HEBREOS 2
2
Sumac quishpirinata mana cungarinamanta
1Chaimantami alli ñanta mana chingachingapac ñucanchic uyashcataca yuyarashpa cana canchic. 2Dios paipac angelcunaman huillachishcaca, mana llullachu carca. Chaimantami maijanpish juchallishpa mana cazuccunataca, llaquichina cashca shinallatac llaquichishca carca. 3Shina cacpica, sumac quishpirinata yangapi churashpaca, ¿ima shinatac jatun llaquimantaca quishpirishunyari? Cai quishpirinataca Apunchic Jesusmi punta huillarca. Pai huillashcata uyaccunami chashnatac cashcata huillarca. 4Diospish mancharinacunata, milagrocunata ruhuashpa, pai munashca shina paipac Espirituta cushpa, chashnatac cashcata ricuchirca.
Jesucristoca ñucanchicta quishpichic cashcamanta
5Ñucanchic parlacushca, chai shamuna cashca mushuc llacta mandanataca, Diosca mana angelcunamanchu curca. 6Ashtahuanpish Dios quillcachishcapica maijancharica:
“¡Dioslla! Gentecuna,
¿ima cacpitac yuyaringuiyari?
Huañuclla runataca,
¿ima nishpatac llaquinguiyari?
7Runataca ashallamantami
mana angelcuna shinata ruhuashcangui.
Jatun mandacta shina nishcatami ruhuashcangui,
alli nishcatami ruhuashcangui.
Can imata ruhuashcacunata
mandactapish paitaca ruhuashcanguimi.
8Pai tucuita mandachunmi,
paipac chaqui sarunapi churashcangui” ninmi.
Diosca imatapish mana saquishpami tucuita pai mandachun churarca. Shina cashpapish pai tucuita mandacuctaca manarac ricunchicchu. 9Ashtahuanpish Jesusta, ashacamanlla angelcunamanta asha yangallata ruhuashpapish, llaquita apashpa huañushcamantami sumacyachishca, alli nishcata ruhuashca. Chaica, Dios cuyashcamantami, Jesusca tucuipac allipac huañurca.
10Tucui ima tiyashcatapish Diosmi ruhuashca. Diosca tucui paipac huahuacuna sumaimana cushicuita japichunmi munan. Chaimantami Diosca Quishpichic Jesucristotaca, pai llaquita apashcamanta sumacyachirca. 11Jucha illacta ruhuacpish, jucha illaccunapish shuc Taitapac huahuacuna shinami canchic. Chaimantami Jesusca mana pingashpa: “Ñuca huauquicunami canguichic” nin. 12Paillac rimashpaca:
“Cambac shutitami
ñuca huauquicunamanca huillasha,
shinallatac sumac cantotami
tandanacushcacunapac chaupipi cantasha” ninmi.
13Shinallatac:
“Paita crishpami shuyasha” ninmi.
Cutinllatac:
“Caipica Dios cushca
huahuacunahuanmi cani” ninmi.
14Ima shinami shuc huahuacuna aichayuc, yahuaryuc can, chai shinallatacmi Jesuspish ñucanchic shina aichayuc, yahuaryuc carca. Shina cashpami, huañuiman apac diablotaca, pai huañushpa chingachirca. 15Chashna huañushpami, tucui causaipi huañuita manchashpa, huatashca shina causacuccunata quishpichirca. 16Jesusca mana angelcunata ayudangapacchu shamurca, ashtahuanpish taita Abrahampac huahua huahuacunata ayudangapacmi shamurca. 17Paica, ayudangapacca paipac huauquicuna shinami tucurca. Chashna ayudashpami jatun mandac cura tucushpa, llaquishpa tucui gentecunapac juchacunata anchuchirca. Chashnami Diosta tucuita cazushpa servirca. 18Paica, diablo pandachisha nicpi, pai llaquita apac cashcamantami, maijanpish chai shina llaquihuan caccunata, ayudangapac poderta charin.
Currently Selected:
HEBREOS 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.