Ẹyano 12
12
Ewanvrẹn
1Ọrovwohwo da ta kẹ Mosis vẹ Erọn vwẹ otọ rẹ Ijipt. 2Emeranvwe nana kọ cha dia ẹtuọhọ rẹ emeranvwe, kọ cha dia emeranvwe rẹ esosuọ vwẹ ukpe na kẹ wẹ. 3Ta kẹ ukoko rẹ Izrẹl ejobi nẹ ẹdẹ rihwẹ rẹ emeranvwe nana ohwo ọvuọvo kọ reyọ ogodẹ kirobo rẹ iwevwi rẹ esẹ rayen epha, ogodẹ ọvo unuwevwi ọvo; 4unuwevwi na da hanvwe nọ kẹ ogodẹ ọvo, ohwo vẹ ọrivẹ rọye ro bi kẹrẹ uwevwi rọye me reyọ kerẹ uchunu rẹ ihwo re hẹ etiyin, kirobo rẹ ohwo ọvuọvo sa re ọye a gba arhọghọ phihọ ogodẹ na. 5Ogodẹ wẹn na che vwo oka-a, ọrọ ọshare ẹgbukpe ọvo ọ ghwo te; wọ me reyọ nẹ ohri rẹ igodẹ na yerẹ ẹvwe na; 6ku wo churo re te ẹdẹ rihwẹne rẹ emeranvwe nana, ọke rẹ ukoko rẹ Izrẹl ejobi de che hwe igodẹ na vwẹ ovwọnvwọn na. 7Ayen ke reyọ emerha rẹ ọbara na, vwo te edọvi ivẹ rẹ anurhoro na kugbe ọ rẹ vwo gbere obenu rẹ anurhoro rẹ iwevwi rẹ ayen da cha re ayen na. 8Ayen ke re uvwo rọye vwẹ ason yena a vwọ tọn; vẹ ikara ro jephuo, kugbe ebe re yara ayen vwọ riọ. 9Wọ riọ ọkpokpọ eyẹ a vwẹ ame chere-e, ẹkẹvuọvo a vwọ tọn, te uyovwi rọye vẹ awọ rọye vẹ ivun rọye. 10Wo jẹn emerha rọye eheko re te irhiọke-e, obo ri chekọ re te irhiọke wa me torhẹ kufia. 11Enẹ kọye wa riọ: chobiẹ amwa wẹn, ku isahato wẹn phihọ, yọnrọn ọkpọ wẹn vwẹ obọ wẹn; ku wọ riọ okpokpakpa. Ọnana ẹwanvrẹn rẹ Ọrovwohwo na. 12Kidie me cha wan otọ rẹ Ijipt vrẹn vwẹ ason yena, ke me ghwiẹ emekpako rẹ otọ rẹ Ijipt ejobi hwe te ohwo te eranvwe, ke me vwẹ edjọ rẹ Ijipt ejobi guẹdjọ; Mẹvwẹ Ọrovwohwo na. 13Ọbara na kọ cha dia oka kẹ wẹ, vwẹ enu rẹ uwevwi rẹ ovwan epha, ọke me da mrẹ ọbara na, ke me wanvrẹn wẹ, emiavwe ọvuọvo gbi che te we rọ guọghọ owẹ-ẹ, ọke re Me da rhe ghwiẹ otọ rẹ Ijipt na. 14Nonẹ na kọ cha dia ẹdẹ rẹ ẹkarohọ kẹ wẹ, ku wọ yọnrọn kerẹ orẹ kẹ Ọrovwohwo, vwẹ evun rẹ uvwiẹ wẹn ejobi ku wọ yọnrọn kerẹ ẹgha bẹdẹ. 15Ẹdẹ ighwrẹn wa vwọ re ikara ro jephuo vwẹ ẹdẹ rẹ ẹsosuọ ku wo si ikara ro jephuo na nẹ uwevwi wẹn, kidie ọ da dianẹ ohwo ọvo re obo ri phuru nẹ ẹdẹ rẹ ẹsosuọ na ri te ẹdẹ ri ighwrẹn, ka nyavwe ohwo yena kufia nẹ Izrẹl na. 16Vwẹ ẹdẹ rẹ ẹsosuọ kẹ ovwan vwo ọghwẹgbe ọfuanfon, vwẹ ẹdẹ rẹ ighwrẹn ku we vwo ọghwẹgbe ọfuanfon; we ru iruo ọvuọvo vwẹ ẹdẹ yena-a; ẹkẹvuọvo jokpa rẹ obo rẹ ohwo ọvuọvo re ọye wa rhuẹrẹ. 17Ku wa re orẹ rẹ ikara ro jephuo na, kidie ẹdẹ nana kpekpekpe na ọye me vwọ reyọ urogho rẹ ovwan nẹ otọ rẹ Ijipt rhe; fiki rẹ ọtiọye na wa me yọnrọn ẹdẹ nana, vwẹ uvwiẹ wẹn ejobi, kerẹ ẹgha bẹdẹ. 18Vwẹ emeranvwe rẹ ẹsosuọ, vwẹ ovwọnvwọn rẹ ẹdẹ rihwẹne rẹ emeranvwe na ọye wa vwọ re ikara ro jephuo na, kẹ ọtiọye re te ẹdẹ uje gbẹ ọvo rẹ emeranvwe na vwẹ ovwonvwọn. 19Vwẹ ẹdẹ ighwrẹn we ja mrẹ iphuephu vwe iwevwi rẹ ovwa-an; ọ da dianẹ ohwo re obo ri phuru, ohwo yena ka nyavwọ nẹ ukoko rẹ Izrẹl na, owenẹ ọ dia ọrhorha eyẹ ọmotọ. 20Wa ria emu ọvuọvo ro phuru-u; vwẹ ẹdia rẹ ovwan ejobi wa re ikara ro jephuo.
