MATEO 2
2
Yachac runacuna Jesusta ricugrishcamanta
1Judea llacta Belén pueblopimi Jesusca huacharirca. Chai punzhacunaca Herodesmi chai llactataca mandacurca. Chaipimi inti llucshina ladomanta, yachaccuna Jerusalén puebloman shamurca. Paicunaca lucerota ricushpa yachacuccunami carca. 2Paicunaca:
—¿Israelcunata mandangapac huacharishca huahuaca, maipitac? Ñucanchicca inti llucshina ladopi, huahua huacharishcata ricuchic lucerotami ricushpa, alli ningapac shamunchic— nirca.
3Chaita uyashpami, mandac Herodesca yallita mancharirca. Jerusalenpi causaccunapish, chashnallatacmi mancharirca. 4Chaimantami Herodesca Israel curacunata mandac curacunatapish, mandashcacunata yachachiccunatapish cayashpaca:
—¿Maipitac Quishpichic Cristoca huacharinga?— nirca. 5Chashna nicpimi paicunaca:
—Diosmanta ñaupa huillacca: “Judea llacta Belén pueblopimi huacharinga” nincunami. Paicuna quillcashca:
6“Judea llacta Belenlla,
canca tucui Judea
pueblocunamanta
alli nishca pueblomi cangui.
Canmantami shuc mandac llucshinga.
Paimi ñuca acllashca
israelcunataca pushanga”
nishcami— nirca.
7Chashna nicpimi, Herodesca yachaccunata pacalla cayashpa tapushpa, punzha lucero ricurishcata allita yachac chayarca. 8Chaimanta, paicunata Belenman cachashpaca:
—Chaiman rishpa, huahuata allita mashcagrichic. Ña tarishpaca huillangapac shamunguichic, ñucapish chai huahuata alli nigringapac— nirca.
9Jatun mandac Herodes chashna nicpica, chai yachaccunaca rircami. Paicuna ricpica, inti llucshina ladopi ricurishca lucerollatacmi ñaupata rishpa, huahua Jesús siricuc huasi jahuapi jarcarirca. 10Yachaccuna chai lucerota ricushpaca, yallitami cushicurca. 11Paicuna chai huasiman yaicushpaca, huahuatami paipac mama Mariandi ricurca. Chaimantami cungurishpa “allimari cangui” nircacuna. Shinallatac quipita pascashpami, curitapish, inciensotapish, mirratapish curca. 12Dios yachaccunaman muscuipi ricurishpa “Herodespacman ama cutichun” nicpimi, shuctac lado ñanta paicunapac llactamanca cutirca.
Egipto llactaman miticushpa rishcamanta
13Yachaccuna rishca quipaca, Mandac Dios cachashca ángel muscuipi Joseman ricurishpaca: «Mandac Herodesmi huahuataca huañuchingapac mashcachigricun. Cunanca jatarishpa, huahuata paipac mamandi Egipto llactaman apai. Ñuca ima horas shamuchun ningacaman chaipi cagri» nirca.
14Shina nicpimi, Joseca riccharishpa, chai tutallatac huahuata apashpa, mama Mariandi Egipto llactaman rirca. 15Mandac Dios ñaupa huillacman huillachishca pactachunmi, chai llactapi Herodes huañungacaman causarcacuna. Pai huillachishpaca: «Egipto llactamantami ñuca Churitaca cayarcani» nishcami carca.
Herodes huahuacunata huañuchichun mandashcamanta
16Herodesca yachaccuna umashcamantami, munai piñarishpa, tucui muyundi Belén llactapi causac, manarac ishcai huatata charic cari huahuacunata huañuchichun mandarca. Chashnami yachaccuna lucerota ricushca punzhamanta ñaupaman huacharishca huahuacunata huañuchichirca. 17Chashnami, Diosmanta ñaupa huillac Jeremías quillcashcaca pactarca.
18Paica: «Ramá pueblopica
¡alau! nishpa
caparishcami uyarirca.
Chaica Raquelmi,
paipac huahuacunamanta huacacurca.
Huahuacuna huañushcamantami
Paitaca pipish
mana cushichi pudircachu» ninmi.
Egipto llactamanta cutishcamanta
19Herodes huañushca quipa, Mandac Diospac ángel Egiptopi Joseman muscuipi ricurishpaca. 20«Jatarishpa, huahuata apashpa, mama Mariandi Israel llactaman cuti. Huahuata huañuchishun niccunaca ñami huañushca» nirca.
21Chaimantami Joseca jatarishpa, huahuata apashpa, mama Mariandi Israel llactaman cutirca. 22Ashtahuanpish Herodespac churi Arquelao paipac taitapac randi, Judea llactata mandacushcata yachashpami, chaiman rinataca mancharca. Chaimantami Mandac Dios cutin muscuipi huillacpi, Galilea llactaman rirca. 23Chaiman chayashpaca, ñaupa huillaccuna huillashca pactachunmi Nazaret pueblopi causangapac rirca. Chai huillaccunaca: “Paica nazareno nishcami canga” nishca carca.
Currently Selected:
MATEO 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.