Гил 6
6
Ерусалимо́скирэ Чхая́ Ракирэ́на
1Карик да гия́ тыро́ пирамно́, ту, кон сан най шукарэдыр машки́р джувлендэ? Дрэ сави́ риг рисия́ тыро́ пирамно́, соб (кай) амэ тэ родас Лэс ту́са?
Ранякирэ-Джувлякири Зан
2Миро пирамно́ гия́ тэлэ́ дрэ пэ́скири у́нта, кэ бэтки [цветники-р.с.] приправэнца, тэ чалякирэлпэ дрэ унты (сады) и тэ кэдэл лилии. 3Мэ сом екх мирэ́ пирамнэ́скири, и миро пирамно́ исын екх миро: ёв чаравэла пэ́скири стада машки́р лилии.
Па́нджто Гилы́
Соломоно́скири Зан
4Ту сан шука́р сыр Тарза (Фирца), ту сан гожо-шука́р сыр Ерусалимо, ту сан трашаны сыр халадыбэна (полки) сцягэнца! 5Ри́скир криг пэ́скирэ якха́ ма́ндыр, пал-дова́ со ёнэ лэ́на упралыпэ́н пэ ма́ндэ, тырэ́ бала́ исын сыр бузнорэнгири (козэнгири) ста́ды, савэ́ джана тэлэ́ Галаадо́скирэ навучэ бэргицатыр. 6Тырэ́ дандорэ исын сыр бакрорэнгири стада, сави́ акана́ явдя́ морибнастыр, кажно лэ́ндыр биянэ́ла близнятэн, и ние́кх лэ́ндыр исын на ялово. 7Тырэ́ чхаморэ исын сыр пашорья (котэрорэ) гранатытконэ пхабэндыр, со исын тэл длэнго дыкхло. 8Исын шовдэша́ кралицы, и охтодэша́ бисовлахакирэ джувля́, и исын бут патывалэ́ чхая́, со нашты́ тэ гинэс: 9нэ ту, ми́ри голу́мбица, сан мири́ екхори, мири́ най фэдэды́р, ту сан екхори пэ́скирэ датэ, тыри́ дай, кон бияндя́ тут, отдэ́ла ило́ буты́р ту́кэ. Сарэ́ патывалэ́ джувля́ дыкхнэ́ ла, и ёнэ кхардэ́ тут бахталяса. 10Кон жа исын ёй, сави́ зяинэла сыр зло́ко (ра́нко), сави́ исын шукарни сыр чхон, ясно сыр кхам, исын трашаны сыр халадыбэна сцягэнца?
Ранякирэ-Джувлякири Зан
11Мэ гиём тэлэ́ дрэ пэґэнгэ́нгири у́нта (садо), тэ дыкха́в чарья́ пир до́ло, тэ дыкха́в, ци розмэкцяпэ винаградо (дракх), ци гранатытка пхабэлыня лулудинэ. 12Анги́л дава́, сыр мэ ґалыём, миро ди чхудя́ ман дрэ барэ́-рангирэ марибны́тка вурдэна́ мирэ́ народо́стыр.
Ерусалимо́скирэ Чхая́
13Рисёв, рисёв, Сулами́те, рисё́в, рисё́в, соб (кай) амэ могинасас тэ дыкхас пэ ту́тэ.
Ранякирэ – Джувлякири Зан
14[7.1-р.с.] Со́скэ тумэ́нгэ исын пир ило́ тэ дыкхэ́н пэ ма́ндэ, сыр пэ дуя́-рядэ́нгиро (Манаимоскирэ/халадытко) кхэлыбэн.
Currently Selected:
Гил 6: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
