HEBREOS 3
3
Jesusca Moisestapish yalli cashcamanta
1Chaimanta cuyashca criccuna, cancunaca jahua pacha Dios acllashcacunami canguichic. Dios cayashca cashcamanta Jesucristotaca apóstol cashcata, shinallatac jatun mandac cura cashcata yuyaichic. 2Jesusca Dios nishcata pactachicmi carca, chai shinallatacmi Moisespish Diospac huasipica, tucuita pactachirca. 3Jesusca Moisesta yalli alli nishcami cana can. Chaica huasita ruhuacca, huasita yalli alli nishcami cana can. 4Tucui huasicunami maijan ruhuashca can, shina cacpipish, tucuita ruhuacca Diosmi. 5Moisesca Diospac huasipi tucuita cazuc servicmi carca. Chai shina ruhuashpami, Dios quipaman huillana cashcata ricuchicurca. 6Ashtahuanpish Jesucristoca Diospac churi cashpami, Diospac huasita mandacun. Tucuri punzhacaman tucui shunguhuan cushicushpa shuyashpaca, ñucanchicmi chai huasica canchic.
Diospac huahuacuna samarinamanta
7Chaimantami Diospac Espirituca:
«Dios rimashcata
cunan cancuna uyashpaca,
8shitashca pambapi Diosta
caita chaita mañashpa,
piñachishca shina ama shunguta
sinchiyachichicchu.
9Chaipimi cancunapac
ñaupa taitacunaca,
chuscu chunga huatata
ñuca ima ruhuashcata ricushpapish,
cutin ricushun nishpa piñachircacuna.
10Chaimantami chai gentecunahuan
ñuca piñarishpaca:
“Paicunaca shungupi
chingarishpa puricushpami,
ñuca ricuchishca ñantaca
mana ricsinata munarcacuna” nircani.
11Chaimantami ñuca piñarishpa, ari nishpaca:
“Ñucahuan samaringapacca
manatac yaicungachu” nircani» nirca.
12Cuyashca criccuna, cancunapurapi millai yuyaihuan mana crisha nishpa, causac Diosmanta caruyaccuna shucllapish ama tiyachun. 13Chaipac randica, cunan punzha tiyacpirac caishuc chaishuc yuyachinacushpa, cancunapac shungu rumiyashpa juchapi pandarichun ama saquinguichicchu. 14Callaripi caticushca shina, Cristopi shunguta churashpa tucuringacaman catishpaca, Cristo japishca shinami ñucanchicpish japishun. 15Chaimantami:
«Dios rimashcata cunan uyashpaca,
chai mana cazuccuna shina
ama shunguta sinchiyachichicchu» nin.
16Dios ima nishcata uyashpapish, ¿paita mana cazuccunaca picunatac carca? Chaicunaca Egipto llactamanta Moisés llucchishca tucui israelcunami carca. 17Shinallatac Diosca, ¿picunahuantac chuscu chunga huatacunata piñarishca carca? Chai shitashca pambapi juchallishpa huañuccunahuanmi piñarishca carca. 18Shinallatac Diosca, ¿picunatatac “ñucahuan samaringapacca, manatac yaicungacunachu” nishpa ari nirca? Chai mana cazuccunatami chashna nirca. 19Shina cacpica, paicuna mana crishcamantami, chai samarinamanca mana yaicui pudishcata yachanchic.
Currently Selected:
HEBREOS 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.