Псалм 78
78
[77-р.с.] 1Асафоскиро Сыклякирибэ́н.
О, мирэ́ мануша́лэ! Шунэ́н миро сыклякирибэ́н, причхувэ́н кана́ кэ лава́ мирэ́. 2Мэ отпхандава мирэ́ ушта́ тэ пхэна́в припхэныбэ́н (притча) тумэ́нгэ; мэ ява́ва тэ ракира́в шэрэпхарибнытка (загадки) ґалыибнаса, со ракирдэ́ ґара́, 3савэ́ амэ шундя́м, и со амэ джина́са, и со амарэ́ дада́ роспхэндлэ́ амэ́нгэ. 4Далэ́ лава́ амэ на гараваса лэ́нгирэ чхавэ́ндыр, соб (кай) тэ пирипхэнас родэ́нгэ, со явэ́на анги́л, савэ́ явэ́на тэ шарэ́н Рас-Дэвлэ́с, 5пал лэ́скиро зоралыпэ́н и Лэ́скирэ барэ́ ди́вна рэ́нды, со Ёв кэрдя́. 6Пал-дова́ со Ёв чхудя́ Лэ́скиро допхэныбэ́н дро Израилё, дыя́ Зако́но Яково́скэ, пал саво́ Ёв припхэндя́ амарэ́ дадэ́нгэ, соб (кай) ёнэ тэ сыклякирэ́н лэ́нгирэ чхавэ́н; соб (кай) ро́до, со явэ́ла анги́л, тэ могинэл тэ джинэ́л, и, соб (кай) чхавэ́, савэ́ анги́л бияндёна, адя́кэ-паць тэ роспхэнэ́н Зако́но пэ́скрэ чхавэ́нгэ, 7соб (кай) ёнэ зоралэ́с тэ ужакирэн лачхипэ́н Дэвлэ́стыр, и тэ на бистрэн Дэвлэ́скирэ бутя́, а тэ кандэ́н Лэ́скирэ припхэныбэна́. 8Мэк тэ на явэ́н ёнэ сыр лэ́нгирэ дада́, савэнгиро ро́до сыс накандуно и бунтяритко, и конэ́скиро ро́до на сарэ́са рискирдя́ Пэскро ило́ Дэвлэ́скэ, и конэ́скиро ду́хо (фа́но) на сыс патяибны́тко Дэвлэ́скэ. 9Ефремо́скирэ чхавэ́, савэ́ндэ сыс дрэ васта́ луки, рисинэ́ палэ дро марибнаскиро дывэ́с. 10Ёнэ на кандынэ́ Дэвлэ́скиро Зако́но и отпхэндлэпэ тэ дживэ́н пир Лэ́скиро Зако́но; 11и ёнэ бистырдэ пал дова́, со Ёв кэрдя́ и Лэ́скирэ барэ́ ди́вы, савэ́ Ёв сыкадя́ лэ́нгэ. 12Анги́л лэ́нгирэ-дадэнги́рэ якха́ Ёв кэрдя́ ди́вы пир Египто́скири пхув, пэ Цоаноскири фэ́лда. 13Ёв роскэрдя́ пэ дуй паша́ мо́рё (дэрья́в) и пирилыджия лэн пир пани́. Ёв кэрдя́ адя́кэ, со паня́ тэрдинэ́ сыр ва́нта. 14И Ёв лыджия́ лэн болыбна́скирэ облокоса дывэсэ́, а ягакирэ дудэса (свэтоса) раты́. 15Ёв роскэрдя́ пэ дуй паша́ скалы пэ чхучи́ пхув и панякирдя лэн чалэ́с лэ́ндыр, сыр барэ́ панингэндыр; 16и Ёв кэрдя́ адя́кэ, со сыгна паня́ тхадынэ скалэндыр, и со паня́ тхадынэ сы́гэс сыр барэ́ панинга́. 