SOFONÍAS 2
2
1Mana pingac gentecunalla,
tandanacushpa llaquirichicyari.
2Cancunata llaquichina
punzha manarac pactacpi,
Mandac Dios piñarishpa
llaquichina punzha
manarac pactacpi,
chingariclla tamo shina
manarac tucushpa
llaquirichicyari.
3Cai pacha humilde runacuna,
Mandac Dios mandashcata
cazuccuna, Mandac Diospacman
cutirichicyari.
Cashcata ruhuanata,
mana piñarinata munaichicyari.
Mandac Dios piñarishpa
llaquichi punzhapica,
paillatac huacaichingapishchari.
Cuchulla llactacunata llaquichinamanta
4Gaza llactaca
shitashcami saquiringa.
Ascalón llactaca llaquinayaitami
tucuchishca canga.
Chaupi punzhami
Asdod llactapi causaccunataca
llucchishpa cachanga.
Ecrón llactapi causaccunataca
sapimanta llucchic shinami
llucchishpa cachanga.
5¡Aij, mama cucha patapi causac
cereteocunalla, filisteocuna
causana Canaán llactalla!
Mandac Dios cancunahuan
piñarishpaca: “Shucllatapish
mana saquishpami
tucuchisha” ninmi.
6Mama cucha patapi tiyac
llactaca michina pambacuna,
oveja corralcunami tucunga.
7Chai allpaca maijan saquirishca
Judapac huahuacunapacmi canga.
Chaipimi michinga.
Tutaca Ascalón llacta
huasicunapimi sueñunga.
Paicunata Mandac Dios
ricurishpami prezumanta
cutichimunga.
8Moabitacuna, amonitacuna
rimashpa pingaichicuctami uyarcani.
Chashna rimashpami,
ñuca acllashcacunata
pingaichishpa llactata
quichushpa jatun tucurca.
9Tucuita Mandac Dios
ñuca shutipimi nini:
Moabitacunaca Sodoma shina,
amonitacunaca
Gomorra shinami tucunga.
Chaipica chinicuna
jundashca pamba,
cachita llucchina
pushtu tucushpami,
huiñaita shitashca canga.
Ñuca acllashcapuramanta
maijan saquirishcacunami paicuna
ima charishcacunataca apanga.
Paicunallatacmi allpacunataca
japinga ninmi.
10Paicunallatac jatun tucushpa
tucuita Mandac Diospac
acllashcacunata rimashcamantami
llaqui tucunga.
11Mandac Diosca paicunahuan
yallita piñarishpa,
cai pachapi tiyac dioscunataca
tucui chingachishpami,
yallita manchachinga.
Tucui yacu patapi cac
llactacunapi causaccunami
paicuna maipi
causashcallapitac cumuringa.
12Etiopía llactapi
causac cancunapish
Mandac Diospac jatun
macanacuipimi huañunguichic.
13Mandac Diosca jahua lado
llactaman maquita alzashpami
Asiria llactata
llaquichishpa tucuchinga.
Nínive llactatapish
llaquinayaita tucuchishcami,
shitashca pambata saquinga.
14Chaipica charina animalcuna,
sacha animalcuna
shayanami tucunga.
Tutaca pucucuna,
erizo animalcunami
huasi pilarcunapi sueñunga.
Ventanacunapica huacacungami.
Cedro vigacunapish paquirishpami
ricunalla siricunga.
15Riquichic, chai llactapica
imata mana manchashpa
cushicushpami causarca.
Chaimantami chaipi causacca:
“Ñucallami cani,
pipish mana tiyanchu”
nicmi carca.
¡Cunanca ima shinami
shitashca saquirishca,
sacha animalcuna
causanami tucushca!
Tucui chaita pasaccunaca
maquita huactashpami
burlashpa asinga.
Currently Selected:
SOFONÍAS 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.