Псалм 144
144
[143-р.с.] 1Давидо́скиро Пса́лмо.
Мэк тэ вышарэн Рас-Дэвлэ́с, Саво́ исын мири́ Бэ́рга тэ зракхавпэ, Кон сыклякирэ́ла мирэ́ васта́ ваш марибэ́н, мирэ́ ангушта (пальцы) тэ маравпэ; 2Ёв исын лачхэ́-дескиро кэ мэ и затэрдёла пал ма́ндэ. Ёв исын мири́ вучи́ вучарды́ (башня) и миро Зракхибнаскиро, миро шчы́то, дрэ Конэ́стэ мэ зоралэ́с патя́ва, Саво́ тэлякирдя мирэ́ манушэ́н тэл ма́ндэ. 3Раё Дэ́вла! Со исын ману́ш, со Ту джинэ́са лэс, манушэ́скиро чхаво́, со Ту кутякирэса лэс? 4Ману́ш исын сы́рбы балвалякиро пхурдыпэн, лэ́скирэ дывэса́ исын сы́рбы зэр (тенё), со проджа́ла (накхэла). 5Раё Дэ́вла! Бандякир Тыро́ болыбэ́н и джа́ тэлэ́ бэ́рги, соб (кай) тэ джал тхув лэ́ндыр; 6зазяин блискавицаса и росчхурдэ лэн; бичха́в Тырэ́ марибны́тка бустя́ (стре́лы) и притасав лэн: 7протырдэ Тыро́ васт вучыпнастыр; подэ васт ма́нгэ бидатыр и зра́кх ман панингэндыр, чужонэ́-чхавэ́нгирэ вастэ́стыр, 8савэнгиро муй ракирэ́ла фрэнта лава́ и лэ́нгиро чачо́ васт исын хохаибнаскиро. 9О Дэ́вла! Мэ ява́ва тэ бага́в нэви́ гилы́ Ту́кэ, мэ ява́ва тэ бага́в псалмы пэ дэшэ-струнэнгири лута Ту́кэ, 10Екхэ́скэ, Кон зракхэ́ла кралье́н, Кон выракхэла Пэ́скирэ писхари́с Давидо́с мэрибнытконэ куртала́тыр. 11Дэ воля́ ма́нгэ и выракх ман чужонэ́-манушэ́нгирэ вастэ́ндыр, савэнгирэ муя́ ракирэ́на фрэнта лава́ и лэ́нгиро чачо́ васт исын хохаибнаскиро. 12Мэк тэ явэ́н амарэ́ чхавэ́ сы́рбы раслины, со выбаринэ дро лэ́нгиро тэрныпэн, мэк тэ явэ́н амарэ́ чхая́ сы́рбы шэралэ́ сты́лбы, со исын вычингирдэ дрэ бари фэлатин (колов): 13мэк тэ явэ́н пхэрдэ́ амарэ́ пираля́ (жытницы) кажнонэ́ гивэса, мэк тэ биянэн амарэ́ бакря́ бара́ и дэш бара́ (тысёнцы) тыкнорэн пэ амарэ́ чаритка пхувья́; 14мэк тэ явэ́н масунэ амарэ́ гурува, мэк тэ на явэ́л ни саво́ пхарипэ́н, ни саво́ хасякирибэн, ни саво́ ровибэн пэ амарэ́ вули́цы (га́сы). 15Тэ явэ́н бахталэ́ дасавэ́ мануша́, савэ́ндэ саро́ дава́ исын. Тэ явэ́н бахталэ́ мануша́, конэ́скиро Дэвэ́л исын Рай Дэвэ́л!
Currently Selected:
Псалм 144: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
