SOFONÍAS 3
3
Jerusalenpi causaccunata juchallishcamanta
1¡Aij, Jerusalenlla,
shuccunata llaquichiccuna,
mana cazuccuna,
juchata ruhuashpa
mapayashcacunami!
2Mandac Dios rimashcatapish
mana uyanchu, alli tucuchun
nishpa llaquichicpipish,
mana cazunchu.
Diospacman mana cuchuyanchu,
Mandac Diospica
mana shunguta churanchu.
3Paicunata mandaccunaca
leoncuna shinami huacacun.
Juezcunaca tuta animalta
japishpa, tutamantapac
shuc tullullatapish
mana puchuchic shinami cancuna.
4Dios ima nishcata huillaccunaca
jatun tucushca,
llullashpa umaccunami.
Curacunapish Diospac huasita
mapayachiccunami,
mandashcatapish mana cazunchu.
5Mandac Diosca paicunapac
chaupipica cashcata ruhuacmi,
ima millaitaca mana ruhuangachu.
Paica cada tutamantami
cashcata ruhuashpa taripan.
Chaita ruhuanataca
jaicapi mana cungaringachu.
Ashtahuanpish mana allita
ruhuac runaca mana pinganchu.
6Mandac Diosca:
«Llactacunatapish
tucuchircanimi.
Paicuna causana huasicunapish
shitashcami saquirirca.
Ñancunaca pipish mana purina
shitashca pambami saquirirca.
Paicunapac llactapica
shuc runallapish
mana saquirircachu.
Chashnami llaquinayaita
tucuchishca huiñaipac
saquirirca.
7Ñucaca: “Jerusalenpi
causaccunaca manchangapishchari.
Cunashpa rimashcataca
cazungapishchari.
Shina cazucpica,
paicuna causana huasicunatapish
mana chingachimanchu”
nishpami yuyarcanimi.
Ashtahuanpish paicunaca
millaita ruhuanatami munarca.
8Chaimanta llaquichina punzha
chayangacaman shuyaichic.
Ñucaca tucui llactacunata
tandachingapac, jatun mandaccuna
mandana llactacunata
nina japiric shina
llaquichinatami yuyarircani.
Chaimantami nina japiric shina
piñarishpa, tucui cai pachata
tucuchisha.
Chaitaca Mandac Dios ñucami nini.
9Chai huatapimi
Mandac Dios ñucata mañashpa,
shuc yuyailla tucushpa,
servichun gentecunapac
shungutaca mushucyachisha.
10Etiopía llacta yacu ladopi
causaccunami ñucata mañanga.
Caita chaita rishpa
causacushpapish
ofrendata apamungami.
11Chai punzhapica
ñucata mana cazushpa,
jatun tucuc runacunataca
cancunapac chaupimantaca
anchuchishami.
Chaimantami ñucata mana cazushpa,
mana allita ruhuashcacunamantaca
mana pingai tucunguichic.
12Cancunapac chaupipica
huaccha yangalla
gentecunatami saquisha.
Paicunami Mandac Dios ñucata
yuyarishpa causanga.
13Saquirishca israelcunaca
ima mana allita
mana ruhuangachu,
mana llullangachu.
Llullashpa pita
mana umangachu.
Paicunata allita michicpimi,
imatapish mana manchashpa,
cushilla causanga» ninmi.
Jerusalenpi causaccuna cushicunamanta
14¡Sionpi causaccunalla,
cantaichicyari!
¡Israelcunalla, cushicushpa
caparichicyari!
¡Jerusalenpi causaccunalla,
tucui shunguhuan
yallita cushicuichicyari!
15Mandac Diosca cancunata
mana llaquichingachu.
Cancunata piñaccunatapish
llucchishpa cachashcami.
¡Israelcunata jatun Mandac Diosca
cancunapac chaupipimi!
¡Jaicapi ima llaquita
mana manchanguichicchu!
16Chai punzhapica
Jerusalenpi causaccunataca:
“¡Sión llactalla,
ama manchaichicchu,
cancunapac maquipish
ama fuerza illac
saquirichun!” ningami.
17Mandac Diosca
cancunapac chaupipimi.
¡Paica quishpichingami!
¡Paica yallita poderyuc Diosmi!
Paica cancunamanta
yallita cushicungami.
Paica cuyacmi,
cushicushpa cantangami.
18Mandac Diosca:
«Cancunapuramanta unai huatata
llaquirishpa causaccunataca
tandachishami.
Paicunata pingaichiccunaca
mana tiyanchu.
19Chai huatapica cancunata
tucui llaquichiccunatami
llaquichisha.
Shinallatac suchucunataca
quishpichishami.
Chingarishca oveja shina
puriccunatapish tandachishami.
Cancunata pingaichishca
llactacunapica tucuipac
alli nishca,
tucuipac ricsishcatami ruhuasha.
20Cancuna ricucucpi,
prezumanta llucchimushpaca,
tucui cai pacha llactacunapi
causaccunapac ricsishca,
alli nishca cachunmi
ruhuasha» ninmi.
Chaitaca Mandac Diosmi nin.
Currently Selected:
SOFONÍAS 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.