Псалм 89
89
[88-р.с.] 1Сыклякирибнаскири Гилы́ Ефаностыр Эзрахитостыр.
2Мэ ўса́ды (сак) ява́ва тэ бага́в пал Ра́скирэ-Дэвлэ́скири лачхэ́-илы́ткима мирэ́ мо́са, нэ мэ ява́ва тэ роспхэнав сарэ́нгэ пал Тыро́ патяибэ́н родо́стыр кэ ро́до. 3Пал-дова́ со мэ пхэндём: “Лачхэ́-илы́ткима явэ́ла тэ ячэ́лпэ пэ сарэ́ ве́ки.” Ту зорьякирдян Пэ́скиро патяибэ́н аж кэ са́мо болыбэ́н. 4Мэ счхудём завето Мирэ́ выкэдынэ́ манушэ́нца. Мэ совлахадём Давидо́скэ, мирэ́ писхари́скэ. 5Мэ да́ва зор Тырэ́ родо́скэ пэ сарэ́ ве́ки, и ґазда́ва Тыро́ троно пэ сарэ́ ро́ды. Сэ́ла. 6И болыбна́скирэ Янго́лы явэ́на тэ шарэ́н Тут пал Тырэ́ ди́вы, Раё Дэ́вла, адя́кэ-паць пал Тыро́ патяибэ́н пэ свэнтонэнгиро скэдыибэ́н. 7Кон пэ болыбэ́н исын равно Ра́скэ-Дэвлэ́скэ? Конэ́с машки́р болыбна́скирэ Янголэндэ сашты́ тэ припарувэн Ра́са-Дэвлэ́са. 8Дэвэ́л исын баро́ кэ дар пэ свэнтонэнгиро скэдыибэ́н, Ёв исын зоралыпнаскиро, соб (кай) сарэ́, кон исын пашы́л Лэ́стэ, тэ дэн бари паты́в Лэ́скэ. 9О, Раё Дэ́вла, Дэвэ́л болыбна́скирэ-янголэ́нгиро! Конэ́стэ исын дасаво зоралыпэ́н сыр Ту́тэ, Раё Дэ́вла? Ту сан патяибны́тко дро саро́. 10Ту рикирэса зор пэ мо́рё (дэрья́в), сыр ёв холямэс ґлуминэла: ке́ли лэ́скирэ валны ґаздэ́напэ вучэ́с, Ту штылякирэса лэн. 11Ту пхарадян Еги́пто пэ котэра́, сыр кодолэ́с, кон исын мулякирдо; Ту росчхурдыян Тырэ вэргэ́н Тырэ зоралыпнаскирэ вастэ́са. 12Тыро́ исын болыбэ́н и Тыри́ исын пхув, свэ́то и саро́, со́са ёв исын пхэрдо́. Ту зачхудян лэн. 13Ту создыян паш-рати́тко и паш-дывэсы́тко риг, Фаворо и Ермоно радынэ́напэ Тырэ́ лавэ́стыр. 14Тыро́ псико́ исын зоралыпнаскиро; зорало́ исын Тыро́ васт, вучо́ исын Тыро́ чачо́ васт. 15Чачипэ́н и чачуно́ сэ́ндо рикирэ́на Тыро́ троно, лачхэ́-илы́ткима и патяибэ́н джа́на анги́л Ту́тэ. 16Бахталэ́ исын мануша́, савэ́ джинэ́на ра́дыма Тырэ́ заня́тыр (глося́тыр): ёнэ дживэ́на пир дуд (свэ́то), саво́ джа́ла Ту́тыр. 17Ёнэ цэ́ло дывэ́с радынэ́напэ Тырэ́ лавэ́стыр; и ёнэ ґаздэ́напэ радыма́са Тырэ́ чачипнастыр. 18Пал-дова́ со Ту дэ́са сла́ва лэ́нгирэ зорьякэ, и Ту ґаздэса амэн вучэ́с Тырэ́ ласкаса. 19Пал-дова́ со Рай Дэвэ́л исын амаро́ шчы́то, и амаро́ Кра́ли исын Свэнтонэ́ Израилёстыр. 20Вари-сыр Ту ракирдян дро суно́ Пэ́скирэ Свэнтонэскэ и Ту пхэндя́н: “Мэ дыём васт екхэ муршканэскэ, Мэ ґаздыём лэс пэ троно, савэ́с Мэ выкэдыём манушэ́ндыр. 21Мэ латхём Мирэ́ писхари́с Давидо́с, мэ помакхцём лэс Мирэ́ свэнтонэ́ оливитконэ дзэтэса (елеёса): 22Мэ чхува́ва Пэ́скири бурнык (ладожка) тэ подрикирав лэс, и Миро васт явэ́ла тэ зорьякирэл лэс. 23Вэ́рго на дэ́ла дукха́ лэс и чоро ману́ш на притасавэла лэс. 24И мэ пхаравава лэ́скирэ вэргэ́н анги́л лэ́скиро муй, и Мэ равава одолэ́н, савэ́ бидыкхэна лэс. 25И Миро патяибэ́н и дро́го лачхипэ́н явэ́на лэ́са и лэ́скиро ро́до явэ́ла ґаздыно́ шарибнаса Мирэ́ лавэ́са. 26Мэ чхува́ва лэ́скиро васт пэ мо́рё (дэрья́в) и лэ́скиро чачо́ васт пэ рэ́ки (лэня́). 