Luk 11
11
Uyono hpaho Ẹrhovwo
(Matiu 6.9-15; 7.7-11)
1Kọ nẹ ẹrhovwo vwẹ asan ọvo, ro vwo fue ẹrhovwo nure, odibo rọye ọvo da ta kẹ, Ọrovwohwo yono avwanre obo ra nẹ ẹrhovwo, kirobo ri Jọn yono idibo rọye. 2Ọ da ta kẹ ayen, Ovwan da nẹ ẹrhovwo, ovwan ta, Ọsẹ, jẹ avwanre vwẹ ọghọ kẹ odẹ wẹn, jẹ uvie wẹn rhe. 3Kẹ avwanre emu ri kẹdẹ kẹdẹ; 4vwẹ imwemwu rẹ avwanre ghovwo avwanre, kirobo ri me vwo ghovwo otu ri gbe avwanre ku; Wo si avwanre ro odavwini-i.
5Ọ da ta kẹ ayen, Ono vwẹ usun rẹ ovwan na ro vwo ugbeyan ro de bro ra vwẹ uherevie ason rọ da ta kẹ, Oko, momo ikara erha kẹ vwẹ; 6Kidie ugbeyan mẹ ro nẹ asan cha rhi wo vwe, Me gbe mrẹ emu vwọ kẹ-ẹ; 7kọ dia evun rẹ uwevwi da kpahe kẹ, Wo kpokpo uvwe-e; Me kanre ẹchẹ nure, emọ mẹ vẹ ovwẹ shevwerhẹ ehwa; mi gbi se vrẹn vwọ kẹ wẹ-ẹ? 8Me ta kẹ wẹ, dede nẹ o se vrẹn rọ da kẹ emuọvo-o fikiridie ugbeyan rọye o ruẹ, ẹkẹvuọvo fiki robo rọ vwọ djẹ ovwerhẹ na, ko vrẹn vwọ kẹ kirobo rọ guọnọre. 9Me ta kẹ wẹ, Nọ, ka vwọ kẹ wẹ; guọnọ, ko wọ mrẹ; hworo, ke rhie kẹ wẹn. 10Kidie ohwo kohwo rọ nọre ko vwo, ọ rọ guọnọre kọ mrẹ, ọ ro hwori ke rhie kẹ. 11Didi ọsẹ vwẹ ohri rẹ ovwan, rẹ ọmọ rọye da nọ ekpẹn rẹ eri, rọ da vwẹ ọrọdekọ kẹ vwẹ ẹdia rẹ eri, 12eyẹ rọ da nọ ekpẹn rẹ ukẹn, rọ da vwẹ akpakpasimagha kẹ? 13Ọ da dianẹ, wẹ rẹ ohwo umwemwu, da riẹn obo ra vwẹ emu oyoyovwi kẹ emọ wẹn, komavọ ọ rho te rẹ ọsẹ robo odjuvwu sa vwẹ Erhi Ọfuanfon kẹ otu re nọrọ?
Jesu vẹ Bẹlzibọb
(Matiu 12.22-30; Mak 3.19b-27)
14Asakiephana kọ djẹ erhi rẹ idẹbono ro diunu; rẹ idẹbono na vwo no nure, odiunu na da ta ota, o de gbe ihwo na unu. 15Ẹkẹvuọvo ẹvo da ta, Ogangan rẹ Bẹlzibọb, onotu rẹ idẹbono, ọ vwọ djẹ idẹbono phia, 16efa ghwa davwọ nẹ, nẹ ọ vwẹ oka nẹ odjnvwa rhe. 17Ẹkẹvuọvo rọ vwọ riẹn iroro rayen, ọ da ta kẹ ayen, Kuvie kuvie rọ ghare vwọ so omaobọ rọye kọ ghwọrọ, uwevwi she teye uwevwi. 18Ọ da dianẹ Idẹbono vwọ so omaobọ rọye, komavọ uvie rọye se vwo mudia? Kidie ovwan ta nẹ ogangan ri Bẹlzibọb Me vwọ djẹ idẹbono. 19Ọ da tobọ dianẹ ogangan ri Bẹlzibọb me vwọ djẹ idẹbono, kẹ ogangan rẹ ono emọ rẹ ovwan vwọ djẹ ayen phia? Fiki rẹ ọtiọye na ovwan ọvo gbe brorhiẹ yena. 20Ẹkẹvuọvo kẹ ogangan rẹ Ọghẹnẹ me vwọ djẹ idẹbono, yẹ uvie rẹ Ọghẹnẹ bru ovwan rhe nure 21Ọke rẹ ọgba, rọ nabọ choma, da rhẹrẹ ighẹn rọye, oma ko fu eyere rọye; 22ẹkẹvuọvo ohwo rọ goma nọ de bro rhe ro de phio kparobọ, kọ ka ghwa ekuakua rẹ ofovwi rọ vwẹ ẹro so na reyọ tavwe, rọ ke kua eyere rọye kpo. 23Ohwo rọ vẹ ovwẹ hẹ obọ-ọ yọ vwọ so vwẹ, ohwo rọ vẹ ovwẹ ghwẹ koko-o yọ hra.
