HEBREOS 1
1
Dios paipac Churita cachashpa huillachishcamanta
1Diosca tauca cutinmi ñaupa huatacunapica ñucanchic taitacunaman pai ima nishcata huillaccunata huillachirca. 2Shina cacpipish, cunan tucuri punzhacunapica, paipac Churitami huillachishca. Diosca Paillahuantacmi cai pachataca ruhuarca. Paillamantacmi tucui ima tiyashcataca cushca. 3Diospac Churimi pai jatun cashcata ricuchicun. Paica Dios shinallatacmi can. Diospac Churica tucui ima tiyashcataca, paipac poderhuanmi mandacun. Paica ñucanchic juchacunata pichashpami, jahua pacha Dios mandacuc alli maquiman tiyarigrirca.
Diospac Churica angelcunata yalli cashcamanta
4Chashnami paica tucui angelcunata yalli jatun shutita chasquishpa, angelcunata yalli tucushca. 5¿Diosca maijan angelcunatatac:
“Canca ñuca Churimi cangui,
cunanca ñuca Huahuami cangui”
nishca?
¿Shinallatac pi angelcunatatac:
“Ñucaca paipac Taitami cani,
paica ñuca Churimi” nishca?
6Shinallatac Dios paipac shuclla Churita cai pachaman cachacushpaca:
“Tucui ñuca angelcuna
paita alli ninguichic” ninmi.
7Angelcunamanta Dios rimashpaca:
“Angelcunaca huaira shina cachun,
shinallatac ñucata serviccunaca
nina japiricuc shina cachun” ninmi.
8Ashtahuanpish paipac Churimantaca:
“Canca huiñai huiñaita
Mandac Diosmi cangui.
Shinallatac cashcata ruhuashpami mandangui.
9Canca cashcata ruhuanatami munangui.
Mana allita ruhuanataca piñashcanguimi.
Chaimantami cambac Dios ñucaca,
caishuccunamanta yalli
canman cushicuita cungapac
canta acllashcani nini” ninmi.
10Shinallatac:
“¡Mandac Dioslla!
Canllatacmi cai allpatapish,
imapish manarac tiyacpi ruhuarcangui.
Canllatacmi jahua pachatapish ruhuarcangui.
11Tucui chaicunaca tucuringami,
ashtahuanpish canca causacunguillami.
Chaicunaca churana
tucuric shinami tucuringa.
12Canca churanata pataric shinami,
chaicunataca pataringui.
Shuctac churanata churachic shinami,
shuctacyachingui.
Shina tucucpipish canca
canllatacmi cangui,
huiñaitami causacungui” ninmi.
13¿Diosca maijan angelcunatatac:
“Ñuca canta piñaccunata
cambac chaqui sarunapi churangacaman,
ñuca alli maquiman tiyacuilla” nishca?
14Angelcunaca Diospacta ruhuachun churashca espiritucunallami, shinallatac Dios quipata quishpichishcacunata ayudachun cachashcacunallami.
Currently Selected:
HEBREOS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.