Псалм 145
145
[144-р.с.] 1Давидо́скиро Шарибнытко Пса́лмо.
Мэ ява́ва тэ шара́в кэ вучипэ́н Тут, миро Дэ́вла, о Кра́ли и мэ ява́ва тэ вышарав Тыро́ лав усады (сак) и пэ сарэ́ ве́ки. 2Со дывэ́с мэ ява́ва тэ вышарав Тут, и мэ ява́ва тэ шара́в Тыро́ лав усады (сак) и пэ сарэ́ ве́ки. 3Древа́н баро́ исын Рай Дэвэ́л и исын мол, соб (кай) зоралэ́с тэ шарэ́н Лэс, и лэ́скиро барипэ́н нашты́ тэ ґалён. 4Ро́до родо́стыр явэ́на тэ шарэ́н Тырэ́ бутя́ и явэ́на тэ выпхэнэн статэчнэс (тэ об΄явинэн) пал Тырэ́-зоралыпнаскирэ кэрибэна. 5Мэ ява́ва тэ ракира́в пал славу́тно паты́в Тырэ́ райканэ́ славатыр и Тырэ́ ди́вна кэ дар бутя́. 6И мануша́ явэ́на тэ роспхэнэ́н и пал Тыро́ зоралыпэ́н кэ дар, Тырэ́ бутендыр, и мэ ява́ва тэ выпхэнав статэчнэс пал Тырэ́ древа́н барэ́ рэ́нды. 7И ёнэ явэ́на тэ выпхэнэн и тэ рипирэ́н пал Тыро́ баро́ лачхипэ́н и мэ ява́ва тэ бага́в зоралэ́с пал Тыро́ чачипэ́н. 8Рай Дэвэ́л исын лачхэдескиро (милосно) и тангипнаскиро и, Ёв насыг холясо́ла, и исын древа́н лачхэ́-илэ́скиро. 9Рай Дэвэ́л исын лачхо́ кэ сарэ́, и лэ́скиро дро́го лачхипэ́н исын пэ саро́, со Ёв создыя́. 10Саро́, со Ту кэрдя́н, явэ́ла тэ парикирэл Ту́кэ, о Раё Дэ́вла, и Тырэ́ свэ́нта явэ́на тэ шарэ́н Тут. 11Ёнэ явэ́на тэ роспхэнэ́н пал Тырэ́-кралипнаскири сла́ва и тэ ракирэ́л пал Тыро́ зоралыпэ́н, 12соб (кай) тэ джинэ́н манушэ́нгирэ чхавэ́ пал Тырэ́-зоралыпнаскирэ рэ́нды и пал славу́тно райканы сла́ва Тырэ́ кралипнастыр. 13Тыро́ кралипэ́н – кралипэ́н пир сарэ́ ве́ки, и Ту рикирэса зор пир сарэ́ ро́ды. 14Рай Дэвэ́л подрикирэ́ла сарэ́н, кон пэрэ́ла, и ґаздэ́ла сарэ́ одолэ́н, савэ́ бандинэ пхарипнастыр. 15Сарэ́ манушэ́нгирэ якха́ ужакирэ́на лачхипэ́н Ту́тыр, и Ту дэ́са хабэ́н лэ́нгэ тэды, ке́ли трэй лэ́нгэ. 16Ту роскэрэса Тыро́ васт и дэ́са чалэ́с сарэскэ, со исын джидо́. 17Рай Дэвэ́л исын чачипна́скиро дро саро́, со Ёв кэрэ́ла и Ёв исын лачхо́ дро сарэ́ Лэ́скирэ рэ́нды (де́лы). 18Рай Дэвэ́л исын пашы́л сарэ́ндэ одолэ́ндэ, савэ́ кхарэ́на Лэс чачипна́са. 19Ёв кэрэ́ла пир одолэнгиро лав, пэ ило́, савэ́ндэ исын трашаибэ́н анги́л Лэ́стэ и Ёв явэ́ла тэ шунэ́л лэ́скиро ровибэн и зракхэ́ла лэн. 20Рай Дэвэ́л приракхэла сарэ́н, савэ́нгэ исын дро́го Ёв; нэ Ёв хасякирэ́ла сарэ́н фуе́ манушэ́н. 21Миро муй явэ́ла тэ шарэл Рас-Дэвлэ́с и мэк кажно лоч (плоть) тэ шарэл лэ́скиро Свэ́нто лав усады (сак) и пэ сарэ́ ве́ки.
Currently Selected:
Псалм 145: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
