Ẹyano 11

Ughwu rẹ Emekpako ra ta Ota kpahe

1Ọrovwohwo da ta kẹ Mosis, Emiavwe ọvo ji chekọ kẹ Fero vẹ Ijipt; ọye na da wan nu ko siobọ nẹ uwe kpo; ọke ro de siobọ nẹ uwe kpo, kọ djẹ wẹ kpo tototo. 2Gba ta ota phihọ erhọn rẹ ihwo na, rere ayen ohwo ọvuọvo, te aye te ọshare yare mie ọrivẹ rọye ekuakua rẹ idọnọ eyẹ oro. 3Ọrovwohwo da vwẹ eruesiri kẹ ihwo na vwẹ obaro rẹ ihwo rẹ Ijipt na. Ọrọ marho, ohwo na Mosis da rhe rho gangan vwẹ otọ rẹ Ijipt na, vwẹ obọ rẹ idibo ri Fero vẹ obọ rẹ ihwo na ejobi. 4Mosis da ta, Enẹ Ọrovwohwo tare: Vwẹ oma rẹ uherevie ason ke me cha wan otọ rẹ Ijipt na; 5emekpako rẹ otọ rẹ Ijipt na ejobi ki che ghwu nẹ ọmọkpako ri Fero ro tidia vwẹ enu rẹ ekete rọye, re te ọmọkpako rẹ odibo ro ridia vwẹ obuko rẹ uwuye; kugbe emekpako rẹ uchuru. 6Oviẹ rode kọ cha dia vwẹ otọ rẹ Ijipt na, ọ ra je mrẹ vwọ dẹvo-o, ra gbe je cha mrẹ vwọ ọfa-a. 7Ẹkẹvuọvo vwọ kẹ emọ rẹ Izrẹl eyẹ ohwo eyẹ eranvwe eyẹ eranko cha viẹ-ẹ; rere wọ vwọ riẹn nẹ Ọrovwohwo gbere ughwru vwọ uvwre rẹ ihwo rẹ Ijipt vẹ erẹ Izrẹl. 8Idibo wẹn nana ejobi na ki che bru vwe rhe, kẹ ayen che shiguẹ kẹ vwẹ, tanẹ, Wa yanran kpo, wọ vẹ ihwo ri nene uwe ejobi. Ọyena de nẹ otọ nu ke me yanran kpo. O de nẹ obaro ri Fero vẹ ophu. 9Etiyin Ọrovwohwo da ta kẹ Mosis, Fero cha sa davwerhọ wẹ-ẹn; rere igbunu mẹ vwo bu phihọ vwẹ otọ rẹ Ijipt na.

10Mosis vẹ Erọn de ru igbunu nana ejobi vwẹ obaro ri Fero, Ọrovwohwo de ru udu ri Fero gan, o rhe siobọ nẹ emọ rẹ Izrẹl kpo nẹ otọ na-a.

Currently Selected:

Ẹyano 11: UBV77

Highlight

Copy

Compare