Псалм 25
25
[24-р.с.] 1Давидо́скиро Пса́лмо.
Ту́кэ, Раё Дэ́вла, мэ клонинавапэ патыва́са. 2О миро Дэ́вла! Мэ патя́ва дрэ Ту́тэ; на домэк, соб (кай) тэ явэ́л ладжаво ма́нгэ, соб (кай) мирэ́ вэ́рги (вроги) тэ на лэн вучипэ́н пэ ма́ндэ! 3Тэ на явэ́н адя́кэ-паць ладжакирдэ́ одолэ́, савэ́ рикирэ́на наде́я пэ Ту́тэ. Нэ тэ явэ́н ладжакирдэ́ одолэ́, савэ́ бунтуинэна би причынакиро. 4Раё Дэ́вла, сыка́в ма́нгэ Тыро́ дром, сыкля́кир ман Тырэ́ чачипнаскэ. 5Лы́джа ман тэ кэра́в пир Тыро́ чачипэ́н, сыкля́кир ман, пал-дова́ со Ту сан Дэвэ́л, Саво́ зракхэ́ла; пэ Ту́тэ исын наде́я со дывэ́с ма́ндэ. 6Пририпир, Раё Дэ́вла, Пэ́скиро тангипэ́н и лачхэ́-илы́ткима, пал-дова́ со ёнэ джа́на векэнца. 7На пририпир, сыр мэ тэрно́ пхагирдём Дэвлэ́скиро Зако́но и кэрдём грэ́хи, пал-дова́ со Ту сан лачхо́ кэ мануша́, пририпир пал ма́ндэ, Раё Дэ́вла, Тырэ́ лачхэ́-илыткиматыр. 8Рай Дэвэ́л исын лачхо́ и чачипна́скиро; палдава́ Ёв явэ́ла тэ сыклякирэ́н грэхитконэ́ манушэ́н тэ джа́н чачунэ́ дромэ́са: 9Ёв лыджа́ла кэ чачипэ́н одолэ́н, савэ́ ха́на мэ́ньки, Ёв сыклякирэ́ла лэн тэ джа́н чачунэ́ дромэ́са: 10Рай Дэвэ́л лыджа́ла пэ́скирэ дромэ́са одолэ́н, савэ́ приракхэна Лэ́скиро Зако́но и припхэныбэна́, лачхэ́-илыткимаса и чачипна́са. 11Ваш Тыро́ лав, Раё Дэ́вла, отмэк мири́ банг, пал-дова́ со ёй исын древа́н бари. 12Саво́ исын ману́ш, кон дарэ́ла Ра́стыр-Дэвлэ́стыр! Лэ́стыр ёв высыклёла дром, со лэ́скэ трэй тэ выкэдэл. 13Лэ́скиро ди ячэ́лапэ бахтало́, а Лэ́скирэ чхавэ́нгэ явэ́ла пхув сыр мэкно́ миштыпэ́н. 14Рай Дэвэ́л Пэ́скири сыкавэ́ла гарады ла́ска одолэ́нгэ, савэ́ дарэ́на Лэ́стыр. Ёв сыклякирэ́ла лэн пал Пэ́скиро Зако́но. 15Мэ кажно мо́ло дыкха́ва пэ Растэ-Дэвлэ́стэ, пал-дова́ со Ёв вытэрдэла мирэ́ ґэра́ фэлятыр. 16Подыкх пэ ма́ндэ и та́нгинэ (пожалин) ман, пал-дова́ со мэ сом екхджино́ и хава мэ́ньки. 17Пхарипэ́н пэ ило́ яця́ бутэды́р: вылы́джа ман мирэ́ барэ́ дара́тыр. 18Подыкх, сыр мэ хава мэ́ньки и пэ мирэ́ дукха́, и отмэк сарэ́ мирэ́ грэ́хи! 19Подыкх, сыр бут исын вэ́рги пашы́л ма́ндэ, сыр ёнэ бидыкхэна ман калэ́ илэ́са. 20Приракх миро ди и зра́кх ман, соб (кай) мэ тэ на явав ладжакирдо́, пал-дова́ со мэ гарадёвава пал Ту́тэ. 21Мэк миро лачхипэ́н и чачипэ́н тэ приракхэн ман, пал-дова́ со ма́ндэ исын наде́я пэ ту́тэ. 22Зра́кх, Дэ́вла, Израилё сарэ́ лэ́скирэ пхарипнэндыр.
Currently Selected:
Псалм 25: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