17Нэ ёнэ сароекх буты́р кэрдэ́ грэ́хи проти Лэ́стэ и ґаздэнас бу́нто пэ чхучи́ пхув пэ Най Вучэдырэскирэстэ, 18и ёнэ пропатякирэнас Дэвлэ́с дро пэ́скиро ило́, ке́ли ёнэ мангнэ́ хабэ́н пир пэ́скиро ди; 19и ёнэ ракирдэ́ пэ Дэвлэ́стэ, пхэни́: “Ци дэ́ла ра́да Дэвэ́л тэ кэрэ́л сками́нд пэ чхучи́ пхув?” 20Дыкхэ́н! Ёв пэкадя́ дрэ ска́ла и паня́ дынэпэ тэ тхадэн и барэ́ панинга́ пхэрдякирдэ саро́. Ци дэ́ла ра́да Ёв адя́кэ-паць тэ дэл маро́? Ци дорэсэ́ла Ёв мас Пэ́скирэ манушэ́нгэ? 21Палдава́ Рай Дэвэ́л шундя́ дава́, и Ёв древа́н холя́сыя, Лэ́скири холы́ росхачия пэ Израилёскирэ манушэ́ндэ и адя́кэ-паць холякирибэ́н ґаздыя́пэ пэ лэ́ндэ, 22со ёнэ на патяндынэ́ дрэ Дэвлэ́стэ и на рикирдэ наде́я, со Ёв дэ́ла васт лэ́нгэ. 23Нэ Ёв припхэндя́ облокэнгэ, со исын упра́л, и Ёв псирадя (откэрдя) болыбна́скирэ вудара́, 24и Ёв чхудя́ сыр брышы́нд пэ лэ́ндэ (манна) тэ хан и Ёв дыя́ лэ́нгэ болыбна́скиро гив. 25Мануша́ ханас Янголэ́нгиро хабэ́н: Ёв бичхадя́ лэ́нгэ хабэ́н чалэ́с. 26Ёв кэрдя́ тэ пхурдэл вастокитко балва́л тэ пхурдэл дро болыбэ́н и лыджия́ англэ тэ пхурдэл балва́л зэрвонэ (левонэ) рига́тыр, 27И Ёв кэрдя́ тэ пэрэ́л мас пэ лэ́ндэ сыр пра́хо и чириклэн пхакэнца, сыр пра́хо пэ морёскиро (дэрьявэ́скиро) брэ́го. 28И Ёв кэрдя́ адя́кэ, со ёнэ пынэ́ машки́р пэ́скиро таборо (лод), трусця́л пэ́скирэ ша́тры; 29и ёнэ ханэ́ и чалынэ пхэрдэ́с и Ёв дыя́ лэ́нгэ дова́, со ёнэ битукоскиро камлэ́. 30Ёнэ на гинэ́ криг пэ́скирэ хабнастыр, со сыс лэ́ндэ битукоскиро, лэ́нгиро хабэ́н уса́ сыс дрэ лэ́нгирэ муя́, 31ке́ли Дэвлэ́скири холы́ явдя́ пэ лэ́ндэ и мулякирдя́ най тхулэдыронэн лэ́ндыр и, акэ, зарадя выкэдынэ́ манушэ́н Израилёстыр. 32Нэ на дыкхи́ пэ дава́, ёнэ ўса кэрдэ́ грэ́хи, и ёнэ на патяндынэ́ дрэ Лэ́скирэ барэ́ ди́вна бутя́, 33палдава́ Ёв и домэкця, со лэ́нгирэ дывэса́ сыс сыр балвалякиро пхурдыпэн, а лэ́нгирэ бэрша́ джа́нас дрэ дар кэ мэрибэ́н. 34Ке́ли Ёв замарэлас лэн, тэды ёнэ родэнас Лэс, и ёнэ рискирэнас пэ́скиро ило́ и зоралэ́с родэнас Дэвлэ́с, 35и ёнэ рипирэнас нэвэ́стыр, со Дэвэ́л исын лэ́нгири ска́ла, и со Най Вучэдырэскиро Дэвэ́л исын Одова́, Кон зракхэ́ла лэн. 36Ёнэ шарэнас Лэс на илэ́стыр пэ́скирэ муенца, и лэ́нгирэ чиба́ хохавэнас Лэ́скэ, 37а лэ́нгиро ило́ на зоралэ́с патялас дрэ Лэ́стэ и ёнэ на сыс патяибнытка анги́л Лэ́скиро завето. 