1 CORINTIOS 10
10
Ruhuashcalla dioscunata mana adorana cashcamanta
1Cuyashca criccuna, ñucanchic ñaupa taitacuna ima tucushcata yachachunmi munani. Paicunaca puyu llandupipishmi carca. Puca Cuchatami pasarcacuna. 2Chashna puyuhuanpish, cucha yacuhuanpish bautizaric shina tucushpami, Moises-huan shuc shinalla tucurcacuna. 3Tucui paicunami Dios cushca micunata micurcacuna. 4Dios cushca ubianatami ubiarcacuna. Paicunahuan ricuc Rumimanta llucshicuc yacutami ubiarcacuna. Chai Rumica Cristomi carca. 5Chashna cashpapish achcacunami Diospac ñaupapica mana alli carcacuna. Chaimantami chai shitashca pamballapitac huañurcacuna.
6Tucui chaicunaca, paicuna shina ñucanchicpish ama millaita ruhuanata munachunmi chashnaca tucurca. 7Chaimanta paicunapuramanta maijancuna shina, ruhuashcalla dioscunata mana adoranachu canchic. Dios quillcachishcapica: «Gentecunaca micungapac, ubiangapac tiyarircami. Quipaca cushicungapacmi jatarirca» ninmi. 8Paicunapuramanta maijancuna shina, mana huainayanachu canchic. Chashna ruhuashpami, shuc punzhallapi ishcai chunga quimsa huaranga huañurca. 9Paicunapuramanta maijancuna shina, Mandac Diosta mana pandachisha ninachu canchic. Chashna ruhuashpami, paicunaca culebra canishca huañurcacuna. 10Paicunapuramanta maijancuna shina, ama Diosta rimashpa piñachichicchu. Chashna piñachishcamantami, chai huañuchic ángel shamushpa huañuchirca.
11Ñaupa taitacuna chashna tucushcaca ñucanchicta yuyachingapacmi tucushca. Shinallatac tucuri punzhacunapi causacucpi, ñucanchicta yachachingapacmi, Dios quillcachishcapi quillcachishca cashca. 12Chaimanta pipish ama “allimi cani” nichun, pacta pairac urmanman. 13Cancunaca pi mana apaipac llaquitaca mana apashcanguichicchu. Diosca cancuna mana apaipac llaquita apachunca, mana munanchu. Ashtahuanpish llaquita apashpapish, chai llaquimanta llucshichunmi ayudanga.
14Chaimanta cuyashca criccuna, ruhuashcalla dioscunata ama adoraichicchu. 15Yachaccunaman shinami rimani. Ñuca nishcataca cancunallatac yuyarichic. 16Dios cushca vinota ubiashpa, Diosta pagui nishpaca, ¿manachu Cristopac yahuarhuan shuc shinalla tucunchic? Tandata micushpaca, ¿manachu Cristopac cuerpohuan shuc shinalla tucunchic? 17Taucacuna cashpapish, tucui mashna chai tandallatatac micushpaca, tucui criccunami shuc cuerpo shina canchic.
18Israelcunata ricushpa yuyarichic. Animalta huañuchishpa, altarpi rupachishca aichata micuccunaca, ¿manachu Dios-huan shuc shinalla tucuncuna? 19Chashna nishpaca, ruhuashcalla dioscunaca valinmi. Chai dioscunaman cushpa huañuchishca aichapish valinmi, mana nisha ninichu. 20Ashtahuanpish ñucaca: “Diosta mana ricsiccunaca diablomanmi animalcunata huañuchishpa cuncuna, mana Diosman cuncunachu. Chaimanta ama diabloman cuccunahuan tandarichun” ninimi. 21Mana (chai ratollatac) Apunchic Jesuspac vasomantapish, diablopac vasomantapish ubiai pudinguichicchu. Shinallatac mana Apunchic Jesuspac mizamantapish, diablopac mizamantapish micui pudinguichicchu. 22¿Apunchic Jesustachu piñachisha ninguichic? ¿Ñucanchicca paita yallichu canchic?
Imata ruhuashpapish, Dios alli nishca cachun ruhuanamanta
23Gentecunaca: “Imata ruhuasha nishpapish, ruhuanallami” nincunami. Chaica chashnatacmi. Shina cacpipish, criccunata sinchiyachingapacca mana tucuichu alli can. 24Pipish ama quiquinpac allita mashcachun, ashtahuanpish shuccunapac allita mashcachun.
25Aicha catuccuna tucui catushcata, ama caita chaita yuyashpa micuichiclla. 26Chaica, cai pachapish, tucui cai pachapi tiyashcapish Mandac Diospacmi.
27Maijan mana cric micunata carangapac cayacpica, rinata munashpaca, ama caita chaita yuyashpa, tucui carashcata micuichiclla. 28Shina cacpipish maijan: «Caica animalta huañuchishpa, ruhuashcalla diosman cushcami» nicpica, ama micuichicchu. Chai huillac runamantapish, yuyaipi mana cushilla cashcamantapishmi mana micuna cangui. 29Chai huillac runapac yuyaimantami nini, ashtahuanpish mana cambac yuyaimantaca. Ñuca imatapish ruhuashca, shuccunapac yuyaipi mana alli ricurichunca, mana munanichu. 30Ñuca Diosta pagui nishpa micucpica, ¿ima nishpatac ñuca micushcamanta shuccunaca rimanga? 31Chaimanta imata micushpapish, imata ubiashpapish, imata ruhuashpapish, Dios alli nishca cachun ruhuaichic. 32Cancunaca israelcunatapish, mana israelcunatapish, Diospaclla cac tandanacushca criccunatapish ama pandachichicchu. 33Ñucaca mana quiquinpac allita mashcashpami, imata ruhuashpapish tucuipac allipac, paicuna quishpirichun ruhuacuni.
Currently Selected:
1 CORINTIOS 10: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.