21Eriyin na Mosis de se ekpako rẹ Izrẹl ejobi, ọ da ta kẹ ayen, Sanọ igodẹ kẹ oma rẹ ovwan kirobo rẹ orua rẹ ovwan epha, we hwe ogodẹ rẹ ẹwanvrẹn na. 22Reyọ ekru rẹ ahworhẹ re wo duvwo phihọ ọbara na rọ hẹ oze na, wo vwo te ophapha rọ obenu rẹ anurhoro na vẹ ọ rẹ akakọ rọye; we jẹn ohwo ọvuọvo vrẹn nẹ anurhoro rẹ uwevwi na ruẹ afe-e bẹsiẹ rẹ urhiọke vwo te. 23Fikiridie Ọrovwohwo cha wanvrẹn re hwe ihwo rẹ Ijipt na; ọke rọ da mrẹ ọbara na vwẹ ophapha rọ obenu vẹ ọ rẹ akakọ rẹ anurhoro na, Ọrovwohwo me shariẹ ẹchẹ yena vrẹn, ọ gbe rhọvwe nẹ ọguọghọ na vwẹriẹ iwevwi wẹn re hwe we-e. 24Ku wọ gha ẹgha nana kerẹ urhi vwọ kẹ oma wẹn vẹ emọ wẹn bẹdẹ. 25Ọke ri wo de rhi te otọ rẹ Ọrovwohwo vwọ kẹ wẹ kirobo ro veri na, ku wọ sẹro rẹ ẹga nana. 26Ọke rẹ emọ wẹn da ta kẹ wẹ, Otọ rẹ ẹga nana rhọ? 27Ku wọ ta, ọnana izobo rẹ ẹwanvrẹn rẹ Ọrovwohwo na, kidie ọ wan iwevwi rẹ ihwo rẹ Izrẹl vrẹn vwẹ otọ rẹ Ijipt, ọke ro vwo hwe ihwo rẹ Ijipt, ẹkẹvuọvo ọ da yan jẹn iwevwi rẹ avwanre vwo. Ihwo na de gbe iyovwi kpotọ ayen da ga.
28Etiyin ihwo rẹ Izrẹl da yanran re ru ọtiọye: kirobo rẹ Ọrovwohwo ta kẹ Mosis vẹ Erọn, ọtiọye ayen ruru.
Ọtiekọ rọ ka Oba: Ughwu rẹ Emekpako
29Vwẹ uherevie ason Ọrovwohwo de hwe emekpako rẹ otọ rẹ Ijipt nẹ ọmọkpako ri Fero ro tidia vwẹ ekete rọye na re te ọmọkpako rẹ ọviẹn rọ evun rẹ uwodi kugbe emekpako rẹ eranvwe. 30Fero de vrẹn vwẹ ason, te ọye, vẹ idibo rọye, kugbe ihwo rẹ Ijipt ejobi; ugo rẹ oviẹ de mu vwẹ Ijipt, kidie o vwo uwevwi ọvuọvo rẹ ohwo de je ghwo-o. 31O de se Mosis vẹ Erọn vwẹ ason, ọ da ta, Vrẹn, we kpo nẹ ohri rẹ ihwo mẹ, te owẹ te ihwo rẹ Izrẹl na, wa yanran, ra ga Ọrovwohwo, kirobo wọ tare. 32Reyọ igodẹ wẹn kugbe uchuru wẹn, kirobo wọ tare, rere wa yanran; re wa nẹ ẹrhovwo kẹ vwẹ rhe. 33Ihwo rẹ Ijipt na ki bru ihwo na okpakpa, rere ayen vrẹn nẹ otọ na kpatakpata, kidie ayen tare, Avwanre na ejobi kẹ irivwi re. 34Ọtiọye na ihwo na de mu odo rẹ ikara rayen ri ji phn-u, ize rẹ ayen vwo gbe ikara ayen da vwẹ emwa phare ayen vwọ ya igabọ rayen. 35Ihwo rẹ Izrẹl ji ru obo ri Mosis ta kẹ ayen, kidie ayen yare miẹ ihwo rẹ Ijipt na ekuakua rẹ idọnọ vẹ oro kugbe emwa; 36Ọrovwohwo da vwẹ ẹroesiri kẹ ihwo na vwẹ obaro rẹ ihwo rẹ Ijipt, ọtiọye na kemu kemu rẹ ayen nọ miẹ ayen ejobi ayen de siobọ no kẹ ayen. Enẹ kọye ayen miovwi ihwo rẹ Ijipt na.
