ÉXODO 22
22
Shuhuashcata cutichinamanta
1Maijanpish huagrata, ovejata shuhuashpa huañuchic, mana cashpaca catucca shuc huagramantaca pichca huagratami cutichina can. Cutin shuc ovejamantaca chuscu ovejatami cutichina can.
2Maijan huasipi shuhuacucta japishpa, huañuchishpaca, mana juchanchishcachu canga. 3Ashtahuanpish punzha shuhuacucta japishpa, huañuchishpaca, juchanchishcami canga.
Shuc shuhuacca chai shuhuashca mashna valishcatami cutichina can. Cullquita mana charishpaca, shuhuashcamanta cutichingapacca paillatacmi caturina can.
4Shuhuacpac maquipi ima animal japi tucucpica, cada shucmantami ishcaita cutichina can. Chashnami huagramantapish, ovejamantapish, burromantapish cutichina can.
5Maijanpish shucpac michina pambaman, mana cashpaca uvas chagraman animalta pasachishpa carashpaca, paipac mai alli michina pambata, mana cashpaca uvas chagratami cutichina can.
6Maijanpish pucuc yurata, mana cashpaca cosechana chagrata, mana cashpaca gavillata rupachishpaca, rupachishcamantaca cutichinami can. 7Maijanpish cullquita, mana cashpaca ima valishcacunata mingashpa charicucpi, shuc shuhuac yaicushpa, huasi ucupi japi tucushpaca, chai shuhuacmi cada shucmanta ishcaita cutichina can. 8Ashtahuanpish shuhuac mana japi tucucpica, chai mingai tucuc runami, pai mana shuhuac cashcataca juezpacman huillagringa.
9Maijanpish chingarishca huagrata, burrota, ovejata, churanata, mana cashpaca imapish chingarishcata: “Caica ñucapacmi” nicpi, cutin caishucpish: “Ñucapacmi” nicpica, ishcaitami juezpacman nina can. Juez maijantami juchanchin, chaimi cada shucmanta ishcaita cutichina can.
10Maijanpish burrota, huagrata, mana cashpaca ovejata, mingacpi, chai animal huañucpi, chugriricpi, mana cashpaca pi mana ricucpi shuhuaricpica, 11chai mingai tucuc runami Diospac ñaupapi: “Mana shuhuarcanichu” nishpa huillana can. Shina nicpimi, chai animalyuc runaca paipac nishcata crishpa, mana cobranga. 12Ashtahuanpish shuhuacucta ricushpaca, animalyucman paganami can. 13Chai animalta ima sacha animal polvoshca cacpica, chai huañushca puchutami animalyucman ricuchigrina can. Chashnami chai animalyucman mana cutichina can.
14Maijanpish ima animalta mañashpa charicucpi, chai animalyuc mana ricucucpi, chugriricpi, mana cashpaca huañucpica, cutichinami can. 15Ashtahuanpish animalyuc ricucucpi, imapish tucucpica, mana imata cutichichu can. Fletashca animal cacpica, animalyucmanca fletashca cullquillatatacmi cutichina can.
Gentecuna alli causachun mandashcamanta
16Maijanpish cazarangapac manarac ari nishca, carihuan manarac chayarishca solterata inquitashpa sueñushpaca, mashnata pagana cashcata pagashpami paihuan cazarana can. 17Solterapac taita mama cazarachun munacpica, carihuan manarac chayarishca solteramanta mashnata pagana cashcatami pagana can.
18Brujacuna huañunami can.
19Maijanpish animalhuan chayaricca huañunami can.
20Maijanpish Mandac Diosman animalcunata huañuchishpa, mana cushpa, shuctac dioscunaman cucca huañunami can.
21Egiptopica pozashpallami causarcangui. Chaimanta cancunapac llactapi pozashpalla causactaca ama umanguichu, ama llaquichinguichu.
22Viuda huarmitapish, taita mama illac huahuacunatapish ama llaquichinguichu. 23Paicunata llaquichicpi, paicuna ñucata mañacpica, ñucaca uyashami. 24Ñucaca nina japiric shina piñarishpami, espadahuan huañuchisha. Cancunapac huarmicunaca viuda, cutin huahuacunaca taita mama illacmi saquiringa.
25Maijan ñuca acllashcapura runaman, cancunahuan causac huaccha runaman cullquita mañachishpaca, ama cullquita mañachiccuna shina interesta cobranguichu. 26Cullquita mañac runa churanata saquicpica, manarac inti tigracpi cutichingui. 27Chai churanaca paipac tapallinami, chirimanta jarcarinami. ¿Ima shinatac churana illacca sueñungayari? Chashna mana cutichicpi, pai ñucata mañacpica, ñucaca uyashami. Ñucaca llaquicmi cani. Chaimanta paita ayudangapac rishami.
28Cancunapac llactapi mandaccunatapish, jueztapish ama llaquichinguichu.
29Cambac punta pucushca granotapish, vinotapish, ama unayashpa, utca ñucaman cungui. Cambac punta cari huahuatapish ñucaman cungui. 30Punta huacharishca cari huagratapish, ovejatapish ñucaman cungui. Chai punta huacharishca animalca canchis punzhatami mamahuan canga. Pusac punzhaca ñucaman cungui. 31Cancunaca ñucapaclla acllashcami canguichic. Chaimanta sacha animal polvoshpa huañuchishca aichataca ama micunguichicchu, ashtahuanpish allcucunaman shitanguichic.
Currently Selected:
ÉXODO 22: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.