38Нэ Ёв исын лачхэ́-илэ́скиро: Ёв отмэкця́ чорипэ́н и на пхагирдя́ лэн. Бут мо́лы Ёв рискирэлас криг Пэ́скири холы́, и Ёв на джангавэлас Пэ́скири бари холын. 39Пал-дова́ со Ёв рипирдя, со ёнэ сыс фэ́ни (то́ка) манушы́тко лоч (плоть), сави́ исын на ве́чно, сы́рбы балвалякиро пхурдыпэн, со джа́ла криг и на рисёла палэ. 40Сыр бут мо́лы ёнэ на кандэнас Лэс пэ чхучи́ пхув, ёнэ холякирэнас Лэс пэ биманушэнгиро штэ́то. 41И ёнэ нэвэ́стыр и нэвэ́стыр рисёнас палэ, пропатякирэнас Дэвлэ́с и дукхавэнас Свэнтонэ́ Дэвлэ́с Израилёстыр. 42Ёнэ на рипирдэ Лэ́скиро васт дро дова́ дывэ́с, ке́ли Ёв ракхця́ лэн вэргостыр, саво́ тасадя лэн, 43сыр Ёв сыкадя́ Пэ́скирэ знаме́нии (ґертыка́) дро Еги́пто, сыр кэрдя́ Пэ́скирэ ди́вы пэ Цоаноскирэ фэ́лды; 44и пирикэрдя лэ́нгирэ рэ́ки (лэня́) и рэкицы дро рат, соб (кай) ёнэ на могинэ́нас тэ пьен. 45Ёв бичхадя́ дукханэ матлен (насекомонэн) тэ хан лэ́нгирэ маса́ и цапнен (жамбэн), савэ́ хасякирэнас лэн; 46Ёв адя́кэ-паць отдыя́ лэ́нгирэ-гивэнгиро умалото раупэ́нгэ (гусиницэ́нгэ) тэ хан, а лэ́нгирэ бутя́ скочкэнгэ; 47Ёв хасякирдя́ лэ́нгирэ винаграды (дракха́) ґрадоса и лэ́нгирэ сикаморытка дрэвы мразоса. 48Ёв отдыя́ лэ́нгирэ мурдалэ́н тэл ґрадо и лэ́нгирэ ґурты тэл барэ́ блискави́цы 49Ёв бичхадя́ пэ лэ́ндэ сы́рбы яг Пэ́скирэ холя́тыр, холякирибэ́н, холякири, зор и пхарипэ́н, ке́ли мэрибнаскирэ Янго́лы пынэ́ пэ лэ́ндэ. 50Ёв вымэкця Пэ́скири холы́, Ёв на выракхэлас лэ́нгирэ дия́ мэрибна́стыр, а Ёв отдыя́ лэн мэрибнытконэ франсэнгэ (морово́скэ). 51И Ёв мулякирдя́ кажнонэ́ пэрвонэ́ биято́с дро Еги́пто, пэрвонэ́ родоскирэс, савэ́стыр лэ́лапэ зор пэ Хамоскирэ ша́тры, 52И Ёв кэрдя́, со Лэ́скирэ мануша́ гинэ́ анги́л сыр бакрэ́ и Ёв лыджия́ лэн пир чхучи́ пхув сыр ґурто; 53и Ёв лыджия́ лэн бидаракирэс, ёнэ на страхадёнас, а мо́рё (дэрья́в) чхакирдя упралэстыр лэ́нгирэ вэргэ́н. 54И Ёв долыджия лэн кэ кусты́ка (кэ грани́цы) Пэ́скирэ Свэнтонэ́-Пхувьякири, кэ бэ́рга, со лэ́скиро чачо́ васт дорэсця́; 55И Ёв традыя́ криг Наюды́тка на́цыи анги́л лэ́ндэ, и Ёв роскэрдя́ пэ паша́ пхув машки́р лэ́ндэ, сыр мэкно́ миштыпэ́н пир чэрта, и Ёв кэрдя́, соб (кай) Израилёскирэ ро́ды тэ дживэ́н пэ пэ́скирэ ша́тры. 56Нэ ёнэ пропатякирэнас Най Вучэдырэскирэ Дэвлэ́с, прэзэнтынэнас Лэс и ёнэ на рикирэнаспэ кэ Лэ́скирэ допхэныбэна. 57И ёнэ дынэпэ палэ и сыс напатяибнытка сыр лэ́нгирэ дада́: ёнэ вырисёнас сыр банго́ лу́ко. 58И ёнэ холякирдэ Лэс пэ́скирэ штэтэнца пэ бэ́ргицы, кай ёнэ дэ́нас паты́в и ёнэ прэзэнтынэнас (дражнинэнас) Лэс лэ́нгирэ вычингирдэ идолэнца. 59Дэвэ́л шундя́ дава́, Ёв холя́сыя, и Ёв традыя́ криг Израилё дур Пэ́стыр: 60Ёв мэкця́ Пэ́скиро Штэ́то Сило́мо, ша́тра, кай Ёв дживдя́ машки́р манушэ́ндэ, 61И Ёв отдыя́ Пэ́скиро зоралыпэ́н дро пле́но и Пэ́скири сла́ва дрэ вэргэ́нгирэ васта́; 62И Ёв адя́кэ-паць отдыя́ тэл курта́ла Лэ́скирэ манушэ́н и сыс холямо́ пэ Лэ́скирэ чхавэ́ндэ: 63яг схая Лэ́скирэ-тырнэ манушэ́н и Лэ́скирэ патывалэ́ джувле́н на багандлэ бьявитка гиля́. 64Лэ́нгирэ рашая́ хасёнас куртала́тыр, лэ́нгирэ пивля (удовы) на могиндлэ́ тэ ровэ́н. 65Тэ́ньци Рай Дэвэ́л джангадыя сы́рбы соибнастыр, сы́рбы кодова́ зоралыпнаскиро ману́ш, саво́ радынэ́лапэ ґодласа моля́тыр (виностыр); 66И Ёв традыя́ криг Пэ́скирэ вэргэ́н, Ёв чхудя́ лэн пэ ладж, со ние́кхвар на кончынэлапэ. 67И Ёв отпхэндяпэ Ёза́скирэ шатратыр, и Ёв на выкэдыя́ Ефремоскиро ро́до, 68нэ Ёв выкэдыя́ Юда́скиро ро́до, Сионо́скири бэ́рга, сави́ Ёв выкэдыя́ Пэ́скэ; 69И Ёв ґаздыя́ Пэ́скиро Свэ́нто Штэ́то вучэ́с сыр бэ́рги, сыр пхув, сави́ Ёв зачхудя пэ сарэ́ ве́ки. 70И Ёв выкэдыя́ Давидо́с, Пэ́скирэ писхари́с, и Ёв лыя́ лэс бакрэ́нгирэ грэдатыр (дворостыр): 71Ёв лыя́ лэс бакрэ́ндыр, Саво́ дэ́нас цюци (колы́н) тыкнорэнгэ, Ёв лыя́ лэс тэ чаравэл Пэ́скирэ манушэ́н, Яковоскирэн и Израилёскирэн, Пэ́скирэ чхавэнгирэн. 72И Ёв чалякирдя лэн сарэ́н Пэ́скирэ илэ́стыр, и лыджия́ лэн Пэ́скирэ годьварэ́ вастэ́са.
Currently Selected:
Псалм 78: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