Ihwo rẹ Izrẹl vrẹn nẹ Ijipt
37Ihwo rẹ Izrẹl de mu oyan phihọ nẹ Ramesis kpo Sukọt, ayen kerẹ ihwo odu-esan re vwẹ owọ yan, e kerẹ eya vẹ imitete-e. 38Ihwo efa buebu ọguagua ji nene ayen, kugbe uchuru buebu, igodẹ vẹ irhuẹn. 39Ayen da kakọ ikara ri jephuo re hẹ evun rẹ ido rẹ ayen mu nẹ otọ rẹ Ijipt rhe, kidiẹ iphuru-u, fikiridie a djẹ ayen nẹ otọ rẹ Ijipt ayen gbe sa hẹrhẹ-ẹ, ayen ji chere ẹmu ọvuọvo ghwa-a.
40Ọke rẹ ihwo rẹ Izrẹl dia otọ rẹ Ijipt te da dia ikpe ujori ẹne gbẹ ọgban. 41Vwẹ oba rẹ ikpe ujori ẹne gbẹ ọgban na, vwẹ ẹdẹ yena kpekpekpe na, ọye urogho rẹ Ọrovwohwo ejobi da yan nẹ otọ rẹ Ijipt. 42Ọye na ason rẹ ẹrhẹrẹ kẹ Ọrovwohwo, ro vwo si ayen nẹ otọ rẹ Ijipt rhe; ọtiọye na ason yena kẹ ason rẹ ẹrhẹrẹ rẹ ihwo rẹ Izrẹl ejobi rhẹrẹ kẹ Ọrovwohwo vwẹ uvwiẹ rayen ejobi.
Irhi Efa kpahe Ewanvrẹn na
43Ọrovwohwo da ta kẹ Mosis vẹ Erọn, ọnana kọye ẹgha rẹ ẹwanvrẹn na: we jẹn ọrhorha riọ-ọ: 44ẹkẹvuọvo ọviẹn ra vwẹ igho dẹ ọ sa riọ ọ da dianẹ a yanvwerọ nu. 45Ọrhorha ghevweghe yẹrẹ odibo ra yare rhe sa riọ-ọ. 46Vwẹ evun rẹ uwevwi ọvuọvo wa da cha riọ; wa reyọ emerha rẹ uvwo rọye nẹ evun rẹ uwevwi ro otafe-e; we vwirhi ubeku rọye-e. 47Ukoko rẹ Izrẹl na ejobi me yọnrọn. 48Ọ da dianẹ ọrhorha rọ vẹ owẹ gba dia guọnọ re orẹ rẹ ẹwanvrẹn na kẹ Ọrovwohwo, jẹn eshare rẹ ayen ejobi yanvwe tavwe; tavwe ro ki sikẹrẹ re ọ ke riọ; kọ dia kerẹ ọmọtọ rẹ otọ na. Ẹkẹvuọvo ohwo rọ yavwere-e sa riọ-ọ. 49Urhi ọvuọvo re cha dia kẹ ọmotọ vẹ ọrhorha rọ dia ohri rẹ ovwan.
50Enẹ ihwo rẹ Izrẹl ejobi ruru; kirobo rẹ Ọrovwohwo ji urhi kẹ Mosis vẹ Erọn, ọtiọye ayen ruru. 51Vwẹ ẹdẹ yena kpekpekpe na Ọrovwohwo da reyọ ihwo rẹ Izrẹl ejobi nẹ otọ rẹ Ijipt.
Currently Selected:
Ẹyano 12: UBV77
Highlight
Copy
Compare
Share
Want to have your highlights saved across all your devices? Sign up or sign in
Bible in Urhobo © United Bible Societies, 1977.
