Псалм 55
55
[54-р.с.] 1Хоро́скирэ Дирижоро́скэ пэ Балытка Струме́нты. Сыклякирибэ́н. Давидо́скиро Пса́лмо.
2О, Дэ́вла, причху́в кан кэ мири́ па́тери (модла) и на гарадёв, сыр мэ ровава: 3шун ман и отпхэн ма́нгэ: мэ псирава пэ́скэ и ладжава пэ́стыр 4вэргэ́нгирэ занендыр и фуе́ манушэ́ндыр, савэ́ тасавэна ман. Ёнэ чхувэ́на банг пэ ма́ндэ и бидыкхэна ман дрэ холы́. 5Миро ило́ дукхала андра́л ма́ндэ и мэрибнаскири дар пыя́ пэ ма́ндэ, 6мэ издрава и трашаибэ́н явдя́ пэ ма́ндэ, и ман обухтылдя бари дар. 7И мэ пхэндём: “Кон дэ́лас пхака́ (крылы) ма́нгэ сыр голумбоскэ? Мэ тэды вурнявас криг и откхинёвавас, 8акэ, мэ дурьёвавас дур, и мэ ячававпэ тэ джива́в пэ чхучи́ пхув (пустыня). Сэ́ла. 9Мэ сыгнёвава тэ зракхавпэ зоралэ́ балвалятыр и барэ́ штормостыр.” 10Пхагир лэн, о Раё Дэ́вла, роскэ́р лэ́нгирэ чиба́ (чибья́); пал-дова́ со мэ дыкхцём, савэ́ ёнэ исын нахра́та (насильники) и кошэнапэ; 11ёнэ псирэ́на пир фо́ро пир лэ́скирэ ва́нты, дывэсэ́ и раты́ ёнэ кэрэ́на чорипэ́н и пхарипэ́н екх екхэ́скэ, 12хасибэ́н исын машкира́л дава́ фо́ро, хохаибэ́н и тасаибэн исын усады (сак) пэ лэ́скирэ вули́цы (га́сы). 13Пал-дова́ со дава́ исын на вэ́рго, саво́ обракирэла ман, мэ давас ра́да тэ лыджав дава́: ци явэ́лас адасаво́ ману́ш, саво́ бидыкхэла ман и ґаздэ́ла пэс шарибнаса пэ ма́ндэ, мэ гарадёвавас лэ́стыр, 14нэ дава́ ту сан, кадасаво́ сыр мэ сом, миро мал и миро пинджкирдо ману́ш, 15конэса амэ гудлэс ракирдям сарэ́ илэ́стыр и савэ́са амэ псирдям кхэтанэ́ явирэ скопоса манушэнгирэса дро Дэвлэ́скиро Кхэр. 16Мэк мэрибэ́н тэ ухтылэл лэн. Мэк ёнэ джидэ́ тэ джа́н тэлэ́ кэ штэ́то, кай исын лю́но (адо). Чорипэ́н исын дро лэ́нгиро кхэр и ило́. 17Нэ мэ кхара́ва Дэвлэ́с тэ помогинэл ма́нгэ и Рай Дэвэ́л зракхэ́ла ман. 18Бэльвэле́нца, тасярлэ́нца и дывэсэ́нца мэ ява́ва тэ жалинавпэ и тэ издрав роибнаса, и Ев явэла тэ шунэ́л мири́ зан, 19и Ёв выракхэла миро ди раманёса марибнастыр, со лыджинэ́ пэ ма́ндэ, со исын бут лэн проти ма́ндэ. 20Дэвэ́л явэла тэ шунэ́л и отпхэнэ́ла лэ́нгэ, дава́ Ёв, Саво́ исын пэ троно пэ сарэ́ ве́ки. Сэ́ла. Нэ ёнэ на парудёна, нанэ лэ́ндэ трашаибэ́н Дэвлэ́стыр. 21Ёнэ ґаздынэ́ васт пэ одолэ́ндэ, савэ́ сыс дро рама́нё лэ́нца; ёнэ пхагирдэ́ пэ́скиро доракирибэ́н; 22лава́ лэ́нгирэ мо́стыр сыс ґладкэдыр ксилэстыр, лэ́нгирэ пхэныбэна сыс ковлэдыр маслинитконэ дзэтэстыр (елеёстыр), нэ пала́л пал ландэ сыс востра (чолалэ) курталы. 23Мэк пэ́скиро кало́ пхарипэ́н пэ Растэ-Дэвлэ́стэ, и Ёв приракхэла тут. Ёв на домэкэла ние́кхвар, соб (кай) чачипнаскирэ мануша́ тэ обштавэнпэ. 24[р.с.] Нэ Ту, Дэ́вла, янэса тэлэ́ лэн дрэ хасибны́тко ґанби́н (яма); а мануша́, савэ́ прочхудэ рат и савэ́ хохавэнас, на продживэна пэ́скирэ паш дывэса́. Нэ мэ рисёва́ва кэ Ту, Дэ́вла, тэ зракхавпэ.
Currently Selected:
Псалм 55: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
