MATEO 1
1
Jesucristopac ñaupa taitacunapac shuticunami
(Lc 3.23-38)
1Taita Abrahammanta jatun mandac Davidcaman causac Jesucristopac ñaupa taitacunaca caicunami:
2Abrahamca Isaac churitami charirca. Isaacca Jacobo churitami charirca. Jacoboca Judá, shinallatac shuctac churicunata charirca. 3Judaca Tamar huarmipica Fares churita shinallatac Zara ushitami charirca. Faresca Esrom churitami carca. Esromca Arampac churitami charirca. 4Aramca Aminadab churitami charirca. Aminadabca Naasón churitami charirca. Naasonca Salmón churitami charirca. 5Salmonca Booz churitami charirca. Boozpac mamaca Rahabmi carca. Boozca Obed churitami charirca. Obedpac mamaca Rutmi carca. Obedca Isaí churitami charirca. 6Isaica jatun mandac David churitami charirca. Jatun mandac Davidca Salomón churitami charirca. Paipac mamaca Uriasmi carca.
7Salomonca Roboam churitami charirca. Roboamca Abías churitami charirca. Abiasca Asa churitami charirca. 8Asaca Josafat churitami charirca. Josafatca Joram churitami charirca. Joramca Uzías churitami charirca. 9Uziasca Jotam churitami charirca. Jotamca Acaz churitami charirca. Acazca Ezequías churitami charirca. 10Ezequiasca Manasés churitami charirca. Manasesca Amón churitami charirca. Amonca Josías churitami charirca. 11Josiasca Jeconías shinallatac shuctac churicunatami charirca. Chai punzhacunami, israelcunataca Babilonia llactaman prezu apashca carca.
12Shina apashca quipami, Jeconiasca Salatiel churita charirca. Salatielca Zorobabel churitami charirca. 13Zorobabelca Abiud churitami charirca. Abiudca Eliaquim churitami charirca. Eliaquimca Azor churitami charirca. 14Azorca Sadoc churitami charirca. Sadocca Aquim churitami charirca. Aquimca Eliud churitami charirca. 15Eliudca Eleazar churitami charirca. Eleazarca Matán churitami charirca. Matanca Jacobo churitami charirca. 16Jacoboca José churitami charirca. Joseca Mariapac cusami carca. Mariaca Jesuspac mamami carca. Jesusca Cristomi can.
17Chashna cashpami, Abraham causacui punzhamanta David causai punzhacamanca, chunga chuscu taitacuna carca. David causacui punzhamanta israelcunata Babilonia llactaman prezu apai punzhacamanca, chunga chuscu taitacunami carca. Chaimanta Cristo huacharingacamanca, chunga chuscu taitacunami carca.
Jesucristo huacharishcamanta
(Lc 2.1-7)
18Jesucristo huacharinaca cashnami carca: Paipac mama Mariaca Josehuan cazarangapacmi ari nishca carca. Josehuan manarac chayarinacushpami, Mariaca Diospac Espíritu llanducpi, huicsayuc taririrca. 19Cazarangapac ari nishca Joseca cashcata ruhuac cashcamantami mana pimanpish yachachishpa, Mariataca pacalla saquisha nicurca. 20Pai chaita yuyacucpi, Dios cachashca ángel muscuipi ricurishpaca: «Davidpac huahua huahuapura José, Mariahuanca cazarailla, ama manchaichu. Mariaca Diospac Espiritumantami huicsayuc tucushca. 21Paica shuc cari huahuatami charinga. Chai huahuataca JESÚS shutitami shutichingui. Paimi pai acllashcacunataca juchacunamanta quishpichinga. Chaimantami chai shutica canga» nirca.
22Tucui chaicunaca ñaupa Dios paimanta huillacman huillachishca pactachunmi, chashnaca tucurca. 23Chai huillaccunaca:
«Manarac carihuan chayarinacushca
shuc solterami,
huicsayuc tucushpa,
shuc cari huahuata charinga.
Chai huahuaca
Emanuel shutimi canga» nishcami.
(Emanuel nishpaca: «Dios ñucanchic-huan» nisha ninmi).
24José riccharishpaca, Diospac ángel mandashca shinami Mariahuanca cazararca. 25Joseca chashna cazarashpapish chai huahuata charingacamanmi Mariahuanca mana chayarinacurca. Chai huahuataca JESÚS shutitami shutichirca.
Currently Selected:
MATEO 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.