọ sen vwẹ? 35Inughe ri mudia vwẹ etiyin, vwo nyo, ayen da ta, Nighe, o se Ilaija. 36Ọvo da djẹ, ra reyọ ahworhẹ orisẹ duvwu phihọ viniga, o de dje phihọ ọghọrọgbọdọ, ọ da vwọ kẹ nẹ ọ da tanẹ, Mudia, e jẹn avwanre ni sẹ Ilaija ghine rhe rhe reyọ rhe otọ. 37Jesu de kperi urhuru gangan o de phi ẹnwẹn họ. 38Amwa ra vwọ tan uwevwi rẹ ẹga na da bẹre ẹbẹre ivẹ nẹ enu re duvwu otọ. 39Ọke rẹ Sẹnturiọn, ro mudia hirhe aro kuo, vwọ mrẹ ro phi ẹnwẹn họ nure, ọ da ta, uyota ohwo nana ghine Ọmọ rẹ Ọghẹnẹ. 40Eya evo herọ vwẹ usun rayen ri no vwẹ ugboko; Meri ri Magdala kugbe Meri oni ri Jems rẹ orere vẹ Josis, kugbe Saiomi. 41I ri nenire vwẹ ọke rọ vwọ hẹ obi Galili, ri gbe odibo kẹ; te eya efa buebu re vẹ ọye gbe yeri kpo Jerusalẹm.
Esho ri Jesu
(Matiu 27.57-61; Luk 23.50-56; Jọn 19.38-42)
42Ọke rẹ ovwọnvwọn vwo te re, rọ vwọ dia ẹdẹ rẹ Ọmaẹcha, kọye hẹ ẹdẹ rọ wan nẹ kẹ ẹdidjala. 43Josẹf ohwo rẹ Arimatia, ọdjaguare re mu ọghọ kẹ o ji rhẹro rẹ uvie rẹ Ọghẹnẹ na, da yan rhe vẹ aroeyivwo bru Pailet, ra yare orivwi ri Jesu.
44Ọ de gbe Pailet unu se o ghine ghwu nure; o de se Sẹnturiọn na, ọ da nọ so ghine ghwu nure. 45Rọ vwọ riẹn vwẹ obo ri Sẹnturion na nu, ọ da vwẹ orivwi na kẹ Josẹf. 46Ọ da dẹ ukpoyibo ro vwo muo te otọ, ọ da vwẹ ukpoyibo na pharọ, o de muo phihọ ushi ra tọnre phihọ evun rẹ oragha o de ghorie oragha nyẹ unu rẹ ushi na. 47Meri ri Magdala kugbe Meri oni ri Josis da mrẹ asan re shiro phihọ.
Currently Selected:
Mak 15: UBV77
Highlight
Copy
Compare
Share
Want to have your highlights saved across all your devices? Sign up or sign in
Bible in Urhobo © United Bible Societies, 1977.
