1 TIMOTEO 2
2
Ima shina Diosta mañanamanta
1Tucuimanta yallica cancuna Diosta mañacushpa, Dios-huan parlacushpa, Diosta rogacushpa, imamanta pagui nicushpaca, tucui gentecunamanta, 2jatun mandaccunamanta, llactatac mandaccunamanta, ñucanchic sumacta apanacushpa cangapacca, Diosta mañashpa causachunmi munani. Shina mañashpami Diosta cazushpa, imapipish alli nishca cashun. 3Chashna mañashpami allita ruhuanchic, shinallatac ñucanchicta Quishpichic Diostapish cushichinchic. 4Paica quishpirinamanta alli huillaica chashnatac cashcata yachac chayashpa, tucui gentecuna quishpirichunmi munan. 5Shuclla Diosmi tiyan. Dios-huan gentecunahuan alli tucuchicpish, shucllami tiyan. Paica runa tucungapac shamushca Jesucristomi. 6Tucui gentecunata quishpichingapac, paillatac japi tucushpa huañushpami, Dios munashca punzhacuna pactacpica, quishpichic cashcata ricuchirca. 7Tucui caicunata mana israelcunaman crinamanta cashcata nic alli huillaita huillashpa yachachichunmi, Jesusca ñucata acllarca. Ñucaca mana llullashpami, chashnatac cashcata nini.
8Jesusta cric caricunaca, maipi cashpapish mana piñarishpa, mana piñanacushpa, jahuaman maquita chutashpa alli shunguhuan Diosta mañachunmi munani. 9Shinallatac huarmicuna churarishpapish, churana cashca shina churarichun. Umata huatallishpapish ama yallita allichirishpa curimanta, perlasmanta ruhuashcacunahuan shinallatac yalli valic churanacunahuanpish ama allichirichunmi munani. 10Chaipac randica Diosta cazuc huarmicuna ruhuana cashca shina, imapish allicunallata ruhuachun ninimi. 11Huarmica yachachiccunata cazushpa, upalla uyashpa yachacuchunmi nini. 12Caricunata mandashpa, tandanacuipi yachachichunca mana munanichu, ashtahuanpish upalla cachunmi nini. 13Diosca Adantaracmi ruhuarca. Quipatami Evataca ruhuarca. 14Shinallatac mana Adanchu pandachishcaca carca, ashtahuanpish Evami diablo pandachicpi, Dios mandashcata mana cazushpa juchapi urmarca. 15Shina cashpapish huahuacunata charic huarmica alli cric cashpa, cuyashpa, alli yuyaihuan, Diospaclla causashpaca quishpiringami.
Currently Selected:
1 TIMOTEO 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.