TITO 3
3
Criccuna ima shina causanamanta
1Criccunataca llactata mandaccunatapish, pueblota mandaccunatapish cazuchun, imata ruhuachun mandacpipish cushilla ruhuachuncuna, 2pitapish mana allichu nishpa ama rimachun, pihuanpish mana piñanacushpa, caishuc chaishuc-huan apanacushpa, cuyac shunguhuan cachuncuna yuyachishpa yachachingui.
3Ñaupaca ñucanchicpish Diosta mana cazuc, yuyai illac, juchapi chingarishca, ñucanchic munaillata ruhuashpa cushicuna yuyaillapi huatashca shinami causacurcanchic. Chashna cashpami shuccuna ama charichun munashpa, caishuc chaishuc-huan piñanacushpa causacurcanchic. 4Chashna cacpipish ñucanchicta Quishpichic Diosca pai cuyac, llaquic cashcata ricuchishpami, 5ñucanchicta quishpichirca. Mana ñucanchic ima allita ruhuashcamanta, ashtahuanpish ñucanchicta llaquishcallamantami quishpichirca. Diosca tucui juchacunata jahuashpami cutin huacharishcata ruhuarca. Paipac Espirituta cushpami mushuc causaiyucta ruhuarca. 6Ñucanchic Quishpichic Jesucristomantami, Diosca paipac Espirituta ñucanchicmanca yallita curca. 7Dios yallita cuyashpami, paihuan alli tucushpa, ñucanchic shuyacushca huiñai causaita japichun chashnaca ruhuarca.
8Cai rimashcacunaca chashnatacmi can. Diosta criccuna allicunallata ruhuashpa causachunca, allitami yachachina cangui. Cai alli ruhuaicunaca tucuipacmi alli can. 9Shina cacpipish imapish yanga parlocunamanta, ñaupa taitacunapac shuticunamanta, Moisés mandashcacunataca pactachinami canchic nishpa rimanacushpa piñanacunamanta, huacaichiringui. Chaicunaca yanga ima yuyai japinapish mana tiyanchu.
10Maijanpish tandanacushca criccunapi mana alli ruhuashpa chicanyanacuipi churacpica, ishcai cutincaman cunashpa rimangui. Chaita mana uyacpica, tandanacushca criccunapuramanta llucchishpa cachangui. 11Chai runa paillatac pandarishpa, juchata ruhuashpa, paillatac llaquiman ricushcataca yachanami cangui.
Tito imata ruhuana cashcamanta
12Artemasta cashpa, Tiquicota cashpa cambacman ñuca cachacpica, Nicópolis pueblopi ñucata ricungapac ima shinapish shamunata yuyangui. Tamya quillacunapica chaipimi canata munani. 13Chai abogado Zenasta, shinallatac Apolosta paicunapac rinapi imapish ama illachun, ima shinapish imallata cushpa ayudangui. 14Ñucanchicpuramanta caccunapish allita ruhuashpa, huacchacunaman ima illashcatapish ayudashpa, Diospac ñaupapi allicuna cachunmi munani.
Tucuchingapac “allilla cashca cachun” nishcamanta
15Tucui ñucahuan caccunami cantaca “allilla cashca cachun” nishpa cachancuna. Shinallatac ñucanchicta cuyac caishuc criccunatapish “allilla cashca cachun” nishpa cungui ninimi.
Diosca paipac sumaimana cuyaita tucui cancunaman cushca cachun. Chashna cachun.
Currently Selected:
TITO 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.