Hosia 1

Aye ri Hosia rẹ Ọvwọfanrhiẹ Kugbe Emọ Rọye

1Ota rẹ Ọrovwohwo de bru Hosia rẹ ọmọ ri Beri rhe, vwẹ ọke rẹ Uzzia, Jotam, Ehaz kugbe Hẹzikaya, ivie ri Juda, kugbe ọke ri Jeroboam rẹ ọmọ ri Joash, ovie rẹ Izrẹl.

2Ọke rẹ Ọrovwohwo vwo ka wa oma ri Hosia ta ota, Ọrovwohwo da ta kẹ Hosia, Yanran wọ ra rọvwọ igberadja wo vwiẹ emọ rẹ igberadja, fikiridie ihwo na gbe ọfarhiẹ rode rẹ ayen vwọ sen Ọrovwohwo. 3Ọye ọ da yanran ra reyọ Goma rẹ ọmọtẹ ri Diblam, ọ da mrẹ evun ọ de vwiẹ ọmọshare.

4Ọrovwohwo da ta kẹ, se odẹ rọye Jezrẹl, vwẹ ọmọke emerha, ke me cha vwẹ oja rẹ uwevwi ri Jehu fiki rẹ ọbara ri Jezrẹl, uvie rẹ uwevwi rẹ Izrẹl kọ vwo oba. 5Vwẹ ẹdẹ yena ki mi vwirhi umurhabọ rẹ Izrẹl na vwẹ iyara ri Jezrẹl.

6Ọ vwọ rhoma mrẹ evun o de vwiẹ ọmọtẹ. Ọrovwohwo da ta kẹ, Se odẹ rọye Ovwo-ehrọre-e, fikiridie me gbe cha re ehrọre rẹ uwevwi rẹ Izrẹl ọfa-a, mi che vwo ghovwo ayen kakaka-a. 7Ẹkẹvuọvo me re ehrọre rẹ uwevwi ri Juda, ki mi sivwi ayen vwẹ oma rẹ Ọrovwohwọ rẹ Ọghẹnẹ rayen, Me vwẹ umurhabọ sivwi aye-en, eyẹrẹ ọlọkọ, eyẹrẹ ofovwi eyẹrẹ Iyesi, eyẹrẹ ihwo re gua iyesi.

8Ọke re vwo bru Ovwo-ehrọre-e evie nu, ọ da mrẹ evun ọ de vwiẹ ọmọshare. 9Ọrovwohwo da ta, se odẹ rọye Ọdia-ihwo-mẹ-ẹ, fikiridie ovwan dia ihwo mẹ-ẹ, Me je dia Ọghẹnẹ wẹ-en.

10Ihwo rẹ Izrẹl cha dia kerẹ ehavwo rẹ urhie ra sa vwavwe-e eyẹ e se keri-i, vwẹ asan rẹ a da ta kẹ ayen nẹ, Ovwan dia ihwo mẹ-ẹ, ka je ta kẹ ayen nẹ, Ovwan emọ rẹ Ọghẹnẹ ri bẹdẹ na. 11Te ihwo ri Juda vẹ ihwo rẹ Izrẹl ka ghwẹ ayen koko, kẹ ayen vwẹ ohwo ọvo mu osun kẹ oma rayẹn, kẹ ayen yan nẹ otọ na, fikiridie ẹdẹ ri Jezrẹl cha rho gangan.

Currently Selected:

Hosia 1: UBV77

Highlight

Copy