27Ёв явэ́ла тэ дэл го́дла Ма́нгэ! Ту сан миро Дад, миро Дэвэ́л и Ска́ла тэ зракхавпэ.” 28Мэ кэра́ва лэс Мирэ́ пэрвонэса (англатунэса), саво́ явэ́ла са́мо вучо́ пхувья́кирэ кральендыр. 29Мэ ява́ва тэ ракхав Мири́ лачхэ́-илы́ткима пэ сарэ́ ве́ки, и Миро завето ячэ́лапэ твардэс лэ́са. 30И мэ ўса́ды (сак) ява́ва тэ зорьякирав лэ́скирэ чхавэ́н и лэ́скиро троно явэ́ла ада́кицы дывэса́, кицы́ исын болыбэ́н. 31Ко́ли лэ́скирэ чхавэ́ мэкэ́на Ман, и на явэ́на тэ дживэ́н пир Мирэ́ припхэныбэна́; 32пал-дова́ со ёнэ явэ́на тэ пхагирэн Мирэ́ стату́ты (уставы) и на явэ́на тэ ракхэ́н Мирэ́ припхэныбэна́: 33тэды Мэ чхува́ва ка́ра дэстэса пэ лэ́ндэ пал лэ́нгирэ чорэ́ рэ́нды, и Мэ пэкавава лэн пал лэ́нгирэ грэ́хи. 34Нэ мэ на лава́ криг Мири́ лачхэ́-илы́ткима Давидостыр и Мэ на домэкава, соб (кай) миро патяибэ́н тэ хасёл; 35Мэ на пхагирава Миро завето, Мэ на парувава дова́, со выгия́ Мирэ́ мо́стыр. 36Екхвар мэ совлахадём Мирэ́ Свэнтымаса, со мэ ние́кхвар на хохавава Давидо́с: 37лэ́скиро ро́до ўса́ды (сак) ячэ́лапэ и лэ́скиро троно явэ́ла ґара́ (длу́гэс), сыр кхам, со свэнцынэла анги́л Ма́ндэ. 38Ёв явэ́ла ўса́ды (сак) сыр чхон и сыр патяибны́тко якхи́тко пэ болыбэ́н. Сэ́ла. 39Нэ Ту, Раё Дэ́вла, ячкирдян и на прилыян Лэс, Ту са́нас древа́н холямо́ пэ Тырэ́ помакхнэ писхаристэ, 40Ту рисиян криг Заветостыр, со Ту дыя́н Тырэ́ дынари́скэ, Ту чхурдыян вя́нка (коро́на) пэ пхув. 41Ту пхагирдян сарэ́ лэ́скирэ форо́скирэ ограды, Ту пирикэрдян сарэ́ форо́скирэ рикирибэна дрэ радэ бара́. 42Сарэ́, кон джа́ла маму́й, обчорэна лэс, а сарэ́ пашатунэ́ обракирэна лэс. 43Ту дыя́н зор манушэ́скирэ чачэ́ вастэскэ; саво́ притасавэлас лэс, Ту кэрдя́н, соб (кай) сарэ́ лэ́скирэ вэ́рги тэ радынэ́нпэ: 44ґа́да, Ту тэмпякирдян лэ́скирэ-курталакири во́стрима (чолыпэ́н), и Ту на ґаздыян лэс дро марибэ́н. 45Ту кэрдя́н, со лэ́скири сла́ва пирияця́ тэ зяинэл и Ту чхурдыян пэ пхув лэ́скиро троно; 46Ту кэрдя́н тыкнэды́р лэ́скирэ тырнэ бэрша́, Ту учхакирдян лэс ладжаса. Сэ́ла. 47О, Раё Дэ́вла! Кицы́ явэ́са Ту тэ гарадёс? Ци явэ́ла Тыри́ бари холын тэ хачол сыр яг? 48Ри́пир, мэ мангав Тут: саво́ миро джиибэ́н исын. Ваш саво́ харныпэ́н (суе́та) Ту создыян манушытконэ́ чхавэ́н? 49Саво́ ману́ш сашты́ тэ дживэ́л и тэ на дыкхэ́л мэрибэ́н? Ци зракхэ́ла ёв пэ́скиро ди люноскирэ зорья́тыр? Сэ́ла. 50О, Раё Дэ́вла, кай исын Тыро́ дро́го лачхипэ́н, саво́ ґарэдыр сыс Ту́тэ, со Ту совлахадян Давидо́скэ Тырэ́ патяибна́са? 51Ри́пир, о, Раё Дэ́вла, сыр обракирэна Тырэ́ дынари́с! Со мэ пирилыджиём пал брэк, сыр бут мануша́ обракирэна, 52со́са Тырэ́ вэ́рги прокошэна Тут, о Раё Дэ́вла, со́са ёнэ прокошэна пенты (кхурья́) Тырэ́ помакхнэскэ? 53[р.с.] Тэ шарэ́н усады (сак) Рас-Дэвлэ́с. Ами́нь и ами́нь.
Currently Selected:
Псалм 89: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
