1 TIMOTEO 3
3
Criccunata pushaccuna ima shina canamanta
1Maijanpish tandanacushca criccunata pushac casha nishpaca, alli ruhuanatami yuyan. Cai rimashcaca chashnatacmi can. 2Ashtahuanpish tandanacushca criccunata pushacca, pi mana juchanchishca alli causac, shuc huarmiyuclla, alli yuyaita charic, alli nishca, huasiman chayaccunatapish alli chasquic, yachachinatapish alli yachachic, 3mana machac, piñanacunatapish mana munac, cullquita charingaraicu ima mana allitac mana ruhuac, chaipac randica pitapish llaquic, ima piñanacui tiyacpipish allichic, 4paipac huasipipish allita pushashpa causac, huahuacunatapish alli cazuchic, alli canata yachachicmi cana can. 5Maijanpish quiquin huasipi mana alli pushashpaca, ¿ima shinatac Diospaclla tandanacushca criccunataca pushangayari? 6Chai pushacca unai cricmi cana can. Pacta jatun tucushpa diablo urmashca shina llaquichishca cangapac urmanman. 7Ima llaquipi, supaipac ima pandachinapi ama urmangapacca, tucui gentecunapac alli nishcami cana can.
Criccunata ayudaccuna ima shina canamanta
8Shinallatac criccunata ayudaccunaca, mana machac, mana llullac, cullquita japingaraicu ima mana allitac mana ruhuac, tucui gentecunapacpish alli nishcami cana can. 9Alli huillaita yachachishcacunataca, chashnatac cashcata crishpa chuya yuyaihuan caticmi cana can. 10Shinallatac criccunata ayudaccuna cachun manarac churashpami, paicuna ima shina cactarac ricuna can. Chaipi pi mana juchanchicpimi criccunata ayudac cachunca churana can. 11Shinallatac huarmicunapish tucuipac alli nishca, mana huashalla parlac, alli yuyaita charic, imapipish allita ruhuaccunami cana can. 12Criccunata ayudaccunaca shuc huarmiyuclla, huahuacunatapish, huasi ucupuratapish allita yachachicmi cana can. 13Criccunata ayudaccuna chashna allita ruhuashpaca, alli nishcami cangacuna. Apunchic Jesusta crinamantapish mana manchashpami huillangacuna.
Ñucanchic crishcaca tucuimanta yalli alli cashcamanta
14Canta ñalla ricugrina yuyailla cashpapish, caitami quillcashpa cachani. 15Ñuca unaiyacpipish, canca Diospac huasipi ima shina cana cashcata yachachunmi munani. Tandanacushca criccunaca, cashcata nic, pilar shina causac Diospac tandanacushcacunami can. 16Ñucanchic crishcaca, tucuimanta yalli jatunmi can:
Diosca
aichayuc tucushpami ricurirca.
Paipac Espiritupica
tucuitami misharca.
Paitaca
angelcunami ricurca.
Mana israelcunamanpish
huillashcami carca.
Cai pachapipish
crircacunami.
Jahua pachapipish
alli nishpami chasquishca carca.
Currently Selected:
1 TIMOTEO 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.