Ehirhe cha rẹ Erhi ro Jẹfuọn
(Matiu 12.43-45)
24Ọke rẹ erhi ro jẹfuọn de nẹ evun rẹ ohwo, ko suosuo wan asan ọyaya rẹ ame epha-a ro de rovwo oma; ọ rha mrẹ-ẹ kọ ta, Mi rhivwi kpo uwevwi mẹ ri mi nurhe. 25Ọke rọ da rhe rọ mrẹrẹ re hwerhe fia a nabọ rhuẹrẹ phihọ. 26Kọ rhoma ọ me ra reyọ erhi ighwrẹ re bra nọ ekpuyovwi rọye, ayen me ro evun rọye ra dia etiyin; akpọ rẹ ohwo na ukuko na mi rhi miovwi nọ ọ rẹsosuọ.
Ebruba rẹ Uyota
27Rọ vwọ ta ọnana re, aye ọvo vwẹ evun rẹ otu na da kpare unu ọ da ta kẹ, Ebruba kẹ evun ro vwiẹ wẹ, kugbe evie ru wo vieri! 28Ẹkẹvuọvo ọ da ta, Ofori wọ vwọ ta, Ebruba kẹ ihwo ri nyo eta rẹ Ọghẹnẹ re da yọnrọn.
Orua Umwemwu Guọnọ Oka
(Matiu 12.38-42; Mak 8.12)
29Ọke re otu na vwo buẹ phihọ, ko muhọ ẹta, Uvwiẹ nana uvwiẹ umwemwu; ọ guọnọ oka, ẹkẹvuọvo a cha kẹ oka-a jokpa rẹ oka ri Jona. 30Kidie obo ri Jona dia oka kẹ ihwo ri Ninive, ọtiọye ọmọ rẹ ohwo je cha dia kẹ uvwiẹ nana. 31Ovie aye rẹ Obuko ọnre che vrẹn vwọ ihwo rẹ uvwiẹ nana guẹdjọ ro de bru hwe ayen; kidie o nẹ obo oba rẹ akpọ na rhe rhi nyo aghwanre ri Solomọn, gbe nighe, emuọvo rọ rhonọ Solomọn hẹ etinẹ. 32Ihwo ri Ninive cha vwẹ uvwiẹ nana guẹdjọ re de bru hwe; kidie ayen kurhẹriẹ vwẹ eghwoghwo ri Jona, gbe nighe, emuọvo rọ rhonọ Jona hẹ etinẹ.
Urhukpẹ rẹ Oma na
(Matiu 5.15; 6.22-23)
33O vwo ohwo rọ vwẹ urhukpẹ rhu nu ro de phio phihọ eghogho eyẹ otọ rẹ ikuru-u, ẹkẹvuọvo enu rẹ ogburhukpẹ, rere otu re ro uwevwi na sa vwọ mrẹ orẹ. 34Ẹro wẹn ọye hẹ urhukpẹ rẹ oma wẹn; ẹro wẹn da hẹ ọkpokpọ, oma wẹn ejobi kọ vọn vẹ orẹmrẹ; ẹkẹvuọvo ọ rha dia ọkpokpọ-ọ, oma wẹn kọ vọ vẹ ebri. 35Fiki rẹ ọtiọye na gba jẹ omaotọ rere orẹmrẹ wẹn vwo jẹ ebri ẹdia. 36Ọ da dianẹ oma wẹ ejobi vọnre vẹ orẹmrẹ, abọvo rhe bi-i, kọ riẹn la, kẹrẹsiẹ ra da vwẹ urhukpẹ rọ riẹn la mrẹ orẹ.
