ÉXODO 20
20
Chunga mandashcacunamanta
(Dt 5.1-21)
1Dios tucui cai mandashcacunata rimashpaca: 2«Ñucaca Mandac Diosmi cani. Ñucami cancunataca Egipto llactapi huatashca shina llaquita causacushcamanta llucchircani.
3Ñuca ñaupapica ama shuctac dioscunata charinguichu.
4Jahua pachapi, cai pachapi, yacu ucupi, allpa ucupi tiyaccunaman ricchacunatapish ama ruhuanguichu. 5Chaicunapac ñaupapica ama cumuringuichu, ama servinguichu. Ñucaca cancunata Mandac Diosmi cani. Shuctac diosta charichunca manatac munanichu. Taitacuna ñucata piñashpa, millaita ruhuashcamantaca paicunapac huahuacunacaman, nietocunacaman shinallatac bisnietocunacamanmi llaquichisha. 6Ashtahuanpish ñucata cuyashpa, ñuca mandashcata cazuccunataca huaranga huaranga miraicamanmi cuyasha.
7Mandac Dios ñucapac shutipi ama yanga ari ninguichu. Maijanpish ñuca shutipi yanga ari nicca llaquichishcami canga.
8Ñucapaclla samana punzhata yuyaringui. 9Sucta punzhacaman trabajangui. 10Ashtahuanpish canchisniqui punzhaca Mandac Dios ñucapaclla chicanyachishca punzhami. Chai punzhapica canpish, cambac churicunapish, cambac ushicunapish, canta servic caricunapish, servic huarmicunapish, cambac animalcunapish, shuctac llactamanta shamushpa, canhuan causaccunapish ama imata ruhuanguichicchu. 11Ñucaca Mandac Diosmi cani. Ñucaca sucta punzhapimi jahua pachatapish, cai pachatapish, mama cuchatapish, chaipi tucui ima tiyashcatapish ruhuarcani. Ashtahuanpish canchisniqui punzhapica samarircanimi. Chaimantami ñucaca chai punzhataca bendiciashpa, ñucapacllata ruhuarcani.
12Mandac Dios ñuca cushca llactapi unai huatata causangapac cambac taita mamata cazungui.
13Ama huañuchingui.
14Ama huainayangui.
15Ama shuhuangui.
16Ama yanga pitapish juchanchishpa llaquichingui.
17Ama shucpac huasita munangui. Shucpac huarmitapish, servicpac huarmitapish, canta servic huarmitapish, shucpac huagratapish, shucpac burrotapish, ima shuctac charishcatapish ama munangui» nishpami mandarca.
Israelcuna Mandac Diosta manchashcamanta
(Dt 5.22-33)
18Tucui israelcunamami tulun nishcatapish, corneta tocashcatapish uyarca. Shinallatac relampa jaguin nishcatapish, Sinaí urcu cushni tapashcatapish ricurca. Chaimantami manchaihuan chucchushpa caruyarca. 19Shina cacpimi Moisestaca:
—Canlla parlailla. Ñucanchicca uyashunllami. Mandac Diosca ama ashtahuan rimachun. Pai rimacpica, huañushunmi— nirca.
20Shina nicpimi Moisesca:
—Ama manchaichicchu. Diosca cancuna paita manchac cashcata ricungapacmi shamurca. Paica cancuna punzhanta paita manchashpa, ama juchallichunmi munan— nirca.
21Tucui israelcuna carupi cacpimi, Moisesca Dios rimacuc amsa puyuman cuchuyarca.
Altarta ruhuachun mandashcamanta
22Mandac Diosca Moisestaca: «Israelcunataca: “Jahua pachamanta ñuca shamushpa, cancunahuan parlashcatami ricushcanguichic. 23Chaimanta ñucapac randi, cullquimanta, curimanta yanga dioscunata ama ruhuanguichicchu. 24Ñucamanca allpamanta shuc altarta ruhuanguichic. Chai jahuapi ovejacunata, vacacunata ñucahuan alli tucungapac ñucaman cushca tucui ofrendata rupachichic. Maipi cacpipish, ñucaca yuyarishpami, cancunapacman shamushpa bendiciasha. 25Chai altarta ama labrashca rumicunahuan ruhuanguichicchu. Fierrocunahuan allichishpaca mapayachinguichicmi. 26Shinallatac ñucaman altarta ruhuashpaca ama gradacunahuan ruhuanguichicchu. Cancuna chaiman huichai rishpaca, cancunapac lluchulla aichata ricuchinguichicmi” ningui.
Currently Selected:
ÉXODO 20: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.