1 CORINTIOS 11
11
1Ima shinami ñuca Cristota catishpa causacuni, chai shinallatac cancunapish ñuca shina causaichic.
Huarmicuna cultopi ima shina canamanta
2Cancuna ñuca yachachishcata cazushpa, ñucata yuyarishpa causacushcamantaca alli ninimi. 3Shina cacpipish, Cristoca caripac uma cashcata, cutin carica huarmipac uma cashcata, Diosca Cristopac uma cashcata yachachunmi munani. 4Maijan caripish, umata tapallishpa, Diosta mañashpa, mana cashpaca Diosmanta huillacushpaca Cristotami pingaichin. 5Huarmicuna umata mana tapallishpa, Diosta mañashpa, mana cashpaca Diosmanta huillacushpaca cusatami pingaichin. Umata mana tapallishca huarmica, acchata pitishca shinami. 6Shuc huarmi umata mana tapallisha nishpaca, acchata pitichun. Acchata tucui pitichina pingai cacpica, umata tapallichun. 7Carica Dios shina cashcamanta, shinallatac Diospac cushicuita ricuchic cashcamantami, umata mana tapallina can. Ashtahuanpish huarmica caripac cushicuitami ricuchin. 8Carica mana huarmimantachu tiyarca, ashtahuanpish huarmimi carimanta tiyarca. 9Shinallatac Diosca caritaca mana huarmimanchu ruhuarca, ashtahuanpish huarmitami cariman ruhuarca. 10Chaimantami huarmica carita, angelcunata respetota charishcamanta umata tapallina can. 11Ashtahuanpish Apunchic Jesucristopac ñaupapica, caripish mana huarmita yallichu, shinallatac huarmipish mana carita yallichu. 12Ima shinami huarmica carimanta tiyan, chashnallatacmi caripish huarmimanta huacharin. Chaica, tucuimi Diosmanta tiyan.
13Huarmicuna umata mana tapallishpa, Diosta mañana mana alli cashcataca cancunallatac yuyarichic. 14Cari acchata huiñachishpa, pingai tucushcataca, quiquin yuyaillatacmi ricuchin. 15Ashtahuanpish huarmi accha huiñachinaca allimi. Umata tapallirichunmi, chashna acchata huiñachichun Diosca cushca. 16Caicunamanta maijan mana uyasha nishpa, rimaccunataca: Ñucanchicpish, Diospaclla tandanacushca criccunapish, shuctaclaya causana tiyashcataca mana yachanchicchu.
Jesús huañushcata yuyarishpa micunatamana alli yuyaihuan micuccuna tiyashcamanta
17Caicunata rimashpaca mana cancunata alli nigrinichu. Cancuna tandanacushpaca, allita ruhuanapac randica, mana allitami ruhuanguichic. 18Puntaca, cancuna tandanacushpapish, chicanyarinacui tiyan nictami uyani. Chai nishcacunaca, ciertomi canga yuyanimi. 19Cancunapurapi alli cric tiyashcata yachangapacca, chicanyarinacui tiyanami can. 20Cancuna chicanyarinacushpa, Apunchic Jesús huañushcata yuyarishpa micushcaca yangallami. 21Chashnami maijancunaca micungapac rishpaca, mana shuyashpa micunguichic. Maijancunaca yarcaihuanmi saquirin. Maijancunaca machactami ubiashcanguichic. 22Cancunaca, ¿manachu micungapac, ubiangapacca huasita charinguichic? ¿Diospaclla cac tandanacushca criccunatachu yangapi churasha ninguichic? ¿Imata mana chariccunatachu pingaipi churasha ninguichic? ¿Chaitaca allimi nishachu? ¡Chaitaca mana alli canichu!
Apunchic Jesús huañushcata yuyarishpa micunamanta
(Mt 26.26-29; Mr 14.22-25; Lc 22.14-20)
23Cancunaman yachachishcataca, Apunchic Jesusmantami chasquircani. Apunchic Jesusca paita japichina tutallatacmi tandata japishpa, 24Diosta pagui nishpa, chaupishpaca: «Caica cancunamanta llaquita apana ñuca aichami. Ñucata yuyarishpa micucunguichiclla» nirca. 25Shinallatac vaso vinota japishpaca: «Cai vaso vinoca mushuc ari ninacuita ricuchic, ñuca yahuarmi. Ñucata yuyarishpa ubiacunguichiclla» nirca. 26Chai shina tandata micushpa, vaso vinota ubiashpa, Apunchic Jesús cutimungacaman pai huañushcata huillacunguichic.
Ima shina Apunchic Jesús huañushcata yuyarishpa micunamanta
27Maijanpish Apunchic Jesús huañushcata yuyarishpa, (jahua shungullahuan) micucca Jesuspac aichatapish, yahuartapish yangapi churashpami juchallin. 28Chaimantami manarac micushpa, manarac ubiashpa, quiquin ima shina cashcatarac yuyarina can. 29Maijanpish Apunchic Jesuspac aicha cashcata, paipac yahuar cashcata mana yachashpa micucca, paillatac llaqui tucungapacmi micun, ubian. 30Chaimantami cancunapurapica tauca ungushcacuna, irquiyashcacuna canguichic. Maijancunacarin ña huañushcacunami. 31Manarac micushpa, ñucanchic quiquinllatac ima shina cashcata alli yuyarishpa micushpaca, mana juchanchishcachu canchicman. 32Apunchic Jesús llaquichishpaca ñucanchicpish cai pachapaclla causaccunahuan ama jatun llaquiman richunmi llaquichin.
33Chaimanta cuyashca criccuna, Apunchic Jesús huañushcata yuyarishpa micungapac tandanacushpaca, shuyanacushpa micunguichic. 34Maijanpish yarcaihuan cashpaca, quiquin huasillapitac micuchun. Tandanacuipi mana allita ruhuashcamanta Dios ama llaquichishca cachunmi, chashnaca nini. Caishuc allichinacunataca ñuca shamushpami allichisha.
Currently Selected:
1 CORINTIOS 11: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.