FILEMÓN 1
1
Filemonman Pablo quillcashcamanta
1Jesucristomanta prezu japishca Pablomi, Jesusmanta huauqui Timoteondi, ñucanchic shina Diospacta ruhuac cuyashca Filemonman caita quillcashpa cachanchic. 2Shinallatac cambac huasipi tandanacuc criccunamanpish, Jesusta crishcamanta pani Apyamanpish, ñucanchic shina mana manchashpa huillac Arquipomanpish quillcanchicmi. 3Ñucanchic Diospish, Apunchic Jesucristopish cancunata mai cuyashpa, sumac causaita cushca cachun ninchicmi.
Filemonca Jesucristota alli cric, cuyac cashcamanta
4Diosta mañacushpaca canta yuyarishpami Diostaca pagui nicunilla. 5Cantaca Apunchic Jesusta alli cric, shinallatac Diospaclla cac tucui criccunatapish cuyac cashcatami uyani. 6Ñucanchic crishcata shuccunaman huillachun, shinallatac Dios cushca allicunata Jesucristomanta chasquishcatapish alli entendichun nishpami, canmantaca Diosta mañacuni. 7Cuyashca huauqui, cambac cuyaihuanmi Diospaclla cac tucui criccunataca cushichishcangui. Chaimantami ñucapish cushicushpa, Diospacta ruhuana yuyailla cani.
Onesimota Filemón chasquichun nishpa, Pablo mañashcamanta
8Ñucaca Cristo acllashca huillac cashcamantaca, can imapish alli caipactaca ruhuachun mandai pudini. 9Chashna cashpapish ñucanchic cuyanacushcamantami, canmanca cuyaihuan mañani. Ñucaca ña yuyacmi cani. Cunancarin Jesucristomanta prezu japishcami tiyacuni. 10Ñuca caipi prezu cacpimi, Onesimoca Jesucristota crishpa ñuca huahua shina tucurca. Cunanca paita alli chasquichunmi mañani.
11Ñaupamanmi Onesimoca mana allita ruhuac carca. Cunanca canmanpish, ñucamanpish allita ruhuacmi. 12Paitaca cambacllamantacmi cachani. Ñucata chasquic shinallatac, paitaca chasquiyari. 13Alli huillaita huillashcamanta ñuca prezu tiyacucpi cambac randi ñucaman allita ruhuachunmi, caipi saquirichun munani. 14Chashna cashpapish can ima nishcata manarac yachashpaca, ñuca munaimantaca imata mana ruhuasha ninichu. Can ima allita ñucaman ruhuasha nishpaca, ama ñuca nishcallamanta ruhuanguichu, ashtahuanpish can munashca shina ruhuangui. 15Onesimoca canmanta ashata caruyashpapish, cunanca huañungacamanmi canhuanca canga. 16Cunanca ña mana cambac randishca runa shinachu, ashtahuanpish Jesusta crishcamantaca shuc cuyashca huauqui shinami ñucamanca tucushca. Cancarin yallimari cuyana cangui. Mana shuc yanga runalla shinachu cuyana cangui, ashtahuanpish Apunchic Jesusta cric cashcamantami, ashtahuan cuyana cangui.
17Jesusta crishcamanta shuclla cashcamantaca ñucata chasquic shinallatac, paitaca chasquingui. 18Pai ima mana allita ruhuashca cacpi, imata canman mana cutichishca cacpica, ñucata ningui. Paimantaca ñucami ricusha. 19Caita rimacuc Pablollatac, caita quillcashpami cantaca: “Onésimo imata canman cutichina cashca cacpica, paimantaca ñucami cutichisha.” Can quishpirishcamanta ñucaman ima allicunata ruhuana cacpipish, chaitaca mana ninichu. 20Cuyashca huauqui, Jesusta cric cashcamanta ñuca nishcacunata ruhuashpa cui. Chashna ruhuashpa ñuca shunguta cushichishpami, Apunchic Jesucristomanpish allita ruhuangui. 21Cai ñuca nishcata cazushpa, ashtahuan caicunamanta yallita ruhuana cashcata yachashpami, cai quillcata cachani.
22Cancuna Diosta mañacushcamanta, “Diosca ñucata cutinllatac cancunapacman cachangami” nishpami shuyacuni. Chaimanta ñuca pozanatapish allichicungui nishpami mañani.
Tucuchingapac “allilla cashca cachun” nishcamanta
23Jesucristomanta prezu japishca huauqui Epafraspish, “allilla cashca cachun” nishpami cachan. 24Ñucahuan Diospacta ruhuac Marcospish, Aristarcopish, Demaspish, shinallatac Lucaspish “allilla cashca cachun” nishpami cachancuna.
25Ñucanchic Apunchic Jesucristoca paipac sumaimana cuyaita tucui cancunaman cushca cachun. Chashna cachun.
Currently Selected:
FILEMÓN 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.