Jesu sen Ihwo ri Farisi vẹ Ẹriẹn urhi na
(Matiu 23.1-36; Mak 12.38-40; Luk 20.45-47)
37Rọ vwọ ta ota na, Farisi ọvo de se re emu; o de bro ra ayen da tidia udoemu. 38Ri Farisi na vwọ mrẹ o de gbe unu kidie ọ ka hworhẹ obọ tavwe rọ ke re emu-u. 39Ọrovwohwo da ta kẹ, Asakiephana ovwan Farisi hworhẹ obuko rẹ uko kugbe ọsete, ẹkẹvuọvo yẹ obo evun rẹ ovwan vọnre vẹ ọghware kugbe uvun-umwemwu. 40Wẹ ẹkpa na, ọ dia ohwo ọvuọvo rọ ma obuko na re je ma obo evu-un? 41Ẹkẹvuọvo dia obo evun wẹn de ru ẹse; gbe nighe, emu na ejobi kọ fon kẹ wẹ.
42Ẹkẹvuọvo ekan kẹ ovwan Farisi! Kidie wa hwa ẹkẹnhwe rẹ orhọ rẹ enẹ vẹ eka kugbe ifọ, we mi gbobọnyẹ ọsoso kugbe ẹguọnọ rẹ Ọghẹnẹ; ena ri fo obo ru we ru jovwo, we rhe gbobọnyẹ efa-a. 43Ẹkan kẹ ovwan Farisi ! kidie asan ro me yovwi vwi Sinagọg wa guọnọ tidia kugbe uyere rẹ afieki. 44Ekan kẹ ovwan ! kidie ovwan họhọ ishi re jẹ mrẹ, ihwo re yan wan enu rẹ ayen rha riẹ-ẹn.
45Ọvo vwẹ usun re ẹriẹn urhi na da kpahe kẹ. Oyono, wọ vwọ ta ọnana na avwanre ejobi wo di muẹ harha na. 46Ọ da ta, Ekan je kẹ ovwan ẹriẹn urhi nai! kidie ovwan kru eghwa ehọhọhọ re bẹn ẹghwa nyẹ ihwo efa, ẹkẹvuọvo wa vwẹ urhiabọ ọvo rẹ ovwan dede vwo te-e. 47Ekan kẹ ovwan! kidie ovwan tọn ushi rẹ emraro na rẹ esẹ rẹ ovwan hweri. 48Ọtiọye na ovwan kẹ iseri wa je rhọvwe phihọ uruemu rẹ esẹ rẹ ovwan; kidie ayen hwe ayen, ovwan da tọn ushi rayen. 49Kọye Aghwanre rẹ Ọghẹnẹ vwọ ta, Mi ji emraro na rhe ayen kugbe iyinkọn ayen hwe ẹvo vwọ ayen mu ẹvo, 50rere ọbara rẹ emraro na, re sun te otọ nẹ ọke rẹ akpọ vwọ mama rhe, ka nọ ekpẹn rọye vwẹ obọ rẹ uvwiẹ nana, 51nẹ ọbara rẹ Ebẹl re te ọbara ri Zakaraya, ro ghwuru vwẹ uvwre rẹ agbada vẹ ẹshẹ. Uyota me ta kẹ wẹ, ka nọ ekpẹn rọye vwẹ obọ rẹ uvwiẹ nana. 52Ekan kẹ ovwan erianriẹn na; ekpuyovwi rẹ ovwan ro uwevwi-i, yẹ ihwo re rha ruọ wa da ayen ji.
53Rọ vwọ yan nẹ etiyin re, isiẹbe kugbe Farisi ke nẹrhẹ phihọ ota gangan rere ọ ta ota buebu kẹ ayen, 54ayen ke rhẹrẹ, re ayen nyo obo rọ cha ta.
Currently Selected:
Luk 11: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.